Read Maltese Bible with DC – IL-BIBBJA IL-KOTBA MQADDSA NEĦEMIJA 5 Bible Online

NEĦEMIJA 5 - Maltese Bible with DC – IL-BIBBJA IL-KOTBA MQADDSA bible

NEĦEMIJA 5

¹Kien hemm ħafna tgergir fost il-poplu, l-aktar fost in-nisa, kontra ħuthom il-Lhud.

²Kien hemm min kien jgħid: “Aħna tajna b’rahan lil uliedna, subien u bniet, ħa jagħtuna qamħ x’nieklu biex ngħixu.”

³Oħrajn kienu qegħdin jgħidu: “Ir-raba’ tagħna, l-għelieqi tad-dwieli tagħna, u d-djar tagħna, aħna tajniehom b’rahan biex jagħtuna qamħ fi żmien il-ġuħ.”

⁴Kien hemm ukoll min kien jgħid: “Aħna kellna nissellfu l-flus biex inħallsu t-taxxa tas-sultan fuq ir-raba’ tagħna u l-għelieqi tagħna.

⁵Jaqaw laħamna mhux bħal laħam ħutna? Uliedna mhux bħal uliedhom? Araw, se jkollna nitfgħu fil-jasar is-subien u l-bniet tagħna biex jaħdmu għal ħaddieħor! Xi wħud mill-bniet tagħna diġà mjassrin, u ma għandniex aktar jedd fuqhom, u r-raba’ tagħna, l-għelieqi tad-dwieli tagħna qegħdin f’idejn ħaddieħor.”

⁶Għadabt bl-ikrah meta smajt dan il-kliem, u dawn l-ilmenti.

⁷Tħassibt ħafna, imma mbagħad ċanfart lill-kapijiet u lill-uffiċjali u għedtilhom: “Kull wieħed minnkom qiegħed jitlob l-imgħax[6] minn fuq ħutu!” U laqqajt ġemgħa kbira kontra tagħhom.

⁸U għedtilhom: “Meta konna nistgħu, aħna dejjem fdejna ’l ħutna Lhud mibjugħa lill-ġnus, imma intom qegħdin tbigħu lil ħutkom biex ħaddieħor ibigħhom lura lilna.” U huma baqgħu siekta, u ma sabux xi jwieġbu.

⁹Għedtilhom ukoll: “Dak li qed tagħmlu mhuwiex sewwa! Jaqaw m’għandkomx timxu fil-biża’ ta’ Alla tagħna biex ma tiġux fil-għajb quddiem il-ġnus għedewwa tagħna?

¹⁰Jien ukoll, ħuti u l-qaddejja tiegħi, slifniehom flus u qamħ; imma issa ejjew inwaqqfu dan il-qligħ.

¹¹Roddulhom lura, nitlobkom, ir-raba’ tagħhom, l-għelieqi tad-dwieli u taż-żebbuġ tagħhom, u djarhom, u wieħed fil-mija tal-flus, tal-qamħ, u tal-inbid ġdid u ż-żejt ġdid, li għandkom tieħdu mingħandhom.”

¹²U huma weġbuni: “Irroddulhom lura, u ma nitolbuhom xejn lura. Nagħmlu kif għedtilna int.” Imbagħad sejjaħt il-qassisin, u ġagħalthom jaħilfu li jagħmlu hekk.

¹³U jien farfart il-bwiet tal-libsa tiegħi, u għedtilhom: “Hekk Alla għad ifarfar ’il barra minn daru u minn ġidu lil kull min ma jżommx kelmtu, u jkun hekk imfarfar u battal.” U l-ġemgħa kollha wieġbet: “Ammen.” U faħħret lill-Mulej. U l-poplu għamel skont ma kien wiegħed.

¹⁴Minn dakinhar li s-sultan ordnali li nkun il-gvernatur fl-art ta’ Ġuda, jiġifieri mis-sena għoxrin sas-sena tnejn u tletin tas-saltna ta’ Artasersi, għal tnax-il sena sħaħ, jien u ħuti ma kilniex mill-ikel li jmiss lill-gvernatur.

¹⁵Il-gvernaturi li kien hemm qabli, madankollu, kienu għabbew il-poplu b’piż tqil; kienu jieħdu kuljum mingħandu erbgħin xekel tal-fidda għall-ikel. Saħansitra l-ministri tagħhom kienu jgħakksu l-poplu. Imma jien m’għamiltx hekk, għax kont nibża’ minn Alla.

¹⁶Meta kien qiegħed isir ix-xogħol fuq is-swar, jien sewwejt magħhom u ma xtrajtx għelieqi. U l-qaddejja tiegħi kollha kienu jinġabru hemm biex jaħdmu.

¹⁷Il-Lhud u l-uffiċjali, b’kollox mija u ħamsin ruħ, u dawk li ġew għandna mingħand il-ġnus ta’ madwarna, kienu jieklu minn fuq il-mejda tiegħi.

¹⁸Kienu jlestuli kuljum għoġol, sitt nagħġiet, u xi tajr, u kull għaxart ijiem kien ikun hemm ħafna nbid ta’ kull xorta. Barra minn dan jien ma fittixtx li nieħu l-ikel li jmiss lill-gvernatur, għax il-poplu kien isibha bi tqila li jagħtih dan.

¹⁹Dak kollu li għamilt ma’ dan il-poplu, ibqa’ ftakru, Mulej, għall-ġid tiegħi.