Read Maltese Bible with DC – IL-BIBBJA IL-KOTBA MQADDSA 2 SLATEN 22 Bible Online

2 SLATEN 22 - Maltese Bible with DC – IL-BIBBJA IL-KOTBA MQADDSA bible

2 SLATEN 22

¹Ġosija kellu tmien snin meta beda jsaltan, u saltan wieħed u tletin sena f’Ġerusalemm. Ommu kien jisimha Ġedida bint Għadajja, minn Boskat.

²U għamel is-sewwa f’għajnejn il-Mulej u mexa fit-triqat kollha ta’ David missieru, u ma kisirx la lejn il-lemin u lanqas lejn ix-xellug.

³Ġara li fit-tmintax-il sena tas-sultan Ġosija, is-sultan bagħat lis-segretarju Safan bin Asalija, bin Mesullam, fit-tempju tal-Mulej, u qallu:

⁴“Itla’ għand Ħilkija, il-qassis il-kbir, ħa jgħodd il-flus kollha miġbura f’dar il-Mulej, li ġabru l-għassiesa tal-bieb mingħand il-poplu.

⁵U jagħtuhom f’idejn l-imgħallmin li jieħdu ħsieb ix-xogħol fit-tempju tal-Mulej, u dawn jgħadduhom lill-ħaddiema tat-tempju tal-Mulej biex isewwu l-ħsara fit-tempju;

⁶jgħadduhom lill-mastrudaxxi, lin-naġġara u lill-bennejja, biex jixtru l-injam u l-ġebel minġur għat-tiswija tat-tempju.

⁷Imma ma għandhomx jitolbuhom kontijiet tan-nefqa tal-flus għax qegħdin jaħdmu bis-sewwa.”

⁸U Ħilkija, il-qassis il-kbir, qal lil Safan, is-segretarju: “Sibt il-ktieb tal-liġi fit-tempju tal-Mulej[34].” U Ħilkija ta l-ktieb lil Safan, u dan qrah.

⁹Safan, is-segretarju, mar għand is-sultan, wassallu r-risposta, u qallu: “Il-qaddejja tiegħek ġabru l-flus li sabu fit-tempju u tawhom f’idejn l-imgħallmin, li jieħdu ħsieb ix-xogħol fit-tempju tal-Mulej.”

¹⁰U Safan, is-segretarju, qallu wkoll: “Ħilkija, il-qassis, tani dan il-ktieb.” U Safan qrah quddiem is-sultan.

¹¹Malli sama’ l-kliem tal-ktieb tal-liġi, is-sultan ċarrat ħwejġu.

¹²Imbagħad is-sultan ordna lil Ħilkija, il-qassis, lil Aħikam bin Safan, u lil Għakbor bin Mikija, lil Safan, is-segretarju, u lil Għaxajja, qaddej tas-sultan, u qalilhom:

¹³“Morru staqsu ’l-Mulej għalija, u għall-poplu, u għal Ġuda kollu dwar il-kliem li hawn f’dan il-ktieb li nstab, għax kbira hi l-korla tal-Mulej li xegħlet għalina, għax missirijietna ma semgħux minn kliem dan il-ktieb, u ma għamlux kulma hawn miktub fih għalina.”

¹⁴U Ħilkija, il-qassis, u Aħikam u Għakbor u Safan u Għaxajja marru għand Ħulda, il-profetessa, mart Sallum bin Tikwa, bin Ħarħas, li kien jieħu ħsieb l-ilbies. Kienet toqgħod fit-tieni kwartier ta’ Ġerusalemm. Meta kellmuha

¹⁵qaltilhom, “Dan jgħid il-Mulej, Alla ta’ Iżrael: ‘Għidu lil min bagħatkom għandi:

¹⁶Dan jgħid il-Mulej: Arawni, se nġib il-ħsara fuq dan il-post, u fuq kull min jgħammar fih; il-kliem kollu li s-sultan ta’ Ġuda qara f’dan il-ktieb,

¹⁷għax huma telquni biex ħarqu l-inċens lil allat oħra, u inkurlawni b’kulma għamlu idejhom, u jixgħel għadbi għal dan il-post, u ma jintefiex.’

¹⁸U lis-sultan ta’ Ġuda li bagħatkom tistħarrġu lill-Mulej dan tgħidulu: ‘Dan jgħid il-Mulej, Alla ta’ Iżrael: Dwar il-kliem li int smajt,

¹⁹billi trattbet qalbek u umiljajt ruħek quddiem il-Mulej meta smajt x’għedt dwar dan il-post u dwar dawk li jgħammru fih, jiġifieri, li jkunu ta’ biża’ u ta’ saħta; talli int ċarratt ħwejġek u bkejt quddiemi, jien ukoll smajtek. Oraklu tal-Mulej.

²⁰‘Arawni, għalhekk jien niġbrok ma’ missirijietek, u tinġabar f’qabrek bis-sliem. U għajnejk ma jarawx il-ħsara kollha li se nġib fuq dan il-post.’ ” U wasslu dan il-kliem lis-sultan.