Read Maltese Bible with DC – IL-BIBBJA IL-KOTBA MQADDSA ESDRA 9 Bible Online

ESDRA 9 - Maltese Bible with DC – IL-BIBBJA IL-KOTBA MQADDSA bible

ESDRA 9

¹Meta temmew jagħmlu dan kollu, resqu fuqi l-mexxejja u qaluli: “Il-poplu ta’ Iżrael, il-qassisin, u l-Leviti, mhumiex maqtugħin min-nies ta’ artijiet barranin bil-ħwejjeġ moqżieża tagħhom; mhumiex maqtugħin mill-Kangħanin, mill-Ħittin, mill-Periżżin, mill-Ġebusin, mill-Għammonin, mill-Mowabin, mill-Eġizzjani, u mill-Amurrin.

²Għax ħadu mill-bniet tagħhom għalihom u għal uliedhom biex iżżewġuhom, u hekk in-nisel qaddis tħallat man-nies tal-art. F’dan it-tradiment, il-mexxejja u l-kapijiet kienu minn ta’ quddiem.”

³Kif smajt dal-kliem, ċarratt ħwejġi u l-mantar tiegħi, qattajt xagħri u l-leħja tiegħi, u qgħadt bilqiegħda inkwetat ħafna.

⁴Minħabba dan it-tradiment, ingħaqdu miegħi mbagħad dawk kollha li jirrispettaw il-kelma ta’ Alla ta’ Iżrael. U jien bqajt bilqiegħda inkwetat ħafna sas-sagrifiċċju ta’ filgħaxija.

⁵Xħin kienu qed joffru s-sagrifiċċju ta’ filgħaxija, jien qomt mill-għajb tiegħi, u bi ħwejġi u l-mantar tiegħi mċarrtin inżilt għarkupptejja, u ftaħt idejja lejn il-Mulej, Alla tiegħi,

⁶u għedt: “Alla tiegħi, jien inħossni nistħi, u wiċċi ma jagħtinix li nerfa’ ħarsti lejk, Alla tiegħi. Għax dnubietna tant kotru li ninsabu mgħaddsin sa rasna fihom, u ħtijietna għolew m’ogħla s-smewwiet.

⁷Minn żmien missirijietna sal-lum waqajna fi ħtijiet kbar u minħabba fi dnubietna, aħna, is-slaten tagħna, u l-qassisin tagħna, ġejna mogħtija f’idejn slaten barranin. Dawn darbuna bix-xabla, ħaduna fl-eżilju, ħadulna ġidna, u ġejna fl-għajb li qegħdin fih illum.

⁸Imma issa, il-Mulej, Alla tagħna, tana grazzja għal ftit taż-żmien, billi ħallielna fdal u tana fuqiex nafdaw, jiġifieri dan il-post qaddis. B’hekk Alla tagħna ried iferraħna u jgħajjixna għal ftit fl-eżilju tagħna.

⁹Għax aħna lsiera; imma Alla tagħna ma nsiniex fl-eżilju tagħna, għax wera l-ħniena tiegħu magħna quddiem is-slaten tal-Persja, meta tana mill-ġdid il-ħajja ħa nerġgħu ntellgħu t-tempju ta’ Alla tagħna, u nerġgħu nibnuh mill-ħerba tiegħu u b’hekk ikollna kenn f’Ġuda u Ġerusalemm.

¹⁰Imma issa, x’nistgħu ngħidu, o Alla tagħna, jekk wara dan kollu nsejna l-kmandamenti tiegħek?

¹¹Għax inti kkmandajtna, permezz tal-qaddejja tiegħek il-profeti, u għedtilna ‘Intom sejrin biex tieħdu taħt idejkom art imniġġsa b’tinġis il-ġnus ta’ artijiet barranin; il-ħwejjeġ moqżieża tagħhom imlewha bi ħmieġhom minn tarf għal ieħor.

¹²Issa, mela, il-bniet tagħkom tagħtuhomx lis-subien tagħhom biex jiżżewġuhom, u l-bniet tagħhom teħduhomx għas-subien tagħkom. Tfittxu qatt is-sliem u l-ġid magħhom, u hekk tkunu b’saħħitkom, tieklu mill-ġid tal-art, u tħalluha ’l uliedkom b’wirt għal dejjem.’

¹³Wara dak kollu li għadda minn fuqna minħabba fl-għemejjel ħżiena tagħna u fi dnubietna kbar - għalkemm int, Alla tagħna, ikkunsidrajt ħtijietna inqas milli tabilħaqq kienu u ħallejtilna dan il-fdal -

¹⁴u se nerġgħu forsi niksru l-kmandamenti tiegħek u nitħalltu biż-żwieġ mal-ġnus li jagħmlu ħwejjeġ moqżieża? Ma jkunx forsi l-għadab tiegħek għalina hekk kbir li teqridna, u ma jeħlisha ħadd u ma jibqa’ l-ebda fdal?

¹⁵Mulej, Alla ta’ Iżrael, int ġust, għax fadal aħna li ħlisnieha llum. Ara, aħna nistqarru dnubietna quddiemek, għax minħabba fihom ħadd ma jibqa’ wieqaf quddiemek.”