Read Maltese Bible with DC – IL-BIBBJA IL-KOTBA MQADDSA NEĦEMIJA 9 Bible Online

NEĦEMIJA 9 - Maltese Bible with DC – IL-BIBBJA IL-KOTBA MQADDSA bible

NEĦEMIJA 9

¹Fl-erbgħa u għoxrin ta’ dak ix-xahar iltaqgħu ulied Iżrael lebsin l-ixkejjer u bit-trab fuq rashom biex jagħmlu sawma.

²U nisel Iżrael infired minn ulied il-barranin, u qamu u stqarrew dnubiethom u l-ħażen ta’ missirijiethom.

³Qamu bilwieqfa fejn kienu u qraw mill-Ktieb tal-Liġi tal-Mulej Alla tagħhom għal kwart ta’ jum, u għal tliet sigħat oħra stqarrew dnubiethom, u taw qima lill-Mulej Alla tagħhom.

⁴Telgħu fuq il-palk il-Leviti Ġożwè, Bani, Kadmijel, Sebanija, Bunni, Serebija u Kenani, u sejħu b’leħen għoli lill-Mulej, Alla tagħhom.

⁵U l-Leviti Ġożwè, Kadmijel, Bani, Ħasabnija, Serebija, Ħodija, Sebanija u Petaħija qalu: “Qumu u bierku lill-Mulej Alla tagħkom għal dejjem ta’ dejjem. Ħa jbierku fuq kull barka oħra, u tifħir ieħor l-isem glorjuż u għoli tiegħek.

⁶Int waħdek il-Mulej int għamilt is-smewwiet, is-smewwiet tas-smewwiet, u l-eżerċti kollha tagħhom, u l-art u kulma fiha, l-ibħra u kulma fihom. Int iżżommhom ħajja, lilek iqimu l-eżerċti tas-smewwiet.

⁷Int il-Mulej Alla, li għażilt lil Abram, ħriġtu minn Ur tal-Kaldin, u bdiltlu ismu f’Abraham,

⁸Sibtu fidil lejk u għamilt patt miegħu, li tagħti lin-nisel tiegħu, art il-Kangħanin, il-Ħittin, l-Amurrin, il-Periżżin, il-Ġebusin, u l-Girgasin. U Int żammejt kelmtek għax int ġust.

⁹“Int rajt il-miżerja ta’ missirijietna fl-Eġittu, u tajt widen għall-għajta tagħhom meta kienu ħdejn Baħar il-Qasab.

¹⁰U għamilt sinjali u għeġubijiet kontra l-Fargħun, il-qaddejja tiegħu kollha, u nies artu, għax int kont taf li kienu tkabbru ma’ missirijietna, u dakinhar għamilt għalik isem li għadu jissemma sal-lum.

¹¹U l-baħar fraqt quddiemhom, u f’mogħdija niexfa qasmu f’nofs ta’ baħar, imma lil dawk li kienu miexja wrajhom, fil-qiegħ niżżilthom, bħallikieku ġebla f’ilmiet qawwija.

¹²B’kolonna ta’ sħab mexxejthom matul il-jum, u b’kolonna ta’ nar matul il-lejl, biex idawlilhom it-triq li kellhom jgħaddu minnha.

¹³U int inżilt fuq il-muntanja tas-Sinaj, u tkellimt magħhom mis-smewwiet, u tajthom digrieti ġusti, liġijiet ta’ min jorbot fuqhom, u kmandamenti u preċetti tajbin.

¹⁴Qaddist is-Sibt u għarrafthom bih, u permezz ta’ Mosè l-qaddej tiegħek tajthom preċetti, kmandamenti, u liġi.

¹⁵Tajthom ħobż mis-sema biex jaqtgħu l-ġuħ, ħriġtilhom ilma mill-blata biex jaqtgħu l-għatx, u għedtilhom biex imorru jirtu l-art, li b’idejk merfugħa ħlift li tagħtihom.

¹⁶“Imma huma u missirijietna tkabbru u webbsu rashom, u ma tawx widen għall-preċetti tiegħek.

¹⁷Ma riedu jisimgħu b’xejn, u ma ftakrux fl-għeġubijiet li inti kont għamilt magħhom; u baqgħu rashom iebsa. Anzi waħħlu f’rashom li jerġgħu lura lejn il-jasar tagħhom fl-Eġittu. Imma int Alla taħfer, ħafif biex tħenn, bil-mod biex tagħdab, imma tħenn ħafna, għalhekk int ma tlaqthomx weħidhom.

¹⁸Saħansitra meta għamlu għoġol tal-metall imdewweb, u qalu: ‘Dan hu Alla tagħkom li ħariġkom mill-Eġittu,’ u għamlu dnubiet kbar.

¹⁹Int, fit-tjieba kbira tiegħek, ma tlaqthomx weħidhom fid-deżert; il-kolonna ta’ sħab ma warrbitx minn magħhom matul il-jum, imma baqgħet turihom it-triq, u l-kolonna tan-nar baqgħet iddawlilhom billejl it-triq li kienu mexjin fiha.

²⁰Biex jgħallimhom tajthom l-ispirtu tajjeb tiegħek, ma ċħadtilhomx li jieklu l-manna tiegħek, u tajthom ilma biex jaqtgħu għatxhom.

