Read Maltese Bible with DC – IL-BIBBJA IL-KOTBA MQADDSA ESDRA 7 Bible Online

ESDRA 7 - Maltese Bible with DC – IL-BIBBJA IL-KOTBA MQADDSA bible

ESDRA 7

¹Wara dawn il-ġrajja, meta kien qiegħed isaltan Artasersi, sultan tal-Persja, kien hemm wieħed jismu Esdra li kien jiġi bin Xeraja, bin Għażarija, bin Ħilkija,

²bin Sallum, bin Sadok, bin Aħitub,

³bin Amarija, bin Għażarija, bin Merajot,

⁴bin Żeraħija, bin Għużżi, bin Bukki,

⁵bin Abisugħa, bin Fineħas, bin Elgħażar, bin Aron, il-qassis il-kbir.

⁶Dan Esdra tala’ minn Babilonja[11]; kien skriba jaf tajjeb il-Liġi ta’ Mosè li kienet ġiet mogħtija mill-Mulej, Alla ta’ Iżrael. Billi id il-Mulej kienet fuqu, is-sultan kien jagħtih kulma kien jitolbu.

⁷Fis-seba’ sena mindu beda jsaltan Artasersi telgħu Ġerusalemm xi wħud minn ulied Iżrael, xi qassisin, xi Leviti, xi kantanti, xi wħud mill-purtinara tat-tempju u xi lsiera tat-tempju.

⁸Esdra ġie Ġerusalemm fil-ħames xahar tas-seba’ sena mindu kien ilu jsaltan Artasersi.

⁹Kien qatagħha li jitlaq minn Babilonja fil-bidu tal-ewwel xahar, u wasal imbagħad fil-bidu tal-ħames xahar Ġerusalemm għax l-id ħanina ta’ Alla kienet fuqu.

¹⁰Esdra kien ingħata minn qalbu għall-istudju tal-Liġi tal-Mulej, għall-osservanza tagħha, u għat-tagħlim tad-digrieti u l-preċetti tagħha lil Iżrael.

¹¹Esdra kien skriba jaf sewwa l-kliem tal-kmandamenti tal-Mulej u tal-liġijiet tiegħu għal Iżrael. Din hija kopja tal-ittra tas-sultan Artasersi lil Esdra, il-qassis u l-iskriba, imgħallem tal-kmandamenti tal-Mulej u l-preċetti tiegħu għal Iżrael:

¹²“Artasersi, sultan tas-slaten, lil Esdra, qassis u skriba tal-Liġi ta’ Alla tas-smewwiet: sliem sħiħ!

¹³“Nordna b’digriet li jekk xi ħadd fis-saltna tiegħi mill-poplu ta’ Iżrael, mill-qassisin tiegħu, mil-Leviti tiegħu, juri xewqtu li jmur Ġerusalemm miegħek, ħa jmur.

¹⁴Jien qiegħed nibagħtek minn ħdejja flimkien ma’ seba’ kunsillieri tiegħi biex, skont il-Liġi ta’ Alla tiegħek li għandek f’idek, tara fiex inhuma l-Lhud u fiex inhi Ġerusalemm.

¹⁵Qiegħed nibagħtek ukoll biex tieħu miegħek il-fidda u d-deheb, li jien qiegħed noffri flimkien mal-kunsillieri tiegħi minn rajna lil Alla ta’ Iżrael, li joqgħod f’Ġerusalemm,

¹⁶u biex tieħu miegħek ukoll il-fidda u d-deheb li tista’ ssib fil-provinċja kollha ta’ Babilonja flimkien mal-offerti li l-poplu u l-qassisin joffru minn rajhom għat-tempju ta’ Alla f’Ġerusalemm.

¹⁷Ħu ħsieb ixtri b’dawn il-flus għoġiela, imtaten, ħrief, u offerti ta’ ikel u xorb, biex toffrihom fuq l-artal fit-tempju ta’ Alla tagħkom f’Ġerusalemm.

¹⁸Bil-bqija tal-fidda u tad-deheb, agħmlu dak li jidhrilkom li hu tajjeb, int u ħutek, skont kif jogħġob lil Alla tagħkom.

¹⁹U l-oġġetti li jagħtuk għas-servizz fit-tempju ta’ Alla tagħkom, qegħedhom kollha quddiem Alla f’Ġerusalemm.

²⁰U l-bqija tal-ħwejjeġ meħtieġa għat-tempju ta’ Alla tiegħek li int tħossok li għandek tagħti, oħroġhom mit-teżor tas-sultan.

²¹“Jien, Artasersi, is-sultan, nordna b’digriet lil dawk li jiġbru għat-teżor in-naħa l-oħra tal-Ewfrat: Kulma jitlobkom Esdra, il-qassis u skriba tal-Liġi ta’ Alla tas-smewwiet, għandkom tagħtuhulu bla tnikkir:

²²sa mitt talent tal-fidda, sa mitt kor qamħ, sa mitt batt inbid, sa mitt batt żejt, u melħ bla qjies.

²³Kulma jordna Alla tas-smewwiet għandu jsir sewwa għat-tempju ta’ Alla tas-smewwiet, li ma jmurx jagħdab għas-saltna tas-sultan u ta’ wliedu.

²⁴Għandkom tkunu tafu wkoll li mhuwiex permess li tgħabbu b’taxxi, tribut u ħaraġ, lil xi qassis, Levita, kantant, lil xi ħadd mill-purtinara tat-tempju, lil xi lsir tat-tempju, jew lil xi ħadd minn dawk li jaħdmu fit-tempju.

²⁵“U int, Esdra, aħtar maġistrati u mħallfin skont l-Għerf ta’ Alla[12] tiegħek li għandek f’idek, biex jagħmlu l-ħaqq għall-poplu kollu li hemm in-naħa l-oħra tal-Ewfrat, għal kull min jaf il-Liġi ta’ Alla tiegħek. Dawk li ma jafuhiex għallimhielhom.

²⁶Jekk xi ħadd ma joqgħodx għal-Liġi ta’ Alla tiegħek, li hi l-Liġi tas-sultan ukoll, isir ħaqq sewwa minnu, kemm jekk jaqtgħuhielu għall-mewt, kemm jekk jaqtgħuhielu li għandu jitkeċċa ’l barra, jew li għandu jitteħidlu ġidu, jew li għandu jiġi mitfugħ il-ħabs.”

²⁷Ikun imbierek il-Mulej, Alla ta’ missirijietna, li qanqal lis-sultan biex isebbaħ it-tempju tal-Mulej f’Ġerusalemm,

²⁸li wera t-tjieba tiegħu miegħi biex nogħġob lis-sultan, lill-kunsillieri tiegħu, u lill-ogħla uffiċjali tas-saltna. Jien għamilt il-qalb, għax id il-Mulej, Alla tiegħi, kienet fuqi, u ġbart madwari xi kapijiet ta’ Iżrael biex intellagħhom miegħi Ġerusalemm.