Read Maltese Bible with DC – IL-BIBBJA IL-KOTBA MQADDSA 1 KRONAKI 9 Bible Online

1 KRONAKI 9 - Maltese Bible with DC – IL-BIBBJA IL-KOTBA MQADDSA bible

1 KRONAKI 9

¹L-Iżraelin kollha kienu mniżżlin f’arbli tar-razza u miktubin fi Ktieb is-Slaten ta’ Iżrael u ta’ Ġuda meta kienu tturufnati f’Babilonja minħabba l-infedeltà tagħhom.

²L-ewwel li ġew jgħammru f’artijiethom u fi bliethom kienu: Iżrael, il-qassisin, il-Leviti u l-qaddejja tat-tempju.

³F’Ġerusalemm kienu jgħammru xi wħud minn ulied Ġuda, minn ulied Benjamin, u minn ulied Efrajm u Manassi:

⁴Għutaj bin Għammiħud, bin Għomri, bin Imri, bin Bani, minn ulied Pereż bin Ġuda.

⁵U mis-Selanin: Għasaja l-kbir, u wliedu.

⁶U minn ulied Żeraħ: Ġegħuwel u ħuthom, sitt mija u disgħin.

⁷U minn ulied Benjamin: Sallu bin Mesullam, bin Ħodawija, bin Ħassenuwa,

⁸u Ibneja bin Ġeroħam, Ela bin Għużżi, bin Mikri, u Mesullam bin Sefatija, bin Regħwel, bin Ibnija,

⁹u ħuthom, skont il-ġenerazzjonijiet tagħhom, disa’ mija u sitta u ħamsin. Dawn kollha kienu kapijiet tal-familji ta’ missirijiethom, skont id-djar ta’ missirijiethom.

¹⁰Mill-qassisin kienu hemm: Ġedajja, Ġeħojarib, Ġakin,

¹¹u Għażarija bin Ħilkija, bin Mesullam, bin Sadok, bin Merajot, bin Aħitub, kap tat-tempju ta’ Alla.

¹²U Għadajja bin Ġeroħam, bin Pasħur, bin Malkija, u Magħsaj bin Għadijel, bin Ġaħżera, bin Mesullam, bin Mesillemit, bin Immer.

¹³U ħuthom, kapijiet ta’ djar missirijiethom, elf seba’ mija u sittin, nies qalbiena u ta’ ħila fis-servizz tad-dar ta’ Alla.

¹⁴U mil-Leviti: Semajja bin Ħassub, bin Għażrikam, bin Ħasabija minn ulied Merari;

¹⁵u Bakbakkar, Ħeres, Galal, u Mattanija bin Mika, bin Żikri, bin Asaf.

¹⁶U Għobadija bin Semajja, bin Galal, bin Ġedutun, u Berekija bin Asa, bin Elkana, li kien jgħammar fl-irħula tan-Netufin.

¹⁷Il-purtinara kienu: Sallum, Għakkub, Talmon, Aħiman, u ħuthom - Sallum kien il-kap.

¹⁸Għadhom sal-lum f’bieb is-sultan, in-naħa tal-Lvant. Dawn kienu l-purtinara tal-kamp ta’ wlied Levi.

¹⁹U Sallum bin Kore, Ebijasaf bin Koraħ, u ħutu mill-familja ta’ missieru, il-Koraħin, kienu jieħdu ħsieb ix-xogħol ta’ għassiesa tal-bieb tat-tinda, bħalma missirijiethom kienu l-għassiesa tad-dħul tal-kamp tal-Mulej.

²⁰U Fineħas bin Elgħażar kien il-kap fuqhom fl-imgħoddi - il-Mulej kien miegħu!

²¹Żakkarija bin Meslemija kien purtinar fid-dħul tat-tinda tal-laqgħa.

²²Dawn il-purtinara kollha, mitejn u tnax, kienu magħduda skont twelidhom fl-irħula tagħhom. David u Samwel, il-veġġent, kienu tawhom dan l-inkarigu tagħhom.

²³Huma u wliedhom kienu jieħdu ħsieb bwieb dar il-Mulej, f’bieb it-tinda, bħala għassiesa.

²⁴Il-purtinara kienu fuq erbat irjieħ: il-Lvant, il-Punent, it-Tramuntana u n-Nofsinhar.

²⁵U ħuthom, li kienu fl-irħula, kellhom jiġu minn żmien għal żmien għal sebat ijiem u joqogħdu magħhom.

²⁶L-erba’ purtinara ewlenin, li kienu Leviti, kienu dejjem fi dmirhom, għax kienu inkarigati mill-kmamar u t-teżor ta’ dar il-Mulej.

²⁷U kienu jgħammru madwar dar il-Mulej, għax huma kellhom iżommu l-għassa, u jiftħu kull filgħodu.

²⁸Xi wħud minnhom kellhom jieħdu ħsieb it-tagħmir tas-servizz; huma kellhom jgħoddu kollox kull meta joħorġuhom jew idaħħluhom.

²⁹Oħrajn fosthom kellhom jieħdu ħsieb it-tagħmir u l-ħwejjeġ imqaddsa, is-smid, l-inbid u ż-żejt, l-inċens u l-ħwawar.

³⁰Oħrajn minn ulied il-qassisin kellhom jieħdu ħsieb it-taħlita tal-ħwawar għall-fwieħa.

³¹U Mattitija mil-Leviti, it-tifel il-kbir ta’ Sallum il-Koraħi, kien inkarigat mill-għaġna tal-ftajjar.

³²U xi wħud minn ulied il-Keħatin, minn fost ħuthom, kienu jieħdu ħsieb il-ħobż tal-preżenza u jħejjuh minn Sibt għal Sibt.

³³Dawn imbagħad kienu l-kantanti, kapijiet tal-familji tal-Leviti, li kienu joqogħdu fil-kmamar tat-tempju. Kienu ħielsa minn kull xogħol ieħor, għax lejl u nhar kellhom dmirhom x’jaqdu.

³⁴Dawn kienu l-kapijiet tal-familji ta’ missirijiet il-Leviti, skont il-ġenerazzjonijiet; kienu l-kapijiet li jgħammru f’Ġerusalemm.

³⁵F’Gibgħon kien jgħammar Ġegħijel, missier Gibgħon; u martu kien jisimha Magħka.

³⁶U ibnu l-kbir kien Għabdon, u mbagħad Żur, Kis, Bagħal, Ner u Nadab;

³⁷u Gedor, Aħiju, Żakkarija u Miklot;

³⁸u Miklot wiled lil Simam; u dawn kienu jgħammru ma’ ħuthom biswithom f’Ġerusalemm.

³⁹U Ner wiled lil Kis, u Kis wiled lil Sawl, u Sawl wiled lil Ġonatan, u lil Malkisugħa, u lil Abinadab, u lil Esbagħal.

⁴⁰U bin Ġonatan kien Merib-bagħal, u Merib-bagħal wiled lil Mika.

⁴¹U wlied Mika kienu: Piton, Melek, Taħrigħa, u Aħaż.

⁴²U Aħaż wiled lil Ġagħra, u Ġagħra wiled lil Għalemet u lil Għażmawet, u lil Żimri; u Żimri wiled lil Mosa;

⁴³u Mosa wiled lil Bingħa, u Refajja kien ibnu, Elgħaxa ibnu, Asel ibnu.

⁴⁴U Asel kellu sitt subien, u dawn kien jisimhom: Għażrikam, ibnu l-kbir, Ismagħel, Segħarija, Għobadija, u Ħanan. Dawn kollha wlied Asel.