Read Maltese Bible with DC – IL-BIBBJA IL-KOTBA MQADDSA 2 SLATEN 2 Bible Online

2 SLATEN 2 - Maltese Bible with DC – IL-BIBBJA IL-KOTBA MQADDSA bible

2 SLATEN 2

¹Ġara li meta l-Mulej kien se jtalla’ s-sema lil Elija ġor-riefnu, Elija kien telaq ma’ Eliżew minn Gilgal[4].

²U Elija qal lil Eliżew: “Oqgħod hawn, għax il-Mulej bagħatni sa Betel.” Imma Eliżew wieġbu: “Daqs kemm hu ħaj il-Mulej u daqs kemm int ħaj int, ma nħallikx.” U niżlu t-tnejn Betel.

³U wlied il-profeti, li kienu f’Betel, ħarġu jilqgħu lil Eliżew u qalulu: “Taf int li llum il-Mulej se jieħu lil sidek minn miegħek?” U hu qalilhom: “Naf jien ukoll. Oqogħdu bi kwietkom.”

⁴U Elija qallu: “Eliżew, oqgħod hawn, nitolbok, għax il-Mulej bagħatni Ġeriko.” U wieġbu: “Daqs kemm hu ħaj il-Mulej, u daqs kemm int ħaj int, ma nħallikx.” U marru Ġeriko.

⁵U wlied il-profeti li kienu f’Ġeriko ħarġu jilqgħu lil Eliżew u qalulu: “Taf int li llum il-Mulej se jeħodlok lil sidek minn miegħek.” U weġibhom: “Naf jien ukoll. Oqogħdu bi kwietkom.”

⁶U Elija qallu: “Oqgħod hawn, nitolbok, għax il-Mulej bagħatni lejn il-Ġordan.” U wieġbu: “Daqs kemm hu ħaj il-Mulej u daqs kemm int ħaj int, ma nħallikx.” U telqu t-tnejn.

⁷U ħamsin wieħed minn ulied il-profeti telqu magħhom, u qagħdu ftit ’il bogħod minn quddiemhom, u huma t-tnejn waqfu ħdejn il-Ġordan.

⁸U Elija qabad il-mantar tiegħu, kebbu, u ħabbtu mal-ilma; u dan inferaq ’l hemm u ’l hawn. U qasmu huma t-tnejn fl-inxif.

⁹U ġara li huma u jaqsmu, Elija qal lil Eliżew: “Itlobni x’għandi nagħmillek qabel ma nittieħed minn ħdejk.” U Eliżew wieġbu: “Ħa jkun hemm fija żewġ ishma mill-ispirtu tiegħek[5]!”

¹⁰U qallu: “Ħaġa iebsa tlabtni. Jekk tarani nittieħed minn ħdejk, ikunlek hekk; jekk le, ma jkunlekx.”

¹¹U ġara li huma u sejrin, jimxu u jitkellmu, f’daqqa waħda karru tan-nar bi żwiemel tan-nar firidhom minn xulxin, u Elija tala’ s-sema fir-riefnu[6].

¹²Eliżew baqa’ jħares u jgħajjat: “Missieri, Missieri, il-karru ta’ Iżrael u r-rikkieb tiegħu[7].” U ma rahx iżjed; u qabad fi ħwejġu u ċarrathom f’biċċtejn.

¹³Imbagħad ġabar il-mantar ta’ Elija li kien waqa’ minn fuqu, u raġa’ lura u waqaf max-xatt tal-Ġordan.

¹⁴U ħa l-mantar ta’ Elija li kien waqa’ minn fuqu u ħabbtu mal-ilma, u qal: “Fejn hu l-Mulej Alla ta’ Elija issa? Fejn hu?” U ta daqqa fuq l-ilma, u dan inferaq, ’l hawn u ’l hemm, u Eliżew għadda għan-naħa l-oħra.

¹⁵Kif rawh ulied il-profeti, li kienu Ġeriko n-naħa l-oħra, qalu: “L-ispirtu ta’ Elija strieħ fuq Eliżew.” U marru jilqgħuh, u niżlu wiċċhom fl-art quddiemu,

¹⁶u qalulu: “Ara, hawn mal-qaddejja tiegħek ħamsin raġel b’saħħtu, ħa jmorru jfittxu lil sidek, għandu mnejn l-ispirtu ta’ Alla ħadu u xeħtu fuq xi waħda mill-muntanji, jew f’xi wieħed mill-widien.” U hu weġibhom: “Le, tibagħtuhomx!”

¹⁷U baqgħu jsusu warajh sa tħawwad, u qalilhom: “Ibagħtuhom.” U bagħtu ħamsin raġel ifittxuh; u damu tlitt ijiem, u ma sabuhx.

¹⁸U reġgħu lura għandu; hu kien Ġeriko u qalilhom: “Ma għedtilkomx: la tmorrux?”

¹⁹U n-nies tal-belt qalu lil Eliżew: “Ara, il-post tal-belt hu tajjeb, kif jista’ jara sidi, imma l-ilma ħażin, u l-art ħawlija.”

²⁰U hu qalilhom: “Ġibuli bieqja ġdida, u ixħtu ftit melħ fiha.” U ġabuhielu.

²¹U ħareġ lejn l-għajn tal-ilma, u xeħet fiha l-melħ, u qal: “Dan jgħid il-Mulej: ‘Jien intejjeb dan l-ilma. Minn issa ’l quddiem ma jkunx hemm la mewt u la ħwiel tal-art.”

²²U l-ilma baqa’ tajjeb sal-lum, skont il-kelma li qal Eliżew.

²³U minn hemm tala’ Betel, u kif kien tiela’ fit-triq ħarġu xi tfal żgħar mill-belt u bdew jiddieħku bih u jgħidulu: “Itla’, ja qargħi! Itla’, ja qargħi!”

²⁴U hu dar lura, ħares lejhom, u seħithom f’isem il-Mulej[8]. U ħarġu żewġ orsijiet mill-foresta u żbranaw tnejn u erbgħin tifel minnhom.

²⁵Minn hemm Eliżew wasal sal-muntanja tal-Karmel mnejn raġa’ lura s-Samarija.