Read Maltese Bible with DC – IL-BIBBJA IL-KOTBA MQADDSA ESDRA 10 Bible Online

ESDRA 10 - Maltese Bible with DC – IL-BIBBJA IL-KOTBA MQADDSA bible

ESDRA 10

¹Xħin Esdra kien qiegħed jitlob u jistqarr dnubiet il-poplu b’wiċċu fl-art jibki quddiem it-tempju ta’ Alla, inġabret madwaru ġemgħa kbira ta’ Iżraelin, irġiel, nisa u tfal, ilkoll jibku kemm jifilħu.

²Imbagħad Sekanija bin Ġeħijel, mill-familja ta’ Għelam, qal lil Esdra: “Aħna konna ttradejna lil Alla tagħna, għax iżżewwiġna nisa barranin minn ulied in-nies tal-art, imma minkejja dan għad hemm tama għal Iżrael.

³Nagħmlu issa patt ma’ Alla tagħna, u nkeċċu n-nisa barranin kollha u ’l uliedhom skont ma twissina int, sinjur, u dawk li jitriegħdu quddiem dak li Alla tagħna kkmanda. Isir kollox skont kif inhu miktub fil-Liġi.

⁴Qum, għax din hi biċċa tiegħek; aħna nkunu miegħek. Agħmel il-qalb u agħmel xi ħaġa.”

⁵Esdra mbagħad qam, u ġiegħel lill-kapijiet tal-qassisin, lil-Leviti u lil Iżrael kollu, jaħilfulu li jagħmlu skont ma kien intqal. U huma ħalfulu.

⁶Imbagħad Esdra qam minn quddiem it-tempju ta’ Alla, u telaq lejn il-kamra ta’ Ġoħanan bin Eljasib[14], u għadda l-lejl hemmhekk. Imma ma missx ikel jew xorb, għax sewwed qalbu ħafna minħabba t-tradiment ta’ dawk li kienu ġew lura mill-eżilju.

⁷Mela, il-mexxejja tal-poplu għamlu sejħa f’Ġuda u Ġerusalemm biex jinġabru f’Ġerusalemm dawk kollha li kienu ġew lura mill-eżilju,

⁸u wissew li jekk xi ħadd ma jmurx fi żmien tlitt ijiem ġidu kienu jeħduhulu u hu kien jitkeċċa ’l barra mill-komunità ta’ dawk li ġew lura mill-eżilju.

⁹Għalhekk, fi żmien tlitt ijiem l-irġiel kollha ta’ Ġuda u Benjamin inġabru Ġerusalemm; dan kien fl-għoxrin tad-disa’ xahar[15]. Imbagħad il-poplu kollu nġabar fil-misraħ quddiem it-tempju ta’ Alla, u kulħadd kien qiegħed jirtogħod minħabba dak li kien qiegħed jiġri, u minħabba x-xita li kienet nieżla.

¹⁰U Esdra, il-qassis, qam u qalilhom: “Intom kontu infidili u żżewwiġtu nisa barranin, u hekk komplejtu żidtu mad-dnubiet ta’ Iżrael.

¹¹Imma issa, roddu ħajr lill-Mulej, Alla ta’ missirijietkom, u agħmlu r-rieda tiegħu, infirdu min-nisa tal-art u min-nisa barranin tagħkom.”

¹²U weġbitu l-ġemgħa kollha b’leħen għoli: “Hekk hu, nagħmlu kif qed tgħidilna.

¹³Imma hawn folla kbira hawnhekk, u billi hu żmien ix-xita ma nifilħux noqogħdu barra. Dan mhuwiex xogħol ta’ ġurnata jew tnejn, għax f’din il-biċċa konna ħafna li żbaljajna.

¹⁴Ħa joqogħdu l-mexxejja tagħna minflok il-ġemgħa kollha. Kull min, imbagħad, mill-ibliet tagħna żżewweġ mara barranija, jiġi fi żmien stabbilit flimkien max-xjuħ u l-imħallfin ta’ kull belt, sakemm inkunu reġġajna lura minn fuqna l-għadab ta’ Alla għalina minħabba dak li għamilna.”

