Read Maltese Bible with DC – IL-BIBBJA IL-KOTBA MQADDSA ESDRA 6 Bible Online

ESDRA 6 - Maltese Bible with DC – IL-BIBBJA IL-KOTBA MQADDSA bible

ESDRA 6

¹Imbagħad, fuq ordni tas-sultan Darju, fittxew fl-arkivji fejn jintrefgħu d-dokumenti fil-Babilonja.

²U sabu romblu f’Ekbatana, il-fortizza li hemm fil-provinċja tal-Medi; fih kien hemm miktub hekk: “B’tifkira

³“Fl-ewwel sena tas-saltna tiegħu s-sultan Ċiru ħareġ proklama fuq it-tempju ta’ Alla f’Ġerusalemm: ‘It-tempju għandu jerġa’ jinbena bħala post fejn isiru sagrifiċċji u jinġiebu vittmi għall-ħruq. L-għoli tiegħu jkun sittin driegħ u l-wisa’ sittin driegħ

⁴bi tliet filati ġebel kbir u filata injam. L-ispejjeż tiegħu jitħallsu mit-teżor tas-sultan.

⁵Barra minn hekk, jingħataw lura l-oġġetti tad-deheb u tal-fidda tat-tempju ta’ Alla li Nabukodonosor kien ħareġ mit-tempju ta’ Ġerusalemm u ġarr miegħu lejn Babilonja. Dawn jittieħdu fit-tempju ta’ Ġerusalemm, u kull oġġett jitqiegħed lura f’postu. Għandkom tqiegħdu kollox fit-tempju ta’ Alla.’

⁶“Issa int, Tattenaj, gvernatur tal-inħawi tan-naħa l-oħra tal-Ewfrat, int, Setar-bożnaj, u sħabkom l-uffiċjali tal-inħawi tan-naħa l-oħra tal-Ewfrat: żommu ruħkom ’il bogħod minn hemm.

⁷Ħallu x-xogħol fuq dan it-tempju ta’ Alla jibqa’ miexi; ħallu l-gvernatur u l-kapijiet tal-Lhud jibnu dan it-tempju ta’ Alla fil-post li kellu qabel.

⁸U nordna b’digriet: Dan hu li għandkom tagħmlu għall-kapijiet tal-Lhud għall-bini ta’ dan it-tempju ta’ Alla: l-ispejjeż għandhom jitħallsu lil dawn in-nies bla waqfien mit-taxxi tan-naħa l-oħra tal-Ewfrat, li huma proprjetà tas-sultan.

⁹U dak kollu li hu meħtieġ għas-sagrifiċċji lil Alla tas-smewwiet - għoġiela, imtaten, ħrief, qamħ, melħ, inbid, u żejt - għandu jibqa’ jingħata lilhom bla waqfien minn jum għal ieħor skont ma jitolbu l-qassisin ta’ Ġerusalemm.

¹⁰Hekk, dawn joffru sagrifiċċji li jogħġbu lil Alla tas-smewwiet, u jitolbu għas-sultan, u għal uliedu biex Alla jagħtihom ħajja twila.

¹¹U nordna wkoll b’digriet li, jekk xi ħadd ibiddel din l-ordni għandhom idendluh ma’ arblu li jkunu qalgħu mid-dar tiegħu stess u jagħmlu miżbla minn daru.

¹²Jalla dak Alla li għażel dak il-post biex ismu jgħammar fih, jeqred lil kull sultan jew poplu li jerfa’ idejh u jbiddel jew jeqred dan it-tempju ta’ Alla f’Ġerusalemm. Jien, Darju, nordna dan b’digriet. Ħa jkun obdut kollu kemm hu.”

¹³Imbagħad Tattenaj, il-gvernatur tal-inħawi tan-naħa l-oħra tal-Ewfrat, Setar-bożnaj, u sħabhom, għamlu kulma kien bagħat jgħidilhom is-sultan Darju.

¹⁴Il-kapijiet tal-Lhud komplew jibnu u jmexxu x-xogħol ’il quddiem imħeġġin mill-profeta Ħaggaj u mill-profeta Żakkarija bin Għiddu. U lestew il-bini kif ordnalhom Alla ta’ Iżrael, u kif kienu ordnawlhom Ċiru, u Darju, u Artasersi, slaten tal-Persja.

¹⁵Dan it-tempju lestewh fit-tlieta tax-xahar ta’ Adar, fis-sitt sena tas-saltna tas-sultan Darju.

¹⁶U wlied Iżrael, il-qassisin, il-Leviti, u l-bqija ta’ dawk li kienu ġew lura mill-eżilju, kollhom ferħana għamlu l-festa tal-konsagrazzjoni ta’ dan it-tempju.

¹⁷U għall-konsagrazzjoni ta’ dan it-tempju offrew b’sagrifiċċju mitt gendus, mitejn muntun, erba’ mitt ħaruf; u għal dnubiet Iżrael kollu offrew tnax-il gidi skont kemm kienu t-tribujiet ta’ Iżrael.

¹⁸Imbagħad qassmu l-qassisin skont it-taqsimiet tagħhom u l-Leviti fil-ġemgħat tagħhom għas-servizz ta’ Alla f’Ġerusalemm, kif inhu miktub fil-Liġi ta’ Mosè.

¹⁹Dawk li ġew lura mill-eżilju għamlu l-festa tal-Għid fl-erbatax tal-ewwel xahar.

²⁰Il-qassisin u l-Leviti ssaffew flimkien, u għax kienu safja setgħu joqtlu l-ħaruf tal-Għid għal dawk kollha li kienu ġew lura mill-eżilju u għal ħuthom il-qassisin, u għalihom stess.

²¹Imbagħad kielu minnu wlied Iżrael li kienu ġew lura mill-Eżilju, u dawk kollha li kienu nqatgħu mit-tinġis tan-nies tal-art, biex ifittxu lill-Mulej, Alla ta’ Iżrael.

²²U kollhom ferħana għamlu l-festa tal-Ażżmi għal sebat ijiem, għax il-Mulej kien imliehom bil-ferħ u dawwar lejhom qalb is-sultan tal-Assirja[10], li għenhom fil-bini tat-tempju ta’ Alla, Alla ta’ Iżrael.