Read Maltese Bible with DC – IL-BIBBJA IL-KOTBA MQADDSA 2 SLATEN 10 Bible Online

2 SLATEN 10 - Maltese Bible with DC – IL-BIBBJA IL-KOTBA MQADDSA bible

2 SLATEN 10

¹Aħab kellu sebgħin tifel f’Samarija. U Ġeħu kiteb ittra u bagħatha s-Samarija lill-kapijiet ta’ Iżrael[20], lill-anzjani u lil dawk li kienu jrabbu t-tfal ta’ Aħab, u qalilhom:

²“Malli tasal għandkom din l-ittra, intom, li għandkom ħsieb ulied sidkom u għandkom f’idejkom il-karrijiet u ż-żwiemel u l-fortizzi u l-armi,

³araw min hu l-itjeb u l-aħjar fost ulied is-sultan għal fuq it-tron ta’ missieru, u tqabdu għal dar sidkom.”

⁴Imma huma beżgħu ħafna, u qalu: “Ara, jekk żewġ slaten ma setgħux jiqfulu, kif nistgħu niqfulu aħna?”

⁵U s-suprentendent tal-palazz, il-gvernatur tal-belt, l-anzjani u dawk li kienu jieħdu ħsieb it-tfal bagħtu jgħidu lil Ġeħu: “Aħna l-qaddejja tiegħek, u kulma tgħidilna nagħmluh. Ma aħna ser nagħmlu lil ħadd sultan. Agħmel dak li jidhirlek li hu sewwa.”

⁶U kitbilhom ittra oħra u qalilhom: “Jekk intom miegħi u lesti tisimgħu kliemi, aqbdu rjus ulied sidkom, u għada, bħal issa, ejjew għandi f’Ġeżragħel.” U wlied is-sultan, li kienu jlaħħqu sebgħin ruħ, kienu mqassmin għand il-kbarat tal-belt biex irabbuhom.

⁷U ġara li malli waslitilhom l-ittra għandhom qabdu lil ulied is-sultan, sebgħin wieħed, u qatluhom, u qiegħdu rjushom fil-qfief, u bagħtuhom għand Ġeħu f’Ġeżragħel.

⁸U marru jgħarrfu lis-sultan u jgħidulu: “Ġiebu rjus ulied is-sultan.” U hu weġibhom: “Qegħduhom żewġ gzuz fid-daħla tal-bieb sa filgħodu.”

⁹Filgħodu, imbagħad, ħareġ u waqaf quddiem il-poplu kollu u qalilhom: “Intom bla ħtija. Araw, jiena kkonfoffajt kontra sidi, u qtiltu. Imma dawn min qatilhom?

¹⁰Kunu afu mela li xejn ma jaqa’ fl-art minn kliem il-Mulej, li tkellem dwar id-dar ta’ Aħab. Il-Mulej għamel dak kollu li tkellem permezz tal-qaddej tiegħu Elija.”

¹¹U Ġeħu qatel f’Ġeżragħel lil dawk kollha li kien fadal mid-dar ta’ Aħab, u l-kbarat tiegħu, il-ħbieb u l-qassisin tiegħu, sakemm ma ħallielu anqas wieħed.

¹²Imbagħad qam u mar is-Samarija. Hu u sejjer wasal f’Bet-għeqed tar-rgħajja.

¹³Ġeħu sab l-aħwa ta’ Aħażija, is-sultan ta’ Ġuda, u staqsiehom: “Min intom?” u weġbuh: “Aħna ħut Aħażija, u nżilna biex naraw kif inhuma wlied is-sultan u wlied is-sultana.”

¹⁴U hu qal: “Aqbduhom ħajjin.” U qabduhom ħajjin u qatluhom ħdejn il-bir ta’ Bet-għeqed, tnejn u erbgħin raġel, u ma ħalla ebda wieħed minnhom.

¹⁵U telaq minn hemm, u sab lil Ġeħonadab bin Rekab, li kien ġej jiltaqa’ miegħu. Sellimlu u qallu: “Qalbek sinċiera miegħi bħalma qalbi hi ma’ qalbek?” U Ġeħonadab wieġbu: “Hekk hi.” U qallu: “Jekk inhu hekk, agħtini idek.” U tah idu. Imbagħad tellgħu ħdejh fuq il-karru.

¹⁶Imbagħad qallu: “Ejja miegħi, u tara l-ħeġġa tiegħi għall-Mulej.” U rikkbu fuq il-karru tiegħu.

¹⁷U wasal is-Samarija u qatel lil dawk kollha li kien għad fadal f’Samarija minn dar Aħab, sa ma qeridha għalkollox, skont il-kelma tal-Mulej, li kien qal lil Elija.

