Read Maltese Bible with DC – IL-BIBBJA IL-KOTBA MQADDSA 1 SLATEN 4 Bible Online

1 SLATEN 4 - Maltese Bible with DC – IL-BIBBJA IL-KOTBA MQADDSA bible

1 SLATEN 4

¹Salamun kien sultan fuq Iżrael kollu.

²U dawn kienu l-uffiċjali tiegħu: Għażarija bin Sadok kien il-qassis;

³Eliħoref u Aħija ulied Sisa, segretarji; Ġosafat bin Aħilud, kunsillier;

⁴Benajja bin Ġeħojada, kmandant tal-eżerċtu; Sadok u Abjatar, qassisin;

⁵Għażarija bin Natan, kap tal-kummissarji; Żabud bin Natan, qassis, ħabib tas-sultan;

⁶Aħisar, maġġordom; u Adoniram bin Għabda, soprastant fuq ix-xogħol bilfors.

⁷Salamun kellu wkoll tnax-il kummissarju[7] fuq Iżrael kollu, u kienu jaħsbu għall-provvisti tas-sultan u d-dar tiegħu. Kull wieħed kellu jaħseb għall-provvista ta’ xahar fis-sena.

⁸Dawn kienu ismijiethom: Ben-ħur fil-muntanji ta’ Efrajm;

⁹Ben-deker f’Makas, Sagħalbim u Betxemex, Elon-bet-ħanan;

¹⁰Ben-ħesed f’Arubbot; kellu Soku u l-art kollha ta’ Ħefer.

¹¹Ben-abinadab f’Nafat-dor; martu kienet Tafat, bint Salamun.

¹²Bagħana bin Aħilud kellu Tagħnak u Megiddu u Betsan kollu, li taħbat Saretan minn taħt Ġeżragħel, minn Betsan sa Abel-meħola san-naħa l-oħra ta’ Ġoknegħam.

¹³Ben-geber f’Ramot-gilgħad; kellu f’idejh l-irħula ta’ Ġajir bin Manassi, li kienu f’Gilgħad, u wkoll l-inħawi ta’ Argob f’Basan; sittin belt kbira u mdawra bis-swar, u magħluqa bl-iżbarri tal-bronż.

¹⁴Aħinadab bin Għiddu, f’Maħanajm;

¹⁵Aħimagħas f’Naftali - dan ukoll ħa b’martu lil Baxemat bint Salamun;

¹⁶Bagħana bin Ħusaj, f’Aser u Begħalot;

¹⁷Ġeħosafat bin Paruħa, f’Issakar.

¹⁸Simgħi bin Ela, f’Benjamin;

¹⁹Geber bin Uri, fl-art ta’ Gilgħad, fl-art ta’ Siħon, sultan tal-Amurrin, u ta’ Għog, sultan ta’ Basan. Kien hemm imbagħad kummissarju wieħed fuq l-art ta’ Ġuda[8].

²⁰Il-poplu[9] ta’ Ġuda u Iżrael kien kotran bħar-ramel tal-baħar; u kienu lkoll ferħana jieklu u jixorbu.