Read Maltese Bible with DC – IL-BIBBJA IL-KOTBA MQADDSA 2 SLATEN 13 Bible Online

2 SLATEN 13 - Maltese Bible with DC – IL-BIBBJA IL-KOTBA MQADDSA bible

2 SLATEN 13

¹Fis-sena tlieta u għoxrin ta’ Ġowas bin Aħażija, sultan ta’ Ġuda, sar sultan ta’ Iżrael Ġeħowaħaż bin Ġeħu, f’Samarija, u dam isaltan sbatax-il sena.

²U għamel il-ħażin f’għajnejn il-Mulej, u mexa fuq id-dnubiet ta’ Ġerobogħam bin Nebat, li dan ġagħal lil Iżrael jagħmlu, u ma warrabx minnhom.

³U xegħlet il-korla tal-Mulej kontra Iżrael, u rħiehom f’idejn Ħażajel, is-sultan ta’ Aram, u f’idejn Benħadad bin Ħażajel, għal dak iż-żmien kollu.

⁴U Ġeħowaħaż talab ħniena lill-Mulej u l-Mulej semgħu għax ra l-hemm ta’ Iżrael, billi s-sultan ta’ Aram kien qiegħed jgħakkishom.

⁵U l-Mulej ta salvatur[23] lil Iżrael u ħelishom minn taħt idejn Aram; u wlied Iżrael għammru fi djarhom bħal qabel.

⁶Imma ma warrbux mid-dnubiet ta’ dar Ġerobogħam, li dan ġagħal lil Iżrael jagħmlu; imxew fuqhom, u waqqfu saħansitra x-xbihat tal-Asera f’Samarija.

⁷Għalhekk Ġeħowaħaż ma kienx baqagħlu nies ħlief ħamsin rikkieba, għaxar karrijiet, u għaxart elef fanterija, għaliex kien qeridhom is-sultan ta’ Aram, u għamilhom trab għall-irfis.

⁸U l-bqija tal-ġrajja ta’ Ġeħowaħaż, u kulma għamel, u kemm wettaq jinsabu miktuba fi Ktieb il-Ġrajja tas-Slaten ta’ Iżrael.

⁹U strieħ Ġeħowaħaż ma’ missirijietu, u difnuh f’Samarija; u beda jsaltan floku Ġowas, ibnu.

¹⁰Fis-sena sebgħa u tletin tas-sultan Ġowas, sultan ta’ Ġuda, laħaq sultan ta’ Iżrael Ġeħowas bin Ġeħowaħaż f’Samarija, u saltan għal sittax-il sena.

¹¹U għamel il-ħażin f’għajnejn il-Mulej u ma warrabx mid-dnubiet kollha ta’ Ġerobogħam bin Nebat, li dan ġagħal lil Iżrael jagħmlu, imma mexa fuqhom.

¹²U l-bqija tal-ġrajja ta’ Ġowas, u kulma għamel, u kemm wettaq meta tqabad ma’ Amasija, sultan ta’ Ġuda, jinsabu miktubin fi Ktieb il-Ġrajja tas-Slaten ta’ Iżrael.

¹³U Ġowas strieħ ma’ missirijietu; u Ġerobogħam tela’ fuq it-tron tiegħu. Ġowas difnuh f’Samarija mas-slaten ta’ Iżrael.

¹⁴Eliżew marad b’marda li kellu jmut biha. U Ġowas sultan ta’ Iżrael niżel ħdejh, u beda jibki quddiemu u jgħajjat: “Missier, Missier[24]! Il-karru ta’ Iżrael u r-rikkieb tiegħu!”

¹⁵U Eliżew qallu: “Ħu f’idejk qaws u vleġeġ.” U ħa f’idu qaws u vleġeġ.

¹⁶U Eliżew qal lis-sultan ta’ Iżrael: “Qiegħed idek fuq il-qaws[25].” U dak qiegħed idu fuq il-qaws; u Eliżew poġġa idejh fuq idejn is-sultan,

¹⁷u qallu: “Iftaħ it-tieqa n-naħa tal-Lvant.” U dak fetaħha. U Eliżew qallu: “Waddab vleġġa.” U dak waddabha, u l-ieħor qallu: “Dik hi vleġġa ta’ rebħa mingħand il-Mulej, u vleġġa ta’ rebħa fuq Aram; għax int għad tidrob lil Aram f’Afek sakemm teqirdu.”

¹⁸Imbagħad qallu wkoll: “Ħu l-vleġeġ.” U dak ħadhom, u Eliżew qal lis-sultan ta’ Iżrael: “Idrob l-art!” U dak darab l-art għal tliet darbiet, u waqaf.

¹⁹U l-bniedem ta’ Alla għadab għalih, u qallu: “Li kieku drabt l-art ħamsa jew sitt darbiet, kont tkisser l-Aramin sa ma teqridhom. Imma issa tliet darbiet biss tista’ tirbaħ lill-Aramin.”

²⁰U Eliżew miet u difnuh. Fi dħul is-sena qatgħa ħallelin minn Mowab bdew deħlin fil-pajjiż.

²¹Darba, meta xi wħud kienu qegħdin jidfnu wieħed mejjet, raw qatgħa minnhom u xeħtu r-raġel fil-qabar ta’ Eliżew u telqu. Malli r-raġel mejjet mess mal-għadam ta’ Eliżew, ħa l-ħajja, u qam fuq riġlejh.

²²U Ħażajel, sultan ta’ Aram, baqa’ jgħakkes lil Iżrael iż-żmien kollu ta’ Ġeħowaħaż.

²³U l-Mulej ħenn għalihom, u tħassarhom u dar lejhom minħabba l-patt tiegħu ma’ Abraham, Iżakk u Ġakobb. Ma riedx jeqridhom, u anqas qatt sal-lum ma warrabhom minn quddiemu.

²⁴Imbagħad miet Ħażajel, sultan ta’ Aram, u daħal isaltan floku Benħadad, ibnu.

²⁵U Ġeħowas bin Ġeħowaħaż raġa’ ħa lura l-ibliet minn id Benħadad bin Ħażajel, li dan kien ħa minn id Ġeħowaħaż missieru fil-gwerra. Tliet darbiet Ġowas għelbu, u raġa’ ħa lura l-ibliet ta’ Iżrael.