Read Maltese Bible with DC – IL-BIBBJA IL-KOTBA MQADDSA NEĦEMIJA 13 Bible Online

NEĦEMIJA 13 - Maltese Bible with DC – IL-BIBBJA IL-KOTBA MQADDSA bible

NEĦEMIJA 13

¹Dakinhar inqraw quddiem il-poplu siltiet mill-Ktieb ta’ Mosè u nstab miktub fih li l-Għammonin u l-Mowabin ma għandhom qatt jidħlu fil-ġemgħa tal-Mulej.

²Għax dawn ma laqgħux ’l ulied Iżrael b’ikel u xorb, imma krew kontra tagħhom lil Balgħam biex jisħethom. Madankollu, Alla tagħna dawwar is-saħta f’barka.

³Meta semgħu l-Liġi, bagħtu ’l barra minn Iżrael il-barranin kollha.

⁴Qabel dan kien hemm Eljasib, il-qassis li kien jieħu ħsieb il-kmamar tat-tempju, u dan kellu wieħed jiġi minnu jismu Tobija.

⁵U Eljasib irranġalu kamra kbira fejn qabel kienu jintrefgħu l-offerti, l-inċens, l-oġġetti sagri, l-għexur tal-qamħ, inbid u żejt, li skont il-Liġi kienu jmissu lil-Leviti, lill-kantanti, u lill-purtinara, u fejn qabel kienu jintrefgħu l-offerti tal-qassisin.

⁶Meta kien qiegħed jiġri dan kollu jien ma kontx Ġerusalemm, għax kont mort lura għand is-sultan fit-tnejn u tletin sena ta’ Artasersi, sultan ta’ Babilonja, u kien wara xi żmien li jien tlabt li nħalli lis-sultan.

⁷Imbagħad ġejt Ġerusalemm[11], u fhimt li dak li Eljasib kien għamel għal Tobija kien ħażin, jiġifieri li rranġalu kamra fit-tempju ta’ Alla.

⁸Deherli li dan kien ħażin ħafna u tfajt ’il barra mill-kamra l-għamara kollha ta’ Tobija,

⁹u ordnajt li jiġu ppurifikati l-kmamar. Imbagħad ħadt lura hemm l-oġġetti tat-tempju ta’ Alla, l-offerti, u l-inċens.

¹⁰Sirt naf ukoll li ma kinux qed jingħataw offerti lil-Leviti, u għalhekk il-Leviti u l-kantanti, li soltu kienu jagħmlu s-servizz fit-tempju, telqu kollha lejn l-għelieqi tagħhom.

¹¹Ħadtha mal-uffiċjali u għedtilhom: “Għala ġie mitluq it-tempju ta’ Alla?” Imbagħad ġbarthom, u qegħedthom lura f’posthom.

¹²U l-Lhud kollha ġiebu l-għexur tal-qamħ, tal-inbid, u taż-żejt fit-teżor.

¹³Biex jieħdu ħsieb it-teżor jien ħtart lil Selemija, il-qassis, lil Sadok, l-iskriba, lil Padajah, wieħed mil-Leviti, u biex jgħinhom lil Ħanan bin Żakkur, bin Mattanija. Dawn kienu miżmumin bħala nies onesti. Xogħolhom kien li jqassmu lil ħuthom dak li kien imisshom.

¹⁴Minħabba f’dan kollu, ftakar fija, o Alla tiegħi, u la tħassarx l-opra tajba li għamilt għat-tempju ta’ Alla tiegħi u għas-servizz tiegħu.

¹⁵F’dawk il-jiem rajt f’Ġuda min jagħsar l-inbid b’saqajh is-Sibt, min iġorr il-qatet, min jgħabbi l-ħmir, u saħansitra min iġib Ġerusalemm is-Sibt inbid, għeneb, tin, u kull tagħbija oħra. Dakinhar li biegħu l-affarijiet tal-ikel jien widdibthom bl-aħrax.

