Read Maltese Bible with DC – IL-BIBBJA IL-KOTBA MQADDSA 1 SLATEN 3 Bible Online

1 SLATEN 3 - Maltese Bible with DC – IL-BIBBJA IL-KOTBA MQADDSA bible

1 SLATEN 3

¹U Salamun tħatten mal-Fargħun, sultan tal-Eġittu, u ħa lil bintu b’martu, u ġiebha fil-belt ta’ David sakemm temm jibni daru, u dar il-Mulej, u s-swar madwar Ġerusalemm.

²Imma l-poplu kien għadu joffri s-sagrifiċċji fis-santwarji għax id-dar għal isem il-Mulej kienet għadha ma nbnietx sa dak iż-żmien.

³Salamun kien iħobb il-Mulej, u kien jimxi skont il-preċetti ta’ David missieru, imma huwa wkoll kien joffri s-sagrifiċċji u l-inċens fis-santwarji.

⁴U mar is-sultan f’Gibgħon joffri s-sagrifiċċji hemm, għax fost is-santwarji dak kien l-aqwa wieħed. Salamun offra elf offerta tal-ħruq fuq dak l-artal.

⁵F’Gibgħon il-Mulej deher lil Salamun fil-ħolm billejl. “Itlobni x’nagħtik,” qallu Alla.

⁶U wieġbu Salamun: “Inti wrejt tjieba kbira mal-qaddej tiegħek David missieri, talli hu mexa quddiemek bil-fedeltà u bil-qdusija u bl-onestà miegħek; għadek sal-lum turih din it-tjieba kbira tiegħek, int li ħallejt lil wieħed minn uliedu jieħu postu llum fuq it-tron tiegħu.

⁷B’hekk issa, Mulej, Alla tiegħi, lili, qaddej tiegħek, għadek kemm qegħedtni sultan flok David missieri. Iżda jiena għadni daqsxejn ta’ żagħżugħ, bla ma naf mnejn għandi ngħaddi.

⁸Il-qaddej tiegħek sab ruħu f’nofs dan il-poplu li int għażilt, poplu hekk kotran li ħadd ma jista’ jgħoddu jew iqisu.

⁹Agħti, għalhekk, lill-qaddej tiegħek moħħ ħafif biex jifhem, biex jista’ jmexxi l-poplu tiegħek, u jagħraf it-tajjeb mill-ħażin; għax inkella min jasal biex imexxih, dan il-poplu tiegħek ta’ kotra hekk kbira?”

¹⁰Il-Mulej ħa gost li Salamun talab dil-ħaġa.

¹¹Għalhekk qallu Alla: “Ladarba tlabt din il-ħaġa, u ma tlabtnix għomor twil, jew għana, jew il-ħajja tal-għedewwa tiegħek - iva, talli tlabt li tagħraf tifhem kif għandek tmexxi -

¹²hawn jien se nagħmel kif għedt int. Qed nagħtik moħħ għaref u għaqli, hekk li ħadd qablek ma kien hawn bħalek, u anqas warajk ma jkun hawn.

¹³U mqar dak li ma tlabtnix se nagħtihulek, sew ġid sew glorja, hekk li ma jkun hawn qatt sultan ieħor bħalek.

¹⁴U jekk timxi fi triqati, billi toqgħod għal-liġijiet u l-kmandamenti tiegħi kif mexa David missierek, nagħtik ukoll ħajja twila.”

¹⁵Imbagħad Salamun stenbaħ, u ra li kienet ħolma. Mar lura Ġerusalemm, u qagħad quddiem l-arka tal-patt tal-Mulej: u offra sagrifiċċji tal-ħruq u sagrifiċċji tas-sliem, u għamel festa għall-qaddejja tiegħu kollha.

¹⁶Darba ġew żewġ nisa żienja għand is-sultan u resqu quddiemu.

¹⁷Waħda minnhom qaltlu: “Jekk jogħġbok, Sidi! Jien u din il-mara noqogħdu f’dar waħda, u wlidt magħha fid-dar.

¹⁸Ġara li fit-tielet jum wara l-ħlas tiegħi, wildet din ukoll; u konna weħidna, ma kien hemm ħadd barrani magħna fid-dar, imma aħna t-tnejn weħidna;

¹⁹u t-tarbija ta’ din il-mara mietet billejl, għax hi raqdet fuqha.

²⁰U qamet matul il-lejl, u ħadet lil ibni minn ħdejja, waqt li l-qaddejja tiegħek kienet rieqda; u medditu fi ħdanha, u ’l binha mejjet medditu fi ħdani.

²¹U mas-sebħ qomt inredda’ lil ibni, u nsibu mejjet; imma xħin ħarist sewwa lejh filgħodu, insib li ma kienx ibni li kont ulidt.”

²²Imma l-mara l-oħra qalet: “Le! Ibni l-ħaj u ibnek il-mejjet.” U l-oħra wieġbet: “Le! Ibnek il-mejjet, u ibni l-ħaj!” U hekk baqgħu sejrin jitlewmu quddiem is-sultan.

²³U s-sultan qalilhom: “Din qiegħda tgħid ‘Dan hu ibni, il-ħaj; u ibnek, il-mejjet’; u din twieġeb: ‘Le, ibnek il-mejjet; u ibni l-ħaj.”

²⁴U ssokta jgħid is-sultan: “Newluli xabla.” U newlulu xabla;

²⁵u s-sultan qal: “Aqsmu t-tarbija l-ħajja fi tnejn, u agħtu nofs lil waħda, u nofs lill-oħra.”

²⁶U l-mara li binha kien il-ħaj ħasset il-ġewwieni tagħha jitqanqlu minħabba binha, u qabżet u qaltlu: “Jekk jogħġbok, sidi, agħtuha t-tarbija l-ħajja, u la toqtluhiex.” Imma l-oħra qalet: “La tkun tiegħi, u lanqas tiegħek, aqsmuha!”

²⁷U s-sultan wieġeb u qal: “Agħtuha t-tarbija l-ħajja, u la toqtluhiex; għax dik hi ommha.”

²⁸U Iżrael kollu sama’ bil-ġudizzju li kien ta s-sultan, u bdew jibżgħu mis-sultan għax raw li fih kellu l-għerf ta’ Alla biex jagħmel il-ħaqq.