Read Maltese Bible with DC – IL-BIBBJA IL-KOTBA MQADDSA 1 KRONAKI 15 Bible Online

1 KRONAKI 15 - Maltese Bible with DC – IL-BIBBJA IL-KOTBA MQADDSA bible

1 KRONAKI 15

¹David bena għalih djar fil-Belt ta’ David, u ħejja post għall-arka ta’ Alla u talla’ għarix għaliha.

²U mbagħad David qal: “Ħadd ma jista’ jġorr l-arka ta’ Alla ħlief il-Leviti: għax lilhom għażel il-Mulej biex iġorru l-arka tal-Mulej, u jservuh għal dejjem.”

³U David laqqa’ lill-poplu ta’ Iżrael kollu f’Ġerusalemm biex italla’ l-arka tal-Mulej f’postha li kien ħejja għaliha.

⁴U David laqqa’ lil ulied Aron u ’l-Leviti.

⁵Minn ulied Keħat: Urijel il-kap, b’mija u għoxrin minn ħutu.

⁶Minn ulied Merari: Għaxajja l-kap, b’mitejn u għoxrin minn ħutu.

⁷Minn ulied Gersum: Ġoel il-kap, b’mija u tletin minn ħutu.

⁸Minn ulied Elisafan: Semajja l-kap, b’mitejn minn ħutu.

⁹Minn ulied Ħebron: Elijel il-kap, bi tmenin minn ħutu.

¹⁰Minn ulied Għużżijel: Għamminadab il-kap, b’mija u tnax minn ħutu.

¹¹Imbagħad David sejjaħ lill-qassisin Sadok u Abjatar, u ’l-Leviti: Urijel, Għaxajja, Ġoel, Semajja, Elijel, u Għamminadab,

¹²u qalilhom: “Intom il-kapijiet tal-familji ta’ missirijiet il-Leviti. Tqaddsu intom u ħutkom, u tellgħu l-arka tal-Mulej, Alla ta’ Iżrael, fil-post li jien ħejjejt għaliha.

¹³Billi l-ewwel darba ma kontux intom, il-Mulej, Alla tagħna, ħabat għalina, għax ma konniex fittixnieh kif inhu ordnat.”

¹⁴U l-qassisin u l-Leviti tqaddsu, biex itellgħu l-arka tal-Mulej, Alla ta’ Iżrael.

¹⁵U l-Leviti ġarrew l-arka ta’ Alla bil-lasti fuq spallejhom, kif kien ordna Mosè skont il-kelma tal-Mulej.

¹⁶U David ordna lill-kapijiet tal-Leviti li jqassmu ’l ħuthom, il-mużiċisti bl-istrumenti tad-daqq - arpi, ċetri, ċnieċel - u jgħollu u jsemmgħu leħinhom għoli b’sinjal ta’ ferħ.

¹⁷U l-Leviti għażlu lil Ħeman bin Ġoel, u minn ħutu lil Asaf bin Barakija; u minn ulied Merari, ħuthom, lil Etan bin Kusaja,

¹⁸u magħhom ħuthom tat-tieni grad: Żakkarija, Ġagħsijel, Semiramot, Ġeħijel, Għunni, Elijab, Benaja, Magħxija, Mattitija, Elifleħu, u Mikneja, u Għobededom u Ġegħijel, il-purtinara.

¹⁹U l-kantanti, Ħeman, Asaf u Etan kellhom idoqqu ċ-ċnieċel tal-bronż iżarżru.

²⁰Żakkarija, Għażijel, Semiramot, Ġeħijel, Għunni, Elijab, Magħxija u Benaja kellhom idoqqu l-arpi b’leħen għoli[7];

²¹u Mattitija, Elifleħu, Mikneja, Għobededom, Ġegħijel u Għażażija, kellhom idoqqu ċ-ċetri b’leħen baxx, biex isostnu l-vuċi.

²²U Kenanija, kap tal-Leviti fil-kant, kellu jiddirieġi l-kant għax kien jifhem.

²³U Barakija u Elkana kellhom ikunu purtinara tal-arka.

²⁴Il-qassisin Sebanija, Ġosafat, Netanjel, Għamasaj, Żakkarija, Benaja u Eligħeżer, kellhom idoqqu t-trombi quddiem l-arka ta’ Alla. U Għobededom u Ġeħijja kienu purtinara tal-arka.

²⁵U ġara li David, u x-xjuħ ta’ Iżrael, u l-kapijiet tal-eluf marru jtellgħu l-arka tal-patt tal-Mulej minn dar Għobededom bil-ferħ.

²⁶U ġara li billi Alla għen lil-Leviti, li kienu jġorru l-arka tal-patt tal-Mulej, offrew b’sagrifiċċju seba’ għoġiela u seba’ mtaten.

²⁷U David kien liebes mantar tal-għażel fin, u wkoll il-Leviti li kienu jġorru l-arka, il-kantanti, u Kenanija, il-kap li kien jiddirieġi l-kant. David kellu fuqu l-efod tal-kittien.

²⁸Hekk Iżrael kollu wasslu l-arka tal-patt tal-Mulej b’għajat ta’ ferħ u d-daqq tat-trombi, u ċ-ċnieċel u l-platti; u daqqew ukoll l-arpi u ċ-ċetri bil-qawwa kollha.

²⁹U ġara li hi u dieħla l-arka tal-patt tal-Mulej fil-belt ta’ David, Mikal, bint Sawl, ittawlet mit-tieqa u lemħet is-sultan David jaqbeż u jiżfen, u stmerrietu f’qalbha.