Read Maltese Bible with DC – IL-BIBBJA IL-KOTBA MQADDSA NEĦEMIJA 1 Bible Online

NEĦEMIJA 1 - Maltese Bible with DC – IL-BIBBJA IL-KOTBA MQADDSA bible

NEĦEMIJA 1

¹Il-ġrajja ta’ Neħemija bin Ħakalija. Fix-xahar ta’ Kaslew tas-sena għoxrin[1], meta jien kont fiċ-ċittadella ta’ Susa,

²wasal għandi Ħanani, wieħed minn ħuti, flimkien ma’ xi nies ta’ Ġuda. Jien staqsejthom għal-Lhud li kienu ħelsuha, għal dawk li kien fadal wara l-eżilju, u għal Ġerusalemm.

³U huma weġbuni: “Dawk li kien fadal wara l-eżilju hemmhekk, fil-provinċja, jinsabu ħażin ħafna u fil-għajb. Is-swar ta’ Ġerusalemm għadhom imħarbta, u l-bibien tagħhom maħruqa bin-nar.”

⁴Kif smajt dan il-kliem, inxħett bilqiegħda nibki, u nitniehed għal jiem sħaħ, u bqajt sajjem nitlob lil Alla tas-smewwiet.

⁵Jien tlabt: “O Mulej, Alla tas-smewwiet, Int Alla kbir u tal-biża’, Int iżżomm il-patt u turi ħniena ma’ dawk li jħobbuk u jħarsu l-preċetti tiegħek.

⁶Agħti widen u żomm għajnejk miftuħa ħa tisma’ t-talba li jien, il-qaddej tiegħek, qiegħed nagħmillek illum, billejl u binhar, għal ulied Iżrael, il-qaddejja tiegħek. Nistqarr id-dnubiet li għamlu wlied Iżrael kontrik; jien ukoll u dar missieri dnibna.

⁷Imxejna ħażin ħafna miegħek, u ma ħarisniex il-preċetti, il-kmandamenti, u d-digrieti li tajt lil Mosè, il-qaddej tiegħek.

⁸Ftakar fil-kelma li kont tajt lil Mosè, il-qaddej tiegħek, meta għedtlu: ‘Jekk intom tiksruhom, jien inxerridkom fost il-ġnus,

⁹imma jekk terġgħu lura lejja u tħarsu l-preċetti tiegħi, u tagħmlu skont ma jgħidulkom, imqar jekk l-imxerrdin tagħkom ikunu fi truf is-smewwiet, jien niġborhom u nġibhom fil-post li għażilt biex jgħammar ismi fih.’

¹⁰Dawn huma l-qaddejja tiegħek u l-poplu tiegħek, li int fdejt bil-qawwa kbira tiegħek u bi driegħek setgħan.

¹¹Nitolbok, Mulej, agħti widen għat-talba tal-qaddej tiegħek u għat-talba tal-qaddejja tiegħek, li jixtiequ jagħtu ġieħ lil ismek. Ibgħat ir-risq fuq il-qaddej tiegħek illum, u agħtih li jingħoġob minn dan ir-raġel.” Issa jien kont il-kuppier tas-sultan[2].