Read Maltese Bible with DC – IL-BIBBJA IL-KOTBA MQADDSA 1 KRONAKI 19 Bible Online

1 KRONAKI 19 - Maltese Bible with DC – IL-BIBBJA IL-KOTBA MQADDSA bible

1 KRONAKI 19

¹Ġara li wara dan miet Naħas, is-sultan ta’ wlied Għammon, u daħal isaltan floku ibnu.

²U David qal: “Ħa rrodd lil Ħanun bin Naħas il-favur li missieru għamel miegħi.” U David bagħat messaġġiera jagħtuh l-għomor għall-mewt ta’ missieru. U l-qaddejja ta’ David marru fl-art ta’ wlied Għammon għand Ħanun biex jagħtuh l-għomor.

³U l-kapijiet ta’ wlied Għammon qalu lil Ħanun: “Taħseb int li David bagħat jagħtik l-għomor biex permezz tal-qaddejja tiegħu jagħti ġieħ lil missierek? Mhux biex jistħarrġu u jitkixxfu u jġarrfu l-pajjiż ġew il-qaddejja tiegħu għandek?

⁴U Ħanun qabad lill-qaddejja ta’ David, qaxxrilhom leħjithom u qatgħalhom nofs ilbieshom min-nofs sal-maqgħad u telaqhom.

⁵U marru u għarrfu lil David dwar dawn in-nies. U bagħat lil min jilqagħhom - għax dawn l-irġiel ħassew ruħhom avviliti għall-aħħar. U s-sultan qalilhom: “Oqogħdu f’Ġeriko sakemm tikbrilkom il-leħja, imbagħad erġgħu lura.”

⁶Meta wlied Għammon raw li kisruha ma’ David, Ħanun u wlied Għammon bagħtu elf talent tal-fidda biex jikru mingħand Aram-naħarajm, minn Aram-magħka u minn Soba karrijiet u rikkieba;

⁷u krew tnejn u tletin elf karru, u s-sultan ta’ Magħka u n-nies tiegħu; u ġew u waqqfu l-kamp quddiem Medeba. U wlied Għammon inġabru minn bliethom, u ġew għall-gwerra.

⁸U David sama’ b’dan, u bagħat lil Ġowab u l-eżerċtu kollu u n-nies qalbiena.

⁹U l-Għammonin ħarġu u ħadu posthom għall-ġlied fil-bieb tal-belt; u s-slaten li kienu ġew tqassmu għalihom weħidhom fir-raba’.

¹⁰Meta Ġowab ra li kien mhedded minn quddiem u minn wara għażel l-aħjar min-nies kollha ta’ Iżrael, u qassamhom quddiem l-Aramin.

¹¹U l-bqija tal-poplu ħallieh f’idejn ħuh Abisaj, u qassamhom quddiem l-Għammonin

¹²u qallu: “Jekk l-Aramin insibhom aqwa minni, int ejja għinni; u jekk int issib l-Għammonin aqwa minnek, niġi ngħinek jien.

¹³Agħmel il-ħila, u nissieltu għall-poplu tagħna u għall-ibliet ta’ Alla tagħna, imbagħad il-Mulej jagħmel dak li jidhirlu li hu tajjeb.”

¹⁴U Ġowab u n-nies li kellu miegħu resqu quddiem Aram biex jitqabdu; u dawn ħarbu minn quddiemu.

¹⁵U malli wlied Għammon raw li l-Aramin kienu ħarbu, ħarbu huma wkoll minn quddiem Abisaj, ħu Ġowab, u daħlu l-belt; Ġowab imbagħad mar u telaq lejn Ġerusalemm.

¹⁶Meta l-Aramin raw li marru minn taħt quddiem Iżrael, bagħtu messaġġiera u ħarġu lill-Aramin li kien hemm in-naħa l-oħra tax-xmara, u lil Sofak, il-kmandant tal-eżerċtu ta’ Ħadad-għeżer, miexi quddiemhom.

¹⁷David sar jaf b’dan u ġama’ lil Iżrael kollu, qasam il-Ġordan u ġie għalihom. U malli David qassam l-eżerċtu quddiem l-Aramin għat-taqbida, huma ħabtu għalih.

¹⁸U l-Aramin ħarbu minn quddiem Iżrael, David qatel mill-Aramin sebat elef rikkieb tal-karrijiet u erbgħin elf raġel tal-fanterija; lil Sofak, il-kmandant tal-eżerċtu, qatlu wkoll.

¹⁹Meta l-qaddejja ta’ Ħadad-għeżer raw li tkissru quddiem Iżrael, għamlu paċi ma’ David, u saru suġġetti għalih; u hekk l-Aramin ma ġewx aktar jgħinu lil ulied Għammon.