Read Maltese Bible with DC – IL-BIBBJA IL-KOTBA MQADDSA NEĦEMIJA 3 Bible Online

NEĦEMIJA 3 - Maltese Bible with DC – IL-BIBBJA IL-KOTBA MQADDSA bible

NEĦEMIJA 3

¹Imbagħad qamu Eljasib, il-qassis il-kbir, u ħutu l-qassisin u bnew Bieb in-Nagħaġ, u qegħdulu t-travi u l-bibien tiegħu. Bnew ukoll sat-Torri tal-Mija u sat-Torri ta’ Ħananel.

²Lil hinn minnhom bnew in-nies ta’ Ġeriko, u lil hinn minn dawn bena Żakkur bin Imri.

³Bieb il-Ħut bnewh ulied Ħassena; qegħdulu t-travi u l-bibien tiegħu, u l-lukketti u l-istaneg tiegħu.

⁴Lil hinn minnhom sewwieh Meremot bin Urija, bin Kos. Lil hinn minn dan sewwieh Mesullam bin Berekija, bin Meseżabel. Lil hinn minn dawn sewwieh Sadok bin Bagħna.

⁵Lil hinn minn dan sewwewh in-nies ta’ Tekugħa, imma l-kbarat tagħhom ma meddewx għonqhom għax-xogħol tal-Mulej tagħhom.

⁶Il-Bieb il-Qadim sewwewh Ġojada bin Paseħa u Mesullam bin Besodija; qiegħdu t-travi u l-bibien tiegħu, u l-lukketti u l-istaneg.

⁷Lil hinn minnhom għamlu tiswijiet Melatija il-Gibgħoni u Ġadon il-Meronoti, u nies minn Gibgħon u Misfa, li kienu jaqgħu taħt l-awtorità tal-Gvernatur tal-inħawi n-naħa l-oħra tal-Ewfrat.

⁸Lil hinn minnhom sewwieh Għużżijel bin Ħarħaja, wieħed minn dawk li jaħdmu d-deheb. Lil hinn minnu sewwieh Ħananija, wieħed minn dawk li jħalltu l-fwejjaħ. Hekk dawn bnew is-sur ta’ Ġerusalemm sal-Ħajt il-Wiesa’.

⁹Lil hinn minnhom sewwieh Refaja bin Ħur, il-kap ta’ nofs id-distrett ta’ Ġerusalemm.

¹⁰Ġedajja bin Ħarumaf sewwa lil hinn minnu, jiġifieri biswit id-dar tiegħu. Lil hinn minnu sewwieh Ħattus bin Ħasabnija.

¹¹Malkija bin Ħarim sewwa biċċa oħra flimkien ma’ Ħassub bin Paħat-mowab sat-Torri tal-Ifran.

¹²Lil hinn minnhom sewwieh Sallum bin Ħalloħes, kap ta’ nofs id-distrett ta’ Ġerusalemm, flimkien ma’ wliedu bniet.

¹³Bieb il-Wied sewwewh Ħanun u nies ta’ Żanuħa; dawn bnew id-daħla, qiegħdu l-bibien, il-lukketti, u l-istaneg tagħhom. Bnew ukoll tul ta’ elf driegħ fil-ħajt sa Bieb id-Demel.

¹⁴Bieb id-Demel sewwieh Malkija bin Rekab, il-kap tad-distrett ta’ Bet-ħakkerem; bnieh u qiegħed il-bibien bil-lukketti u l-istaneg tagħhom.

¹⁵Bieb il-Għajn sewwieh Sallum bin Kolħożi, kap tad-distrett ta’ Misfa; bena d-daħla u saqqafha, u qiegħed il-bibien bil-lukketti u l-istaneg tagħhom. Bena wkoll il-ħajt tal-Menqgħa ta’ Birket Ħassela ħdejn Ġnien is-Sultan sat-taraġ li jinżel mill-belt ta’ David.

¹⁶Lil hinn minnu Neħemija bin Għażbuk, kap ta’ nofs id-distrett ta’ Betsur, sewwa sa quddiem l-oqbra ta’ David, sa quddiem il-Menqgħa Għaxaja, u sa Dar il-Qalbenin.

¹⁷Warajh il-Leviti komplew it-tiswija: Reħum bin Bani. Lil hinn minnu sewwieh għad-distrett tiegħu Ħasabija, kap ta’ nofs id-distrett ta’ Kegħila.

