Read Maltese Bible with DC – IL-BIBBJA IL-KOTBA MQADDSA 1 KRONAKI 23 Bible Online

1 KRONAKI 23 - Maltese Bible with DC – IL-BIBBJA IL-KOTBA MQADDSA bible

1 KRONAKI 23

¹David, xiħ u mimli bl-għomor, għamel lil Salamun, ibnu, sultan fuq Iżrael.

²U ġabar il-prinċpijiet kollha ta’ Iżrael[13] u l-qassisin u l-Leviti.

³U għadd il-Leviti minn tletin sena ’l fuq; l-għadd tagħhom, wieħed wieħed, kien ta’ tmienja u tletin elf wieħed.

⁴Minn dawn erbgħa u għoxrin elf kellhom jieħdu ħsieb ix-xogħol ta’ dar il-Mulej; u sitt elef ikunu uffiċjali u mħallfin;

⁵erbat elef purtinara u erbat elef jagħtu tifħir lill-Mulej bl-istrumenti li kien għamel għat-tifħir.

⁶David imbagħad qassamhom f’taqsimiet skont ulied Levi: Gersun, Keħat u Merari.

⁷Mill-Gersunin kien hemm: Lagħdan u Simgħi.

⁸Ulied Lagħdan: Ġeħijel il-kap, Żetam, Ġoel, tlieta kollox.

⁹Ulied Simgħi: Selomot, Ħażijel, Ħaran, tlieta kollox. Dawn kienu l-kapijiet tal-familji ta’ Lagħdan.

¹⁰U wlied Simgħi kienu: Ġaħat, Żina, Ġegħus u Berigħa. Dawn kienu wlied Simgħi, erbgħa kollox.

¹¹U Ġaħat kien il-kap, u Żiża t-tieni, Ġegħus u Berija ma kellhomx ħafna tfal, għalhekk kienu magħdudin b’familja waħda għal xogħol wieħed.

¹²Ulied Keħat: Għamram, Isħar, Ħebron, Għużżijel, erbgħa kollox.

¹³Ulied Għamram: Aron u Mosè. Aron kien magħżul biex jikkonsagra l-aktar ħwejjeġ qaddisa, hu u wliedu, għal dejjem: jiġifieri jaħarqu l-inċens quddiem il-Mulej, li jservu quddiemu, u jbierku f’ismu għal dejjem.

¹⁴Mosè, il-bniedem ta’ Alla, uliedu kienu magħduda mat-tribù ta’ Levi.

¹⁵Ulied Mosè: Gersum u Eligħeżer.

¹⁶Ulied Gersum: Sebuwel, il-kap.

¹⁷U wlied Eligħeżer kienu Reħabija, il-kap; Eligħeżer ma kellux tfal aktar, imma wlied Reħabija kienu ħafna.

¹⁸Ulied Isħar: Selomit, il-kap.

¹⁹Ulied Ħebron: Ġerija, il-kap; Amarija, it-tieni; Ġaħsijel, it-tielet; Ġekamgħam, ir-raba’.

²⁰Ulied Għużżijel: Mika, il-kap; Issija, it-tieni.

²¹Ulied Merari: Maħli u Musi. Ulied Maħli, Elgħażar u Kis.

²²Elgħażar miet u ma kellux subien, imma bniet; u żżewġuhom ħuthom, ulied Kis.

²³Ulied Musi kienu Maħli, Għeder, u Ġeremot, tlieta kollox.

²⁴Dawn kienu wlied Levi skont il-familji ta’ missirijiethom, il-kapijiet tal-familji ta’ missirijiethom kif kienu magħduda, wieħed wieħed, skont isimhom. Kienu jagħmlu x-xogħol tas-servizz f’dar il-Mulej minn għoxrin sena ’l fuq.

²⁵Għax David qal: “Il-Mulej, Alla ta’ Iżrael, ta l-mistrieħ lill-poplu tiegħu, u hu għamel l-għamara tiegħu f’Ġerusalemm għal dejjem.

²⁶Għalhekk il-Leviti ma għandhomx għalfejn iġorru t-tabernaklu u t-tagħmir għas-servizz tiegħu.”

²⁷Għaliex skont l-aħħar kliem ta’ David, il-Leviti jingħaddu minn għoxrin sena ’l fuq.

²⁸Ix-xogħol tagħhom kien li jgħinu lil ulied Aron fis-servizz tad-dar tal-Mulej fil-btieħi, fil-kmamar, fit-tindif ta’ kulma hu kkonsagrat, u kull xogħol ieħor fis-servizz tad-dar ta’ Alla.

²⁹Kellhom jieħdu ħsieb il-ħobż tal-preżenza, kull ħami fit-taġen, l-offerta mħallta biż-żejt, u kull użin u kejl.

³⁰Kull filgħodu kellhom imorru jroddu ħajr u jfaħħru lill-Mulej, u hekk ukoll filgħaxija,

³¹u wkoll kull meta kienu jkunu offruti lill-Mulej is-sagrifiċċji tal-ħruq fis-Sibtijiet, fil-qamar ġdid u fil-festi, skont in-numru li jkun imisshom skont il-Liġi għal dejjem quddiem il-Mulej.

³²Kellhom jieħdu ħsieb is-servizz fit-tinda tal-laqgħa, is-servizz tal-ħwejjeġ sagri, u s-servizz ta’ wlied Aron, ħuthom fis-servizz ta’ dar il-Mulej.