¹⁶Kien hemm xi nies minn Tir joqogħdu Ġerusalemm, u kienu jġibu ħut u kull xorta ta’ oġġetti għall-bejgħ, u kienu jbigħuhom nhar ta’ Sibt lil-Lhud f’Ġerusalemm.

¹⁷Jien għalhekk ħadtha mal-kbarat ta’ Ġuda, u għedtilhom; “X’inhu dan il-ħażen li qegħdin tagħmlu li tipprofanaw is-Sibt?

¹⁸Jaqaw mhux hekk għamlu missirijietkom u Alla tagħna ġieb din il-ħsara kollha fuqna u fuq din il-belt? U intom issa qegħdin iżżidu l-għadab tiegħu għal Iżrael billi tipprofanaw is-Sibt?”

¹⁹Ġara mbagħad li, kif waqa’ d-dlam fuq id-daħliet ta’ Ġerusalemm qabel is-Sibt, jien tajt ordni li jissakkru l-bibien, u ordnajt li ma jinfetħux sa ma jkun għadda s-Sibt. Lil xi qaddejja tiegħi jien qegħedthom fuq id-daħliet biex ma jidħlux tagħbijiet nhar ta’ Sibt.

²⁰U n-neguzjanti u dawk li kienu jbigħu kull xorta ta’ oġġetti għaddew il-lejl barra Ġerusalemm għal darba tnejn.

²¹Jien imbagħad ħadtha magħhom u għedtilhom: “Għala qegħdin tgħaddu l-lejl taħt is-swar? Jekk terġgħu darb’oħra, naħbat għalikom!” U minn dakinhar ma ġewx iktar nhar ta’ Sibt.

²²Imbagħad għedt lil-Leviti biex jippurifikaw ruħhom u jmorru jgħassu l-bibien ħa jqaddsu jum is-Sibt. Dan ukoll, Alla tiegħi, ibqa’ ftakarhuli, u ħenn għalija skont il-ħniena kbira tiegħek.

²³F’dawk il-jiem rajt ukoll li l-Lhud kienu żżewġu nisa minn Asdod, minn Għammon, u minn Mowab,

²⁴u li nofs uliedhom subien kienu jitkellmu bl-ilsien ta’ Asdod, u ma kinux jafu jitkellmu bil-Lhudi. Kienu jitkellmu l-ilsien ta’ xi poplu jew ieħor.

²⁵Jien għalhekk ħadtha magħhom u sħetthom, ħbatt għal xi wħud minnhom, u qlajtilhom xagħarhom. Jien imbagħad ġagħalthom jaħilfu quddiem Alla li ma jżewġux il-bniet tagħhom ma’ subien barranin, u li ma jiħdux nisa għalihom u għal uliedhom subien minn fost il-bniet tal-barranin, u għedtilhom:

²⁶“Ma kienx forsi minħabba fihom li dineb Salamun, sultan ta’ Iżrael? Għalkemm ma kienx hemm sultan bħalu fost ħafna ġnus, kien maħbub minn Alla tiegħu, u Alla kien qiegħdu sultan fuq Iżrael kollu, in-nisa barranin ġagħluh jidneb.

²⁷Taħsbu intom li aħna se nisimgħu minnkom, u nagħmlu dan il-ħażen kbir kollu, u nidinbu kontra Alla tagħna billi niżżewġu nisa barranin?”

²⁸Wieħed minn ulied Ġojada bin Eljasib, il-Qassis il-Kbir, kien iżżewweġ lil bint Sanballat il-Ħoroni; jien għalhekk keċċejtu minn miegħi.

²⁹Ftakar fihom, Alla tiegħi, talli pprofonaw is-saċerdozju u l-platt tal-qassisin u l-Leviti.

³⁰Jien għalhekk naddafthom mill-barranin kollha. U qassamt ix-xogħol lill-qassisin u l-Leviti; kull wieħed minnhom kellu x-xogħol tiegħu x’jagħmel.

³¹Ħsibt ukoll għall-offerta tal-injam li tingħata fi żminijiet fissi, u dwar il-frott tal-bikri. Ftakar fija, Alla tiegħi, biex ikunli ta’ ġid.