¹⁸U Ġeħu laqqa’ l-poplu kollu u qalilhom: “Aħab ftit weġġaħ lil Bagħal: Ġeħu jweġġħu ħafna aktar minnu.

¹⁹Mela issa sejħuli lill-profeti kollha ta’ Bagħal, u d-devoti kollha tiegħu, u l-qassisin kollha tiegħu - ma għandu jonqos ħadd - għax irrid noffri sagrifiċċju kbir f’ġieħ Bagħal. Min jonqos, ma jibqax ħaj.” U Ġeħu għamel dan bil-ħażen ta’ moħħu biex jeqred il-qaddejja ta’ Bagħal.

²⁰U Ġeħu qal: “Niedu laqgħa kbira f’ġieħ Bagħal.” U niduha.

²¹U Ġeħu bagħat messaġġiera ma’ Iżrael kollu, u ġew il-qaddejja kollha ta’ Bagħal, u ma kienx baqa’ hemm wieħed li ma ġiex; u waslu fit-tempju ta’ Bagħal, u mlewh minn tarf sa tarf.

²²U Ġeħu qal lis-suprentendent tal-ilbies: “Oħroġ l-ilbiesi għall-qaddejja kollha ta’ Bagħal.” U ħarġilhom l-ilbies.

²³U Ġeħu u Ġeħonadab bin Rekab ġew fit-tempju ta’ Bagħal, u qalu lill-qaddejja ta’ Bagħal: “Fittxu u araw li ma jkunx hemm magħkom xi ħadd mill-qaddejja tal-Mulej; qisu li jkun hemm biss il-qaddejja ta’ Bagħal.”

²⁴U ġew biex joffru vittmi u sagrifiċċji tal-ħruq. Ġeħu ħalla tmenin raġel barra, u qalilhom: “Min iħalli jaħrab lil xi ħadd minn dawk li jien se nħalli f’idejkom, iħallas b’ħajtu.”

²⁵Ġara li, malli temm is-sagrifiċċju tal-ħruq, Ġeħu qal lill-gwardji u lill-fizzjali: “Morru u oqtluhom. Tħallu lil ħadd jaħrab.” U għaddewhom minn xifer ix-xabla. Imbagħad il-gwardji u l-fizzjali ħarġuhom ’il barra, u huma daħlu fis-santwarju tat-tempju ta’ Bagħal.

²⁶U ħarġu minn hemm ix-xbieha tal-Asera li kien hemm fit-tempju ta’ Bagħal u ħarquha.

²⁷Qerdu wkoll il-plier ta’ Bagħal, u ħattew it-tempju ta’ Bagħal, u għamlu floku latrina li għadha hemm sal-lum.

²⁸Ġeħu qered ’il Bagħal minn Iżrael.

²⁹Iżda Ġeħu ma warrabx mid-dnubiet li Ġerobogħam bin Nebat ġiegħel lil Iżrael jagħmlu, jiġifieri, l-għoġol tad-deheb li kien hemm f’Betel u f’Dan.

³⁰U l-Mulej qal lil Ġeħu: “Talli għamilt sewwa dak li jogħġobni, u għamilt lid-dar ta’ Aħab kulma kelli f’qalbi, uliedek joqogħdu fuq it-tron ta’ Iżrael sar-raba’ ġenerazzjoni.”

³¹Imma Ġeħu ma qiesx li jimxi b’qalbu kollha fuq il-liġi tal-Mulej, Alla ta’ Iżrael; ma warrabx mid-dnubiet li Ġerobogħam ġagħal jagħmlu ’l-Iżraelin.

³²F’dawk il-jiem il-Mulej beda jnaqqas mill-fruntieri ta’ Iżrael, u Ħażajel beda jaħbat għal art Iżrael fil-medda kollha tagħha:

³³in-naħa tal-Lvant tal-Ġordan, l-art kollha ta’ Gilgħad, tal-Gadin, tar-Rubenin u tal-Manassin, minn Għarogħer, li taħbat ħdejn l-Arnon, sa Gilgħad u Basan.

³⁴U l-bqija tal-ġrajja ta’ Ġeħu u kulma għamel, u kulma wettaq, kollha jinsabu miktuba fi Ktieb il-Ġrajja tas-Slaten ta’ Iżrael.

³⁵U Ġeħu strieħ ma’ missirijietu, u difnuh f’Samarija; u saltan floku Ġeħowaħaż, ibnu.

³⁶U ż-żmien li fih saltan Ġeħu fuq Iżrael f’Samarija kien ta’ tmienja u għoxrin sena.