²¹Għal erbgħin sena tajthom kulma kienu jeħtieġu fid-deżert, u ma kien jonqoshom xejn. L-ilbies tagħhom ma therriex, u riġlejhom ma ntefħux.

²²Tajthom ukoll saltniet u popli, u ffissajtilhom il-fruntieri tagħhom. Ħadu f’idejhom art Siħon, sultan ta’ Ħesbon, u art Għog, sultan ta’ Basan.

²³Kattart ’l uliedhom daqs il-kwiekeb tas-sema, u wassalthom sal-art li kont wegħedt lil missirijiethom li għad jiġu fiha biex jeħduha f’idejhom.

²⁴U wliedhom ġew, u ħadu f’idejhom l-art; u baxxejt quddiemhom u tajthom f’idejhom lil dawk li kienu joqogħdu fil-pajjiż - il-Kangħanin - is-slaten tal-art u n-nies tagħha, biex jagħmlu bihom dak li kien jogħġobhom.

²⁵Ħadu f’idejhom bliet bis-swar u art għammiela, u wirtu djar mimlija b’kull xorta ta’ ħwejjeġ tajba, bjar imħaffra minn ħaddieħor, għelieqi tad-dwieli u ż-żebbuġ, u siġar li jagħmlu ħafna frott. U kielu u xebgħu, simnu u thennew, għax int kont tajjeb ħafna magħhom.

²⁶“Imma huma lilek iddisprezzaw, u qamu kontra tiegħek; il-liġi tiegħek tefgħuha wara spallejhom, u qatlu l-profeti tiegħek, għax ħaduha magħhom, biex ireġġgħuhom lura lejk. Huma baqgħu jidinbu bl-ikrah.

²⁷Tajthom f’idejn l-għedewwa tagħhom u għakksuhom; imma fi żmien id-dwejjaq tagħhom sejħu lilek, u int, mis-smewwiet, smajthom, u bgħattilhom feddejja skont il-ħniena kbira tiegħek, u dawn fdewhom minn idejn l-għedewwa tagħhom.

²⁸Imma kif kienu jsibu l-mistrieħ, kienu jerġgħu bħal qabel, u jagħmlu dak li hu ħażin quddiemek. Int kont titlaqhom f’idejn l-għedewwa tagħhom, u dawn kienu jaħkmu fuqhom. Imma mbagħad kienu jerġgħu lura, u jsejħu lilek, u int mis-smewwiet kont tismagħhom. Kemm-il darba ħlisthom skont il-ħniena tiegħek.

²⁹U ħadtha magħhom biex treġġagħhom lura għal-Liġi tiegħek, imma huma tkabbru, u ma tawx widen għall-kmandamenti tiegħek, u dinbu meta ma qagħdux għall-ġudizzju tiegħek. Jekk wieħed joqgħod għall-ġudizzji tiegħek ikollu l-ħajja permezz tagħhom, imma huma ma ridux jerfgħu l-piż tagħhom, u webbsu rashom, u ma ridux jisimgħu.

³⁰Int stabart bihom għal ħafna snin, u ħadtha magħhom permezz tal-profeti tiegħek, li kellhom l-ispirtu tiegħek, imma huma ma tawx widen. Int għalhekk tlaqthom f’idejn il-ġnus barranin.

³¹Imma fil-ħniena kbira tiegħek, int ma ġibthomx fix-xejn, u lanqas ħallejthom weħidhom, għax int Alla ħanin u twajjeb.

³²“U issa, o Alla tagħna, int Alla kbir, qawwi, u tal-biża’, tħares il-patt u tagħmel il-ġid, tħarisx fuq it-tbatijiet tagħna bħallikieku kienu ħaġa ta’ xejn, it-tbatijiet li minn żmien is-slaten tal-Assirja sal-lum ġew fuqna, fuq is-slaten tagħna, il-kapijiet tagħna, il-qassisin tagħna, il-profeti tagħna, missirijietna, u l-poplu kollu.

³³Madankollu, int kont ġust f’dak kollu li ġie fuqna, għax int żammejt kelmtek, filwaqt li aħna għamilna dak li hu ħażin.

³⁴Is-slaten tagħna, il-kapijiet tagħna, il-qassisin tagħna, u missirijietna, ma qagħdux għal-Liġi tiegħek, u ma tawx widen għall-kmandamenti u l-preċetti tiegħek, li kont widdibthom fuqhom.

³⁵Huma gawdew is-saltna tagħhom, il-ġid kbir li għamilt magħhom, l-art kbira u għammiela li tajthom quddiemhom; imma lilek ma qdewkx, u ma reġgħux lura mill-għemejjel ħżiena tagħhom.

³⁶Ara, aħna llum ilsiera; l-art, li tajt lil missirijietna biex jieklu mill-frott u mill-ġid tagħha, ara, aħna qegħdin ngħixu qisna lsiera fiha.

³⁷L-art tkattar l-uċuħ tagħha għas-slaten, li qegħedtilna fuqna minħabba dnubietna; u huma jaħkmu fuq ġisimna u fuq il-bhejjem tagħna kif jogħġobhom. Ninsabu mdejqin għall-aħħar.”