Read Maltese Bible with DC – IL-BIBBJA IL-KOTBA MQADDSA 2 SLATEN 6 Bible Online

2 SLATEN 6 - Maltese Bible with DC – IL-BIBBJA IL-KOTBA MQADDSA bible

2 SLATEN 6

¹Ulied il-profeti qalu lil Eliżew: “Ara, il-post li qegħdin fih miegħek żgħir wisq għalina.

²Ħa mmorru sal-Ġordan, u nieħdu minn hemm zokk kull wieħed, u nibnu hemm post għalina fejn noqogħdu.” U hu weġibhom: “Morru”.

³U wieħed minnhom qallu: “Jekk jogħġbok, ejja mal-qaddejja tiegħek.” U Eliżew wieġeb: “Niġi.”

⁴U mar magħhom, u waslu sal-Ġordan, u bdew jaqtgħu l-injam.

⁵Ġara li wieħed minnhom, hu u jqaċċat siġra, waqagħlu l-ħadid tal-mannara fl-ilma, u beda jgħajjat u jgħid: “Ah, sidi, dik isselliftha!”

⁶U l-bniedem ta’ Alla staqsieh: “Fejn waqgħet?” U wrieh il-post, Eliżew imbagħad qata’ fergħa, u tefagħha hemm, u l-ħadid tala’ fil-wiċċ.

⁷U qallu: “Erfgħu!” U medd idu u refgħu.

⁸Is-sultan ta’ Aram kien qiegħed jitqabad ma’ Iżrael, u ta parir lill-qaddejja tiegħu, u qalilhom: “Nistaħbew fit-tali u t-tali post.”

⁹U l-bniedem ta’ Alla bagħat jgħid lis-sultan ta’ Iżrael: “Qis li ma tgħaddix minn dak il-post, għax hemm l-Aramin moħbija.”

¹⁰U s-sultan ta’ Iżrael bagħat jitkixxef il-post li qallu bih u widdbu l-bniedem ta’ Alla; u qagħad jgħasses hemm mhux darba u tnejn.

¹¹U s-sultan ta’ Aram tħawwad f’qalbu għal din il-ħaġa, u sejjaħ lill-qaddejja tiegħu u qalilhom: “Ma tafux tgħiduli min minna hu mas-sultan ta’ Iżrael, hux?”

¹²U wieħed mill-qaddejja wieġbu: “Ħadd, Sultan sidi! Imma Eliżew, il-profeta li hemm f’Iżrael, jgħarraf lis-sultan ta’ Iżrael bil-kliem li int tgħid fl-għorfa fejn torqod!”

¹³U qalilhom: “Morru u araw fejn hu, ħa nibgħat naqbdu.” U għarrfuh u qalulu: “Qiegħed f’Dotan.”

¹⁴U l-għada filgħodu bagħat żwiemel u karrijiet, u qatgħa kbira ta’ nies armati; u waslu billejl u dawru l-belt.

¹⁵U l-qaddej tal-bniedem ta’ Alla qam kmieni filgħodu u ħareġ barra, u ra eżerċtu sħiħ madwar il-belt, u żwiemel u karrijiet. U l-qaddej tiegħu qallu: “Ah! sidi, x’se nagħmlu?”

¹⁶U wieġbu: “La tibżax! hemm nies aktar magħna milli magħhom.”

¹⁷U Eliżew beda jitlob u jgħid: “Mulej, iftaħlu għajnejh biex jara.” U l-Mulej fetaħ għajnejn il-qaddej, u dan ra l-għolja mimlija żwiemel u karrijiet tan-nar madwar Eliżew.

¹⁸Malli l-Aramin resqu lejh, Eliżew talab lill-Mulej u qallu: “Iddew! Olqot lil dawn in-nies u agħmihom.” U laqathom bl-għama skont it-talba ta’ Eliżew.

¹⁹U Eliżew qalilhom: “Mhix din it-triq, lanqas ma hi din il-belt. Ejjew warajja u neħodkom għand ir-raġel li qegħdin tfittxu.” U ħadhom f’Samarija.

²⁰U ġara li malli waslu s-Samarija Eliżew qal lill-Mulej: “Iftħilhom għajnejhom ħalli jaraw.” U l-Mulej fetħilhom għajnejhom, u raw li kienu f’nofs is-Samarija.

²¹U malli rahom is-sultan ta’ Iżrael qal lil Eliżew: “Nidrobhom, missier, nidrobhom?”

²²U hu wieġbu: “La tidrobhomx! Tidrob int lil dawk li ma qbadtx bix-xabla, jew bil-qaws tiegħek? Ġibilhom quddiemhom ħobż u ilma ħa jieklu u jixorbu, u jmorru għand sidhom.”

²³U ħejjielhom ikla kbira, kielu u xorbu; u mbagħad bagħathom u marru għand sidhom. U l-qtajja’ tal-Aramin ma resqux iżjed lejn art Iżrael.

²⁴Wara dan ġara li Benħadad, sultan ta’ Aram, ġabar l-eżerċtu kollu tiegħu, u tala’ u dawwar lis-Samarija.

²⁵U waqa’ ġuħ kbir fuq is-Samarija; u l-assedju tant dam li ras ta’ ħmar saret tiswa tmenin xekel tal-fidda, u r-raba’ waħda ta’ kâb[14] ħmieġ tal-ħamiem ħames xwiekel tal-fidda.

²⁶U s-sultan ta’ Iżrael kien għaddej fuq il-ħitan, u mara bdiet tgħajjatlu: “Għajnuna, sidi s-sultan!”

²⁷U hu weġibha: “Jekk ma jgħinekx il-Mulej, biex nista’ ngħinek jien? Mill-qiegħa jew mill-magħsar?”

²⁸U żied jistaqsieha s-sultan: “X’għandek int?” U l-mara qaltlu: “Din il-mara qaltli: ‘Agħtini lil ibnek, u nikluh illum; u lil ibni nikluh għada.’

²⁹U sajjarna lil ibni, u kilnieh. U l-għada għedtilha: ‘Agħtini lil ibnek, u nikluh’, imma hi lil binha ħbietu.”

³⁰Malli s-sultan sama’ kliem il-mara ċarrat ħwejġu kif kien fuq il-ħajt, u l-poplu kollu ra li kellu xkora minn ġewwa fuq il-laħam.

³¹U qalilhom: “Dan jagħmilli l-Mulej u iżjed, jekk illum ras Eliżew bin Safat tibqa’ fuqu.”

³²U Eliżew kien qiegħed f’daru, u x-xjuħ kienu miegħu, u s-sultan bagħat raġel minn għandu. Imma qabel ma wasal għandu l-messaġġier, Eliżew qal lix-xjuħ: “Qegħdin taraw? Dan l-iben ta’ qattiel bagħat ineħħili rasi. Oqogħdu għassa! Malli jasal il-messaġġier agħlqu l-bieb u żommuh fil-bieb. M’intomx tisimgħu ħoss il-passi ta’ sidu warajh?”

³³Kien għadu jkellimhom, u hemm hu s-sultan, nieżel ħdejh. U qallu: “Ara, din il-ħsara kollha mingħand il-Mulej. X’nistenna aktar mingħand il-Mulej?”