¹⁵Ġonatan bin Għaxajel u Ġaħżija bin Tikwa biss ma qablux ma’ dan, u Mesullam u Sabtaj, il-Levita, żammew magħhom.

¹⁶Imma dawk li kienu ġew mill-eżilju laqgħu li jagħmlu kif kien intqal. Esdra, il-qassis, għażel għalhekk xi wħud li kienu jiġu l-kapijiet ta’ djar missirijiethom, u ’l kull wieħed minnhom sejjaħlu b’ismu. Fl-ewwel tal-għaxar xahar qagħdu bilqiegħda biex jistħarrġu dak li kien ġara,

¹⁷u temmew jistħarrġu l-irġiel li kienu żżewġu nisa barranin fl-ewwel tal-ewwel xahar[16].

¹⁸Instab li minn fost il-qassisin kien hemm uħud li kienu żżewġu nisa barranin. Fost ulied Ġożwè bin Ġosadak u ħutu kien hemm Magħxija, Eligħeżer, Ġarib, u Gedalija.

¹⁹Imma dawn taw il-kelma tagħhom li jibagħtu n-nisa tagħhom; u għax kienu ħatja offrew muntun mill-merħla tagħhom għal dnubiethom.

²⁰Fost ulied Immer kien hemm Ħanani u Żebadija.

²¹Fost ulied Ħarim kien hemm Magħxija, Elija, Semajja, Ġeħijel, u Għużżija;

²²u fost ulied Pasħur kien hemm Elijugħenaj, Magħxija, Ismagħel, Netanjel, Ġożabad, u Elgħaxa.

²³Fost il-Leviti kien hemm Ġożabad, Simgħi, Kelaja (jiġifieri Kelita), Petaħija, Ġuda, u Eligħeżer.

²⁴Fost il-kantanti kien hemm Eljasib, u fost il-purtinara tat-tempju kien hemm Sallum, Telem, u Uri.

²⁵Minn Iżrael, fost ulied Pargħos kien hemm Ramija, Iżżija, Malkija, Mijjamin, Elgħażar, Malkija, u Benaja.

²⁶Fost ulied Għelam kien hemm Mattanija, Żakkarija, Ġeħijel, Għabdi, Ġeremot, u Elija.

²⁷Fost ulied Żattu kien hemm Elijugħenaj, Eljasib, Mattanija, Ġeremot, Żabad, u Għażiża.

²⁸Fost ulied Bebaj kien hemm Ġeħoħanan, Ħananija, Żabbaj, u Għattaj.

²⁹Fost ulied Bani kien hemm Mesullam, Malluk, Għadaja, Ġasub, Sijal, u Ġeremot.

³⁰Fost ulied Paħat-mowab kien hemm Għadna, Kelal, Benaja, Magħxija, Mattanija, Besalel, Binnuwi, u Manassi.

³¹Fost ulied Ħarim kien hemm Eligħeżer, Issija, Malkija, Semajja, Simgħon,

³²Benjamin, Malluk, u Semarija.

³³Fost ulied Ħasum kien hemm Mattenaj, Mattatta, Żabad, Elifelet, Ġeremaj, Manassi, u Simgħi.

³⁴Fost ulied Bani kien hemm Magħdaj, Għamram, u Uwel,

³⁵Benajja, Bedija, Keluħi,

³⁶Wanija, Meremot, Eljasib,

³⁷Mattanija, Mattenaj, u Ġagħsu.

³⁸Fost ulied Binnuwi kien hemm Simgħi,

³⁹Selemija, Natan, Għadajja,

⁴⁰Maknadbaj, Sasaj, Saraj,

⁴¹Għażarel, Selemija, Semarija,

⁴²Sallum, Amarija, u Ġużeppi.

⁴³Fost ulied Nebu kien hemm Ġegħijel, Mattitija, Żabad, Żebina, Ġaddaj, Ġoel, Benaja.

⁴⁴Dawn kollha kienu żżewġu nisa barranin[17], imma keċċewhom bit-tfal tagħhom b’kollox.