Read Maltese Bible with DC – IL-BIBBJA IL-KOTBA MQADDSA 2 KRONAKI 5 Bible Online

2 KRONAKI 5 - Maltese Bible with DC – IL-BIBBJA IL-KOTBA MQADDSA bible

2 KRONAKI 5

¹Meta ntemm ix-xogħol kollu li għamel Salamun għat-tempju tal-Mulej, ġieb Salamun l-offerti li kien għamel David missieru - il-fidda, id-deheb u l-ħwejjeġ l-oħra kollha - u qiegħed kollox fl-imħażen tat-tempju ta’ Alla.

²Salamun imbagħad laqqa’ flimkien f’Ġerusalemm ix-xjuħ ta’ Iżrael, u l-kapijiet tat-tribujiet, il-prinċpijiet tal-familji ta’ wlied Iżrael, biex l-arka tal-patt tal-Mulej itellgħuha mill-belt ta’ David, jiġifieri minn Sijon.

³Inġabru għalhekk madwar is-sultan l-irġiel kollha ta’ Iżrael fil-festa li taħbat fis-seba’ xahar.

⁴U kif ġew ix-xjuħ kollha ta’ Iżrael, il-Leviti refgħu l-arka.

⁵U tellgħu l-arka u wkoll it-tinda tal-laqgħa flimkien ma’ kull ħaġa mqaddsa, li kien hemm fit-tinda; tellgħuhom il-qassisin u l-Leviti.

⁶U s-sultan Salamun u l-ġemgħa kollha ta’ Iżrael, miġbura madwaru quddiem l-arka, offrew sagrifiċċji ta’ nagħaġ u baqar li ma kontx issib tarf tgħoddhom.

⁷Imbagħad il-qassisin wasslu l-arka tal-patt tal-Mulej f’postha fis-santwarju tat-tempju, jiġifieri fil-post il-qaddis, u qegħduha taħt il-ġwienaħ tal-kerubini,

⁸għax il-kerubini kellhom ġwenħajhom miftuħin fuq post l-arka, hekk li l-kerubini kienu jgħattu huma stess il-wiċċ tal-arka u l-lasti tagħha.

⁹Il-lasti kienu tant twal li rjushom kienu jidhru mill-post qaddis quddiem is-santwarju; imma ma kinux jidhru minn barra - u għadhom hemm sal-lum[5].

¹⁰Xejn ma kien hemm ġol-arka ħlief iż-żewġ twavel li kien qiegħed hemm Mosè meta kien Ħoreb; dawn kienu t-twavel tal-patt li bih il-Mulej intrabat ma’ wlied Iżrael meta ħarġu mill-Eġittu.

¹¹Ġara li l-qassisin ħarġu mill-post il-qaddis, wara li l-qassisin kollha li kien hemm tqaddsu bla ma taw kas tat-taqsimiet tagħhom;

¹²il-Leviti kantanti kollha, jiġifieri Asaf, Ħeman, Ġedutun, uliedhom u ħuthom, libsin l-għażel, kienu bilwieqfa n-naħa tal-Lvant tal-artal, bil-platti u l-arpi u ċ-ċetri, u magħhom mija u għoxrin qassis idoqqu t-trombi.

¹³U kif it-trumbettieri u l-kantanti kollha bdew isemmgħu ħoss wieħed flimkien biex isebbħu u jfaħħru l-Mulej, kif kienu jsemmgħu d-daqq tat-trumbetti u l-platti u l-istrumenti tad-daqq biex isebbħu l-Mulej “għax hu tajjeb, għax għal dejjem it-tjieba tiegħu,” ġara li t-tempju tal-Mulej imtela bi sħaba.

¹⁴U ma setgħux il-qassisin ikomplu s-servizz tagħhom minħabba s-sħaba, għax il-glorja tal-Mulej imliet id-dar ta’ Alla.