Read Maltese Bible with DC – IL-BIBBJA IL-KOTBA MQADDSA ESDRA 3 Bible Online

ESDRA 3 - Maltese Bible with DC – IL-BIBBJA IL-KOTBA MQADDSA bible

ESDRA 3

¹Ulied Iżrael kienu fl-ibliet tagħhom, imma meta wasal is-seba’ xahar[5] iltaqgħu lkoll Ġerusalemm,

²u qamu Ġożwè bin Ġosadak u ħutu l-qassisin, u Żerubbabel bin Sijaltijel u ħutu, u bnew l-artal ta’ Alla ta’ Iżrael biex joffru fuqu sagrifiċċji tal-ħruq skont kif hemm miktub fil-liġi ta’ Mosè, il-bniedem ta’ Alla.

³Għalkemm kienu jibżgħu mill-ġnus tal-artijiet ta’ madwarhom, waqqfu l-artal fuq is-sisien li kellu qabel, u offrew fuqu bhejjem għall-ħruq b’sagrifiċċju lill-Mulej filgħodu u filgħaxija.

⁴U għamlu l-festa tal-Għerejjex skont kif inhu miktub. Minn jum għal ieħor, kienu jaħarqu bhejjem sħaħ b’sagrifiċċju; l-għadd tas-sagrifiċċji kien dak preskritt għal kull jum mil-Liġi.

⁵Wara dan offrew sagrifiċċji ma jaqtgħu xejn, sagrifiċċji ta’ nhar il-qamar ġdid u sagrifiċċji taż-żminijiet qaddisa tal-Mulej. Kien hemm ukoll min, minn rajh, offra sagrifiċċju lill-Mulej.

⁶Mill-ewwel jum tas-seba’ xahar bdew joffru bhejjem għall-ħruq b’sagrifiċċju lill-Mulej, imma s-sisien tat-tempju kienu għadhom ma tqegħdux.

⁷Imbagħad taw il-flus lill-bennejja u lill-mastrudaxxi. Taw ukoll ikel, xorb u żejt lin-nies ta’ Tir u Sidon, biex iġibu bil-baħar injam taċ-ċedru mil-Libanu sa Ġaffa skont il-permess li kien tahom Ċiru, sultan tal-Persja.

⁸Fit-tieni xahar tat-tieni sena minn mindu kienu ġew f’dar Alla f’Ġerusalemm, Żerubbabel bin Sijaltijel, Ġożwè bin Ġosadak, il-bqija ta’ ħuthom il-qassisin, il-Leviti, u dawk kollha li kienu ġew Ġerusalemm mill-eżilju, bdew ix-xogħol, u qabbdu l-Leviti minn għoxrin sena ’l fuq biex jieħdu ħsieb ix-xogħol fuq it-tempju tal-Mulej.

⁹U qamu flimkien Ġożwè u wliedu u ħutu, Kadmijel u wliedu, ulied Ġuda, ulied Ħenadad u wliedhom u ħuthom il-Leviti, biex imexxu l-ħaddiema fil-bini tat-tempju ta’ Alla.

¹⁰Meta l-bennejja qiegħdu s-sisien tat-tempju tal-Mulej, il-qassisin, libsin l-ilbies sagru, resqu bit-trombi, u l-Leviti, ulied Asaf, resqu biċ-ċimbali, biex ifaħħru lill-Mulej skont l-ordnijiet ta’ David, sultan ta’ Iżrael.

¹¹U kantaw għanjiet ta’ tifħir u ta’ radd il-ħajr lill-Mulej “għax hu tajjeb, għax għal dejjem it-tjieba tiegħu” għal Iżrael. U l-poplu kollu għajjat għajta kbira ta’ tifħir lill-Mulej, għax kienu tqiegħdu s-sisien tat-tempju tal-Mulej.

¹²Ħafna mill-qassisin, mil-Leviti, u mill-kapijiet tad-djar ta’ missirijiethom u x-xjuħ, li kienu raw it-tempju li kien hemm qabel, bkew b’leħen għoli meta tqiegħdu s-sisien il-ġodda tat-tempju tal-Mulej; imma ħafna oħrajn għajtu għajjat kbir ta’ ferħ.

¹³Għalhekk ħadd ma sata’ jagħraf l-għajjat ta’ ferħ mill-għajjat ta’ biki tal-poplu; il-poplu kien qiegħed jgħajjat għajjat kbir, u leħnu kien jinstama’ mill-bogħod.