¹⁸Lil hinn minnhom sewwewh ħuthom: Bawwaj Bin Ħenadad, kap ta’ nofs id-distrett ta’ Kegħila, sewwa biċċa;

¹⁹ħdejh Għeser bin Ġożwè, kap ta’ Misfa, sewwa biċċa oħra, minn biswit l-Għolja tal-Armerija fir-rokna;

²⁰ħdejh sewwa biċċa oħra Bàruk bin Żabbaj mir-rokna sad-daħla ta’ dar Eljasib, il-qassis il-kbir;

²¹u ħdejh sewwa biċċa oħra Meremot bin Urija, bin Ħakkos, mid-daħla ta’ dar Eljasib sat-tarf tagħha.

²²Lil hinn minn dan sewwewh il-qassisin li kienu joqogħdu fid-distrett.

²³Benjamin u Ħassub sewwew quddiem id-dar tagħhom. Lil hinn minnhom Għażarija bin Magħxija, bin Għananija, sewwa maġenb id-dar tiegħu.

²⁴Lil hinn minnu sewwa biċċa oħra Binnuwi bin Ħenadad, minn dar Għażarija sal-kantuniera sa ħdejn it-Torri.

²⁵Palal bin Użaj sewwa minn biswit il-kantuniera u t-Torri li hemm ħiereġ ’il barra mill-palazz ta’ fuq tas-sultan fil-wesgħa tal-ħabs. Lil hinn minnu sewwieh Pedaja bin Pargħos.

²⁶U l-ilsiera tat-tempju li kienu joqogħdu fuq l-Għofel sewwew minn biswit Bieb l-Ilma, in-naħa tal-Lvant u tat-torri, li hemm ħiereġ ’il barra.

²⁷Lil hinn minnu sewwew biċċa oħra n-nies ta’ Tekugħa, minn quddiem it-Torri l-Kbir li hemm ħiereġ ’il barra sal-ħajt tal-Għofel.

²⁸Fuq Bieb iż-Żwiemel sewwewh il-qassisin; kull wieħed minnhom sewwa quddiem id-dar tiegħu.

²⁹Lil hinn minnhom Sadok bin Immer sewwa quddiem id-dar tiegħu; u lil hinn minnu sewwieh Semajja bin Sekanija, l-għassies ta’ Bieb il-Lvant.

³⁰Lil hinn minnu sewwew biċċa oħra Ħananija bin Selemija u Ħanun, is-sitt iben ta’ Salaf. Lil hinn minn dawn Mesullam bin Berekija sewwa biswit il-kamra tiegħu.

³¹Lil hinn minnu Malkija, wieħed minn dawk li jaħdmu d-deheb, sewwa sa dar l-ilsiera tat-tempju u l-bejjiegħa, biswit Bieb l-Għassa, sal-għorfa tal-kantuniera.

³²U bejn l-għorfa tal-kantuniera u Bieb in-Nagħaġ sewwewh dawk li jaħdmu d-deheb u l-bejjiegħa.

³³Kif sama’ Sanballat li aħna konna qegħdin nibnu s-swar saħan u għadab mhux ftit; u qabad jiddieħek bil-Lhud.

³⁴Mela tkellem quddiem ħutu u l-eżerċtu tas-Samarija, u qal: “X’inhuma jagħmlu dawk il-Lhud bla saħħa? Jaqaw se jħalluhom jagħmlu dan? Jaqaw se joffru s-sagrifiċċji u jlestu kollox f’ġurnata? Jaqaw se jerġgħu jġibu lura minn gozz trab il-ġebel li ġie maħruq?”

³⁵Kien hemm maġenbu Tobija l-Għammoni, u dan qal: “Ħalluhom jibnu li jridu! Dak il-ħajt tal-ġebel biżżejjed jaħbat għalih volpi biex jagħmlu ħerba!”

³⁶Isma’, o Alla, kif qegħdin iwaqqgħuna għaċ-ċajt. Raġġa’ lura fuq rashom iż-żebliħ tagħhom, u agħmel li jkunu mwaqqgħin huma għaż-żebliħ f’art il-jasar.

³⁷Il-ħażen tagħhom taħbihx, u d-dnub tagħhom tħassrux minn quddiemek, għax huma offendewk quddiem dawk li kienu qegħdin jibnu.”

³⁸U aħna bqajna sejrin nibnu s-swar, u billi l-poplu kien kollu ħeġġa għax-xogħol, ma domniex ma tellajna l-ħitan kollha sa nofshom.