Read Maltese Bible with DC – IL-BIBBJA IL-KOTBA MQADDSA 2 KRONAKI 9 Bible Online

2 KRONAKI 9 - Maltese Bible with DC – IL-BIBBJA IL-KOTBA MQADDSA bible

2 KRONAKI 9

¹U semgħet is-sultana ta’ Saba, bil-fama ta’ Salamun, u ġiet biex iġġarrbu b’mistoqsijiet tqal f’Ġerusalemm, b’qatgħa ġmielha ta’ kbarat magħha, u b’iġmla mgħobbija bi ħwawar u ħafna deheb u ħaġar prezzjuż. U ġiet għand Salamun u qaltlu kulma kellha maħżun f’qalbha.

²U Salamun wieġeb għal kulma staqsietu: ma kien hemm xejn li ma kienx jista’ jgħidilha.

³U meta s-sultana ta’ Saba rat l-għerf kollu ta’ Salamun u d-dar li kien bena,

⁴u l-ikel tal-mejda tiegħu, il-kunsill ta’ madwaru, is-servizz tal-qaddejja u lbieshom, u l-kuppieri tiegħu u lbieshom, u s-sagrifiċċji tal-ħruq li kien joffri fit-tempju tal-Mulej, baqgħet miblugħa.

⁵U qalet lis-sultan: “Tassew kien minnu dak li smajt f’arti fuqek, u fuq għerfek;

⁶ma ridtx nemmen dawn il-ħwejjeġ qabel ma ġejt u rajt b’għajnejja. U ma kinux ħabbruli nofs il-kobor ta’ għerfek. Akbar inti mill-aħbar li smajt.

⁷Henjin in-nies tiegħek, henjin il-qaddejja tiegħek, li qegħdin miegħek u jisimgħu dejjem l-għerf tiegħek!

⁸Ikun imbierek il-Mulej, Alla tiegħek, li tgħaxxaq bik, u qiegħdek fuq it-tron tiegħu, b’sultan tal-Mulej, Alla tiegħek; għax Alla tiegħek ħabb lil Iżrael, u jrid iżommu ħaj għal dejjem, u għamlek sultan fuqhom biex tagħmel il-ħaqq u l-ġustizzja.”

⁹Imbagħad tat lis-sultan mija u għoxrin talent deheb, u kotra kbira ta’ ħwawar u ħaġar prezzjuż; u qatt ma kien hemm kotra ta’ ħwawar daqs dik li tat is-sultana ta’ Saba lis-sultan Salamun.

¹⁰Il-qaddejja wkoll ta’ Ħuram, mal-qaddejja ta’ Salamun, li kienu jġibu d-deheb minn Ofir, ġiebu injam tas-sandal u ħaġar prezzjuż.

¹¹U mill-injam tas-sandal is-sultan għamel taraġ għad-dar tal-Mulej, u għad-dar tas-sultan, u kitarri u arpi għall-kantanti. U qatt ħadd qabel ma kien ra bħalhom fl-art ta’ Ġuda.

¹²U s-sultan Salamun ta lis-sultana ta’ Saba kulma kienet tixtieq u talbitu, aktar milli kienet ġiebet hi lis-sultan, u reġgħet marret lejn artha, hija u l-qaddejja tagħha.

¹³U d-deheb li kien idaħħal kull sena Salamun kien ilaħħaq sitt mija u sitta u sittin talent deheb,

¹⁴barra dak li kienu jġibulu n-neguzjanti u l-bejjiegħa; u s-slaten kollha tal-Għarabja u l-gvernaturi tal-pajjiż kienu jġibu wkoll deheb u fidda lil Salamun.

¹⁵U s-sultan Salamun għamel ukoll mitejn tarka tad-deheb battut - u kull waħda ħadet sitt mitt xekel deheb battut -

¹⁶u tliet mitt tarka żgħira tad-deheb battut, li kull waħda ħadet tliet mitt xekel deheb, u qegħedhom is-sultan f’Dar il-Foresta tal-Libanu.

¹⁷U s-sultan għamel tron kbir tal-avorju u ksieh b’deheb mill-ifjen.

¹⁸U t-tron kellu sitt tarġiet u mirfes tad-deheb imwaħħlin miegħu; u żewġ dirgħajn wieħed fuq kull naħa tal-maqgħad, u żewġ iljuni ħdejn id-dirgħajn;

¹⁹u tnax-il ljun fuq is-sitt tarġiet, wieħed f’kull tarf ta’ tarġa, ’l hemm u ’l hawn; ħaġa bħal din qatt ma kienet saret, f’ebda saltna.

²⁰U l-koppiet li kien jixrob minnhom is-sultan Salamun kienu kollha tad-deheb, u hekk ukoll kienu tad-deheb fin il-koppiet tad-dar tal-Foresta tal-Libanu. Xejn ma kien hemm tal-fidda, għax xejn ma kienu jqisuha l-fidda fi żmien Salamun.

²¹Għax l-iġfien tas-sultan kienu jmorru Tarsis mal-qaddejja ta’ Ħuram; darba kull tliet snin l-iġfien ta’ Tarsis kienu jerġgħu lura u jġibu deheb u fidda, avorju, xadini u paguni.

²²U s-slaten tal-art għaddiehom ilkoll is-sultan Salamun fl-għana u fl-għerf.

²³U s-slaten kollha tal-art kienu jfittxu wiċċ Salamun biex jisimgħu għerfu li Alla żejjinlu moħħu bih.

²⁴U kulħadd kien iġiblu l-offerti tiegħu: oġġetti tal-fidda u oġġetti tad-deheb, ilbies, armi u ħwawar, u żwiemel u bgħula, ta’ kull sena.

²⁵U kellu Salamun erbat elef stalla għaż-żwiemel u għall-karrijiet, u tnax-il elf rikkieb; u qassamhom fl-ibliet tal-karrijiet u f’Ġerusalemm madwar is-sultan.

²⁶U hu kien jaħkem fuq is-slaten kollha mix-xmara[10] sal-art tal-Filistin u l-fruntieri tal-Eġittu.

²⁷U l-fidda li kien hemm f’Ġerusalemm kattarha bħall-ġebel, u l-injam taċ-ċedru għamlu bħall-injam tat-tin selvaġġ li jikber fil-wita.

²⁸U kienu joħorġu ż-żwiemel għal Salamun minn Musri u mill-artijiet kollha.

²⁹U l-bqija tal-ġrajja ta’ Salamun, mill-ewwel sal-aħħar, huma miktuba fil-Ġrajja ta’ Natan il-Profeta, fil-Profeziji ta’ Aħija s-Siluni, u fid-Dehra ta’ Għiddu l-Veġġent dwar Ġerobogħam bin Nebat.

³⁰U Salamun saltan f’Ġerusalemm fuq Iżrael kollu għal erbgħin sena.

³¹U Salamun strieħ ma’ missirijietu, u difnuh fil-belt ta’ David missieru; u floku beda jsaltan Reħobogħam.