Read Maltese Bible with DC – IL-BIBBJA IL-KOTBA MQADDSA 2 SLATEN 9 Bible Online

2 SLATEN 9 - Maltese Bible with DC – IL-BIBBJA IL-KOTBA MQADDSA bible

2 SLATEN 9

¹Eliżew, il-profeta, sejjaħ lil wieħed minn ulied il-profeti u qallu: “Ħażżem ġenbejk, u ħu dan il-kus żejt f’idek, u mur Ramot-gilgħad.

²Kif tasal hemm, ara tarax lil Ġeħu bin Ġosafat, bin Nimsi, u malli tidħol ħdejh qajmu minn fost sħabu u daħħlu fil-kamra ta’ ġewwa nett.

³Imbagħad aqbad il-kus taż-żejt, sawbu fuq rasu u għidlu: “Dan jgħid il-Mulej: ‘Dliktek sultan fuq Iżrael.’ ” U iftaħ il-bieb, u aħrab; toqgħodx titnikker.

⁴U ż-żagħżugħ - kien hu wkoll bin profeta - mar Ramot-gilgħad.

⁵U wasal, u ra l-fizzjali tal-eżerċtu miġbura flimkien bilqiegħda, u qalilhom: “Għandi messaġġ għalik, kmandant.” U Ġeħu wieġbu: “Għal min minna?” U wieġbu: “Għalik, kmandant.”

⁶U qam u daħal id-dar, u sawwablu ż-żejt fuq rasu u qallu: “Dan jgħid il-Mulej, Alla ta’ Iżrael: ‘Jien dliktek sultan fuq il-poplu tal-Mulej, fuq Iżrael.

⁷Int tidrob lil dar Aħab, sidek, u hekk nitħallas tad-demm tal-qaddejja tiegħi l-profeti, u tad-demm tal-qaddejja kollha tal-Mulej minn id Ġeżabel.

⁸Id-dar kollha ta’ Aħab tinqered[18] u neqred lil kull raġel, sew jekk ikun ilsir sew jekk ħieles, f’Iżrael.

⁹U nagħmel minn dar Aħab bħalma għamilt minn dar Ġerobogħam bin Nebat u mid-dar ta’ Bagħsa bin Aħija.

¹⁰U lil Ġeżabel jikluha l-klieb fil-qasam ta’ Ġeżragħel, u ma jkun hemm ħadd biex jidfinha.’ ” U fetaħ il-bieb u ħarab.

¹¹U Ġeħu ħareġ għal ħdejn il-qaddejja ta’ sidu, u dawn qalulu: “Kollox sewwa? Għalfejn ġie għalik dan il-miġnun?” U weġibhom: “Intom tafuh lil dak ir-raġel, u t-tpaċpiċ tiegħu.”

¹²U huma weġbuh: “Mhux tassew! Għidilna!” U qalilhom: “Dan u dan qalli,” u żied: “Hekk qal il-Mulej: ‘Dliktek sultan fuq Iżrael.’ ”

¹³Malajr malajr ħadu kull wieħed mantaru, u firxuh taħt riġlejh fuq it-taraġ għeri, daqqew it-tromba u għajtu: “Ġeħu Sultan!”

¹⁴Ġeħu bin Ġosafat, bin Nimsi, beda jikkonfoffa kontra Ġoram; u Ġoram kien jgħasses f’Ramot-gilgħad, hu u Iżrael kollu, minħabba Ħażajel, sultan ta’ Aram.

¹⁵U Ġoram, is-sultan, kien raġa’ mar Ġeżragħel jiddewwa mill-ġrieħi, li kienu għamlulu l-Aramin, meta kien jitqabad ma’ Ħażajel, is-sultan ta’ Aram. U Ġeħu qal: “Jekk intom taħsbuha hekk, ħadd minnkom ma għandu joħroġ mill-belt, u jmur iħabbar dan f’Ġeżragħel.”

¹⁶U Ġeħu rikeb il-karru, u mar Ġeżragħel, għax Ġoram kien hemm mixħut fis-sodda, u kien hemm ukoll Aħażija, sultan ta’ Ġuda, billi kien niżel biex iżur lil Ġoram.

¹⁷L-għassies kien fuq it-torri ta’ Ġeżragħel, u lemaħ il-qatgħa ta’ Ġeħu riesqa, u qal: “Qiegħed nara qatgħa nies.” U Ġoram qallu: “Aqbad rikkieb, u ibagħtu jiltaqa’ magħhom, u jistaqsihom hux kollox sewwa.”

¹⁸U r-rikkieb rikeb iż-żiemel, u mar jiltaqa’ miegħu, u qallu: “Dan jgħid is-sultan: ‘Kollox sewwa?’ ” U Ġeħu wieġeb: “X’għandek x’taqsam int jekk hux kollox sewwa? Dur għal warajja.” U l-għassies ħabbar u qal: “Il-messaġġier wasal sa ħdejhom, imma ma ġiex lura.”

