Read Maltese Bible with DC – IL-BIBBJA IL-KOTBA MQADDSA NEĦEMIJA 2 Bible Online

NEĦEMIJA 2 - Maltese Bible with DC – IL-BIBBJA IL-KOTBA MQADDSA bible

NEĦEMIJA 2

¹Fix-xahar ta’ Nisan tas-sena għoxrin tas-saltna ta’ Artasersi, is-sultan kellu l-inbid quddiemu, u jien ħadt l-inbid u newwilthulu. Qatt ma kont wiċċi mqarras quddiemu.

²U hu qalli: “Għaliex int wiċċek imqarras? Marid m’intix: għalhekk dan tiegħek mhuwiex ħlief swied il-qalb.” Imbagħad jien bżajt ħafna;

³imma weġibt lis-sultan; “Sultan, jalla tgħix għal dejjem! Għax m’għandix inqarras wiċċi meta l-belt fejn hemm l-oqbra ta’ missirijieti hi ħerba waħda u l-bibien tagħha maħruqa bin-nar?”

⁴Qalli mbagħad is-sultan: “X’inhu li qiegħed titlobni?” Jien tlabt lil Alla tas-smewwiet,

⁵u weġibt lis-sultan: “Jekk is-sultan jidhirlu li hi ħaġa sewwa u jekk il-qaddej tiegħek jogħġob lis-sultan, nixtieq li tibgħatni f’art Ġuda, fil-belt fejn hemm l-oqbra ta’ missirijieti, ħalli nerġa’ nibniha.”

⁶Imbagħad, bis-sultana bilqiegħda maġenbu, is-sultan staqsieni: “Kemm iddum il-mawra tiegħek? Kemm iddum ma terġa’ lura?” U meta jien tajtu ż-żmien, is-sultan għoġbu jibgħatni.

⁷Jien għalhekk għedt lis-sultan: “Jekk is-sultan jogħġbu, ħa jagħtini ittri għall-gvernaturi tan-naħa l-oħra tal-Ewfrat, biex iħalluni ngħaddi min-naħa għall-oħra sa ma nasal f’art Ġuda.

⁸Ħa jagħtini wkoll ittra għal Asaf, li jieħu ħsieb il-foresti tas-sultan, biex jagħtini injam għat-travi fid-daħliet tal-fortizza li tħares it-tempju, tas-swar tal-belt, u tad-dar fejn se noqgħod.” U s-sultan tani dan kollu, għax id Alla tiegħi kienet ħanina miegħi.

⁹Imbagħad mort għand il-gvernaturi tan-naħa l-oħra tal-Ewfrat, u tajthom l-ittri tas-sultan. Is-sultan bagħat miegħi fizzjali tal-eżerċtu u kavallerija.

¹⁰Mela jisimgħu b’dan Sanballat il-Ħoroni u Tobija, l-uffiċjal Għammoni[3], u qabdithom diqa kbira għax kien ġie wieħed li ried jagħmel il-ġid lil ulied Iżrael.

¹¹Mort imbagħad Ġerusalemm, u meta kont ili hemm tlitt ijiem

¹²qomt billejl ma’ ftit irġiel oħra, imma ma wrejt lil ħadd x’kien nebbaħni nagħmel Alla tiegħi għal Ġerusalemm. Lanqas bhima ma kelli miegħi, ħlief dik li kont riekeb fuqha.

¹³Ħriġt billejl minn Bieb il-Wied għan-naħa ta’ Għajn id-Dragun u lejn Bieb id-Demel, u flejt is-swar imħarbta ta’ Ġerusalemm u l-bibien tagħha maħruqa bin-nar.

¹⁴Qsamt imbagħad għal Bieb il-Għajn u lejn il-Menqgħa tas-sultan, u hemm ma kienx hemm post fejn setgħet taqsam il-bhima li kelli taħti.

¹⁵Tlajt il-wied billejl u flejt is-swar; imbagħad ġejt mill-ġdid f’Bieb il-Wied, u rġajt lura.

¹⁶L-uffiċjali Persjani ma ntebħux fejn kont mort u x’kont qed nagħmel; u jien s’issa kont għadni m’għarraft b’xejn lil-Lhud, lill-qassisin, lill-kbarat, lill-uffiċjali Persjani, u ’l-oħrajn li kellhom jagħmlu din il-biċċa xogħol miegħi.

¹⁷Imbagħad għedtilhom: “Qegħdin taraw kemm hi ħażina l-qagħda li ninsabu fiha: Ġerusalemm hi ħerba waħda u l-bibien tagħha huma maħruqa bin-nar. Ejjew nibnu s-swar ta’ Ġerusalemm[4], u ma nibqgħux iktar f’dan l-għajb.”

¹⁸Meta mbagħad għedtilhom kemm kienet ħanina id Alla tiegħi miegħi, u x’kien qalli s-sultan, qaluli: “Inqumu u nibnuhom!” U huma għamlu l-qalb għal din il-biċċa xogħol ta’ fejda.

¹⁹Meta semgħu Sanballat il-Ħoroni, Tobija, l-uffiċjal Għammoni, u Gesem, l-Għarbi, bdew jiddieħku bina u jżebilħuna. U qalulna: “X’inhu dan li qed tagħmlu? Jaqaw se tqumu kontra s-sultan?”

²⁰Imma jien bgħatt ngħidilhom: “Hu Alla tas-smewwiet li jibagħtilna r-riżq, għax aħna qaddejja tiegħu. Aħna nqumu ħa nibnu, imma intom f’Ġerusalemm ma jkollkomx sehem[5], dritt, jew tifkira.”