Read Maltese Bible with DC – IL-BIBBJA IL-KOTBA MQADDSA TOBIT 1 Bible Online

TOBIT 1 - Maltese Bible with DC – IL-BIBBJA IL-KOTBA MQADDSA bible

TOBIT 1

¹Il-Ktieb tal-ġrajja ta’ Tobit[1] bin Tobijel, bin Ħananijel, bin Għadwel, bin Gabajel, nisel Għażijel, mit-tribù ta’ Naftali.

²Tobit kien meħud ilsir, fi żmien Enemessar, sultan tal-Assiri, minn Kedes, li tinsab fuq in-naħa tal-lemin ta’ Kades ta’ Naftali fil-Galilija ta’ fuq, ’il fuq minn Aser, mat-triq ta’ nżul ix-xemx, fuq in-naħa tax-xellug ta’ Fogor.

³Jiena, Tobit, kont nimxi fit-triq tas-sewwa u l-ġustizzja l-jiem kollha ta’ ħajti, u kont nagħmel ħafna karità ma’ ħuti u ma’ ġensi, li kienu ġew miegħi fl-art tal-Assiri, f’Ninwè.

⁴Meta kont għadni ngħix f’pajjiżi, fl-art ta’ Iżrael, u kont għadni żagħżugħ, it-tribù kollha ta’ Naftali, l-antenat tiegħi, tbiegħdet mid-dar ta’ David, l-antenat tiegħi, u minn Ġerusalemm, il-belt magħżula minn fost it-tribujiet l-oħra ta’ Iżrael biex fiha t-tribujiet kollha joffru s-sagrifiċċju; hemm kien ikkonsagrat is-santwarju fejn kien jgħammar Alla l-Għoli, mibni fiha għall-ġenerazzjonijiet kollha għal dejjem.

⁵Ħuti kollha u d-dar ta’ Naftali, l-antenat tiegħi, kienu joffru s-sagrifiċċji lill-għoġol, li kien għamel f’Dan Ġerobogħam[2], is-sultan ta’ Iżrael, fuq l-għoljiet kollha tal-Galilija.

⁶Jien waħdi kont immur sikwit Ġerusalemm[3] għall-festi, kif inhu miktub b’liġi għal dejjem għal Iżrael. Kont inħaffef lejn Ġerusalemm u nieħu miegħi l-bikri tal-uċuħ, u l-ewwel frott tal-merħla u l-għexur mid-dħul, u l-ewwel ġeżżiet tan-nagħaġ.

⁷Kont nagħtihom lill-qassisin, ulied Aron, għas-servizz tal-artal; u l-għexur tal-qmuħ, u l-inbid, u ż-żejt, u r-rummien, u t-tin, u tal-bqija tal-frott tar-raba’ kont nagħtihom lil ulied Levi, li kienu jservu f’Ġerusalemm. Għal sitt snin sħaħ, it-tieni għexur kont insarrafhom fi flus, u mmur nonfoqhom f’Ġerusalemm kull sena;

⁸u t-tielet għexur kont inwarrabhom għall-iltiema, ir-romol u l-prosèliti, li kienu ngħaqdu ma’ wlied Iżrael. U kont nagħtihomlhom kull tliet snin, u konna nikluhom skont ma tgħid għalihom il-Liġi ta’ Mosè, u skont it-twissijiet li wissietni Debora, omm Ħananijel missieri, għaliex missieri kien miet u ħallieni ltim.

⁹Meta sirt raġel, iżżewwiġt mara min-nisel tal-familja tagħna, u minnha kelli tifel, u semmejtu Tobija.

¹⁰Meta kaxkruni lsir fl-Assirja u bqajt itturufnat hemmhekk, mort f’Ninwè. Ħuti kollha u dawk ta’ ġensi kienu jieklu l-ikel tal-Ġentili;

¹¹iżda jiena kont inżomm ruħi ’l bogħod li ma nikolx mill-ikel tal-Ġentili.

¹²U billi kont dejjem niftakar f’Alla tiegħi b’qalbi kollha,

¹³Alla l-Għoli żejjinni bil-ġmiel u sibt grazzja quddiem Enemessar, u kont nixtrilu kulma kien jeħtieġ.

¹⁴Għalhekk kont immur fl-art tal-Medja, u kont nixtrilu minn hemm sakemm miet. Darba minnhom ħallejt għaxar talenti tal-fidda[4] f’boroż għal Gabajel bin Gabri, qarib tiegħi, li kien joqgħod fil-pajjiż tal-Medja.

¹⁵Meta miet Enemessar u kien isaltan floku ibnu Sanħerib[5], ingħalqu t-toroq tal-Medja, u ma stajtx immur iktar il-Medja.

¹⁶Fi żmien Enemessar kont nagħmel ħafna karità ma’ ħuti li kienu minn ġensi.

¹⁷Ħobżi kont inqassmu lill-imġewħin, u ħwejġi lill-għarwenin; u jekk kont nara lil xi ħadd minn ġensi mejjet mixħut barra l-ħitan ta’ Ninwè, kont nidfnu[6].

¹⁸Hekk ukoll kont nagħmel meta s-sultan Sanħerib, wara li kien raġa’ lura maħrub mil-Lhudija, fi żmien il-vendetta li għamel minnu s-sultan tas-sema u l-art għad-dagħa li kien dagħa, kien joqtol lil xi ħadd, kont nidfnu wkoll. Għax fil-korla tiegħu qatel ħafna minn ulied Iżrael. Jien kont nieħu l-iġsma tagħhom bil-moħbi u nidfinhom; u meta kien ifittixhom Sanħerib ma kienx isibhom.

¹⁹Imma wieħed minn Ninwè mar u għarraf is-sultan bija, li jien kont nidfinhom, u kelli ninħeba. Malli sirt naf li s-sultan kien jaf bija u li kont imfittex għall-mewt, bżajt u ħrabt.

²⁰Kulma kelli serquhuli, u ma kien baqagħli xejn. Kollox ħaduli għat-teżor tas-sultan, barra minn marti Anna u ibni Tobija.

²¹Ma laħqux għaddew erbgħin jum li ma qatluhx iż-żewġ uliedu u ħarbu lejn il-muntanja Ararat, u floku laħaq sultan ibnu Sarkedon[7]. Dan qiegħed lil Aħikar, bin ħija Ħananijel, teżorier tal-art kollha u telaq f’idejh l-amministrazzjoni kollha. Aħikar bin ħija Ħananijel kellu setgħa fuq l-art kollha.

²²Imbagħad Aħikar indaħal għalija, u nżilt Ninwè. Fi żmien Sanħerib, sultan tal-Assiri, Aħikar kien diġà kuppier, kellu s-siġill f’idejh, kien amministratur u jżomm il-kontijiet; u Sarkedon għamlu għat-tieni darba; kien bin ħija u min-nisel tiegħi.