Read Maltese Bible with DC – IL-BIBBJA IL-KOTBA MQADDSA 1 KRONAKI 21 Bible Online

1 KRONAKI 21 - Maltese Bible with DC – IL-BIBBJA IL-KOTBA MQADDSA bible

1 KRONAKI 21

¹FU x-Xitan[8] qam kontra Iżrael, u xewwex lil David biex jgħodd lil Iżrael.

²U David qal lil Ġowab u lill-kbarat tal-poplu: Morru għoddu lil Iżrael minn Birsaba sa Dan, u ġibuli rapport biex inkun naf l-għadd tagħhom.

³U Ġowab qallu: “Ħa jkattar il-Mulej il-poplu tiegħu mitt darba daqs li hu. Jaqaw mhux sidi s-sultan, u mhumiex huma lkoll qaddejja ta’ sidi? Għala qiegħed ifittex dan sidi? Għala għandu jkun hu li jġib il-ħtija fuq Iżrael?”

⁴Imma l-kelma tas-sultan għelbet lil Ġowab; u Ġowab ħareġ u dar Iżrael kollu; imbagħad ġie Ġerusalemm.

⁵U Ġowab ta l-għadd taċ-ċensiment tal-poplu lil David, u Iżrael kollu kien ilaħħaq miljun u mitt elf raġel kapaċi jislet ix-xabla, u Ġuda erba’ mija u sebgħin elf raġel kapaċi jislet ix-xabla.

⁶Iżda lit-tribù ta’ Levi u lit-tribù ta’ Benjamin ma għaddhomx magħhom, għax l-ordni tas-sultan lil Ġowab ma għoġbux.

⁷Iżda Alla ma għoġbux dan u ħabat għal Iżrael.

⁸U David qal lil Alla: “Dnibt bil-kbir b’li għamilt; issa neħħi, nitolbok, dan il-ħażen tal-qaddej tiegħek, għax tbellaht bis-sħiħ.”

⁹U l-Mulej kellem lil Gad, il-veġġent ta’ David, u qallu:

¹⁰“Mur u kellem lil David u għidlu: Dan jgħid il-Mulej: ‘Tliet ħwejjeġ inqegħedlek quddiemek: agħżel waħda minnhom u jien nagħmilhielek’.”

¹¹U Gad mar għand David u qallu: “Dan jgħid il-Mulej; ‘Agħżel int;

¹²jew tliet snin għaks, jew tliet xhur maħrub minn quddiem l-għedewwa tiegħek bix-xabla tal-għedewwa tiġri warajk, jonkella tlitt ijiem taħt ix-xabla tal-Mulej - il-pesta fl-art, bl-anġlu tal-Mulej li jħarbat l-art kollha ta’ Iżrael. Issa aħsibha u għidli x’għandi ngħid lil min bagħatni.’ ”

¹³U wieġeb David lil Gad: “Inħossni f’diqa kbira: Ħalli naqa’ f’id il-Mulej, għax kbira hija l-ħniena tiegħu, imma ma rridx naqa’ f’idejn il-bniedem.”

¹⁴U l-Mulej bagħat il-pesta f’Iżrael. U mietu minn Iżrael sebgħin elf raġel.

¹⁵U Alla bagħat anġlu Ġerusalemm biex jeqridha; imma meta kien se jeqridha, il-Mulej ra, u sogħob bih mid-deni, u qal lill-anġlu l-qerried: “Biżżejjed! Żomm idek.” U l-anġlu tal-Mulej dak il-ħin kien ħdejn il-qiegħa ta’ Ornan il-Ġebusi.

¹⁶U David rafa’ għajnejh, u ra lill-anġlu tal-Mulej qiegħed bejn art u sema bix-xabla misluta f’idu, u mifruxa għal fuq Ġerusalemm. Imbagħad David u x-xjuħ, liebsa x-xkejjer, niżlu wiċċhom fl-art.

¹⁷U David qal lil Alla: “Jaqaw mhux jien kont li ordnajt l-għadd tal-poplu? Mhux jien li dnibt, u għamilt dan id-deni kollu? Imma dawn in-nagħaġ x’għamlu? Mulej Alla tiegħi, ħa tkun, nitolbok, idek fuqi u fuq dar missieri; imma tħallix din il-pesta fuq il-poplu tiegħek.”

¹⁸U l-anġlu tal-Mulej qal lil Gad biex jgħid lil David jitla’ u jtalla’ artal lill-Mulej fuq il-qiegħa ta’ Ornan il-Ġebusi.

¹⁹U David tala’ skont il-kelma ta’ Gad, li kien qallu f’isem il-Mulej.

²⁰U Ornan dar u ra l-anġlu, u l-erba’ wlied li kienu miegħu nħbew. Ornan kien qiegħed jidres il-qamħ.

²¹Malli David wasal ħdejh, Ornan ħares u ra lil David, u ħareġ mill-qiegħa u niżel wiċċu fl-art quddiem David.

²²U David qal lil Ornan: “Agħtini l-post tal-qiegħa biex nibni fih artal lill-Mulej. Agħtihuli b’kemm jiswa flus u hekk tieqaf il-pesta minn fost il-poplu.”

²³U Ornan wieġeb lil David: “Ħudu, ħa jagħmel sidi s-sultan dak li jidhirlu li hu l-aħjar. Ara, nagħti l-baqar għas-sagrifiċċju tal-ħruq, u x-xatba għall-ħatab, u l-qamħ għall-offerta; kollox nagħtik.”

²⁴U s-sultan David qal lil Ornan: “Le! Nixtrih b’kemm jiswa flus, għax ma noffrix dak li hu tiegħek lill-Mulej, u lanqas noffri sagrifiċċji bla ħlas.”

²⁵U David ta lil Ornan għall-post sitt mitt xekel tad-deheb[9] bl-użin.

²⁶U David bena hemm artal lill-Mulej, u offra sagrifiċċji tal-ħruq u sagrifiċċji tas-sliem; u sejjaħ lill-Mulej u dan wieġbu bin-nar mis-sema għal fuq l-artal tas-sagrifiċċju tal-ħruq.

²⁷Imbagħad il-Mulej ordna lill-anġlu, u dan daħħal ix-xabla f’għantha.

²⁸Dak iż-żmien, meta David ra li l-Mulej wieġbu fil-qiegħa ta’ Ornan il-Ġebusi, offra sagrifiċċji hemm.

²⁹It-tabernaklu li kien għamel Mosè fid-deżert u l-artal tas-sagrifiċċji tal-ħruq, dak iż-żmien kienu għadhom fuq l-għolja ta’ Gibgħon.

³⁰U David ma kienx jista’ jmur quddiemu jistaqsi lil Alla, għax kien jibża’ mix-xabla tal-anġlu tal-Mulej.