¹⁹U Ġoram bagħat rikkieb ieħor fuq iż-żiemel, u dan wasal ħdejhom, u qal: “Dan jgħid is-sultan: ‘Kollox sewwa?’ U Ġeħu wieġeb: “X’għandek x’taqsam int jekk hux kollox sewwa? Dur għal warajja!”

²⁰U l-għassies ħabbar u qal: “Wasal sa ħdejhom, imma ma ġiex lura. Is-sewqan hu s-sewqan ta’ Ġeħu bin Nimsi, għax isuq bħal miġnun.”

²¹Imbagħad Ġoram qalilhom: “Orbtu ż-żwiemel.” U rabtuhom mal-karru tiegħu. U Ġoram, is-sultan ta’ Iżrael, ħareġ, hu u Aħażija, sultan ta’ Ġuda, kull wieħed fuq il-karru tiegħu, jiltaqgħu ma’ Ġeħu, u sabuh fl-għalqa ta’ Nabot, il-Ġeżragħeli.

²²U ġara li malli Ġoram ra lil Ġeħu qallu: “Sliem, Ġeħu?” U dak wieġbu: “Xi sliem, sakemm idumu ż-żina ta’ ommok Ġeżabel[19] u l-qabda sħarijiet tagħha?”

²³U Ġoram dawwar il-karru biex jaħrab, u qal lil Aħażija: “Tradiment, Aħażija!”

²⁴U Ġeħu qabad il-qaws f’idu, u darab lil Ġoram bejn spallejh, u l-vleġġa ħarġet minn ġo qalbu, u miet fuq il-karru.

²⁵U mbagħad Ġeħu qal lil Bidkar, l-ajjutant tiegħu: “Aqbduh u waddbuh f’xi naħa tal-għalqa ta’ Nabot, il-Ġeżragħeli; għax għadni niftakar li darba, meta jien u int konna rekbin wara Aħab missieru, il-Mulej xeħet fuqu din it-theddida:

²⁶‘Ma rajtx jien ilbieraħ id-demm ta’ Nabot, u d-demm ta’ wliedu? Oraklu tal-Mulej. Hekk inħallsek f’din l-istess għalqa, oraklu tal-Mulej.’ Mela issa aqbduh u waddbuh fil-qasam skont il-kelma tal-Mulej.”

²⁷U Aħażija, sultan ta’ Ġuda, malli ra dan kollu, ħarab mit-triq ta’ Bet-ħaggan, imma Ġeħu għamel għal warajh, u ordna: “Idorbuh lilu wkoll fuq il-karru.” U laqtuh fit-telgħa ta’ Gur, li taħbat qrib Iblagħam, u ħarab lejn Megiddu, u miet hemmhekk.

²⁸U l-qaddejja tiegħu għabbewh fuq karru, u ħaduh Ġerusalemm, u difnuh ma’ missirijietu f’qabru fil-belt ta’ David.

²⁹Aħażija beda jsaltan fuq Ġuda fis-sena ħdax ta’ Ġoram bin Aħab.

³⁰U Ġeħu ġie Ġeżragħel. Xħin Ġeżabel semgħet, żebgħet għajnejha bl-ikħal, u żejnet rasha, u telgħet tittawwal mit-tieqa.

³¹U kif Ġeħu wasal fil-bieb qaltlu: “Kollox sewwa ma’ Żimri, il-qattiel ta’ sidu?”

³²U hu rafa’ għajnejh lejn it-tieqa, u weġibha: “Min hawn miegħi? Min?” U tnejn jew tliet uffiċjali ħarġu jittawlu;

³³u hu qalilhom: “Waddbuha għal isfel!” U huma waddbuha għal isfel, u r-raxx ta’ demmha ċappas il-ħajt u ż-żwiemel, li għaddew jgħaffġu minn fuqha.

³⁴Imbagħad daħal il-belt, kiel u xorob, u qalilhom: “Morru araw lil dik il-misħuta, u idfnuha, għax hi bint sultan.”

³⁵U marru jidfnuha, imma ma sabu xejn minnha ħlief il-qorriegħa, riġlejha u keffejn idejha.

³⁶U reġgħu lura jgħarrfu lil Ġeħu, u qalilhom: “Din hi l-kelma tal-Mulej, li lissen permezz tal-qaddej tiegħu Elija, it-Tisbi, meta qal: ‘Laħam Ġeżabel jikluh il-klieb fl-għalqa ta’ Ġeżragħel.

³⁷U jkun bħad-demel f’wiċċ l-art fl-għalqa ta’ Ġeżragħel, il-ġisem mejjet ta’ Ġeżabel, u ħadd ma jkun jista’ jgħid: ‘Din hi Ġeżabel.’ ”