Read Maltese Bible with DC – IL-BIBBJA IL-KOTBA MQADDSA TOBIT 10 Bible Online

TOBIT 10 - Maltese Bible with DC – IL-BIBBJA IL-KOTBA MQADDSA bible

TOBIT 10

¹Tobit minn jum għal ieħor kien jgħodd il-ġranet; kemm kellu jdum ibnu biex imur u kemm biex jerġa’ lura. Meta għadda żmien biżżejjed, u ibnu ma deherx,

²beda jitħasseb: “Tgħid żammewh hemm? Tgħid miet Gabajel, u ma kien hemm ħadd biex jagħtih il-flus?”

³U beda jagħmel f’qalbu.

⁴U martu Anna bdiet tgħidlu: “Ibni spiċċa! Ma għadux aktar fost il-ħajjin.” U nfexxet tibki u titniehed minħabba binha, u tgħid:

⁵“Jaħasra għalija, ibni, għala ħallejtek tmur, id-dawl ta’ għajnejja.”

⁶“Iskot!” beda jgħidilha Tobit, “taħseb xejn, oħti, it-tifel qawwi u sħiħ. Żgur li nqalgħetilhom xi ħaġa li żammithom hemm. Il-bniedem li mar miegħu hu bniedem ta’ fiduċja u wieħed minn qrabatna. Tagħmilx f’qalbek għalih, oħti, dalwaqt ikun hawn.”

⁷“Iskot u ħallini,” qaltlu, “u tidħakx bija. Ibni spiċċa!” Ta’ kuljum kienet toħroġ tiġġerra fit-triq li minnha kien telaq binha, tħares ’l hemm u ’l hawn, u ma kienet tisma’ minn ħadd; u meta kienet tinżel ix-xemx, kienet tidħol u taqbad tibki, u titniehed il-lejl kollu bla ma torqod.

⁸U meta għaddew l-erbatax-il ġurnata tal-festa tat-tieġ, li Ragħwel kien ħalef li jagħmel lil bintu, resaq fuqu Tobija u qallu: “Ħallini mmur, għax naf li missieri u ommi jaqtgħu qalbhom li għadd qatt jarawni. Għalhekk nitolbok, missier, ħallini nitlaq, u mmur għand missieri. Diġà għarraftek fiex ħallejtu.”

⁹Ragħwel wieġeb lil Tobija: “Ibqa’ hawn, ibni, ibqa’ miegħi, u jien nibgħat messaġġier għand missierek Tobit, u jgħarrfu kif tinsab.” “Ma jkun qatt,” wieġbu Tobija, “nitolbok, ħallini nitlaq minn hawn għal għand missieri.”

¹⁰Ragħwel qam u ta lil Tobija, lil martu Sara, nofs il-ġid li kellu: qaddejja, irġiel u nisa, baqar u nagħaġ, ħmir u iġmla, ilbies, flus u tagħmir.

¹¹Tahom il-vjaġġ it-tajjeb, għannqu u qallu: “Saħħa ibni, mur qawwi u sħiħ. Sid is-smewwiet iwassalkom bis-sliema, lilek u ’l martek Sara, u jalla nara lil uliedkom qabel ma mmut.”

¹²Imbagħad lil bintu qalilha: “Mur għand ħatnek, mil-lum ’il quddiem huma l-ġenituri tiegħek bħallikieku nissluk huma. Mur bis-sliema, binti, jalla kemm indum ħaj ma nismax ħlief ġid fuqek!” Ragħwel għannaqhom, u tahom il-vjaġġ it-tajjeb, u telaqhom.

¹³“Ibni u għażiż ħija,” qalet imbagħad Għedna lil Tobija, “jalla l-Mulej iwassalkom id-dar, lilek u lil binti Sara, u jalla nara ’l uliedek f’ħajtek, u ’l ulied binti Sara qabel ma mmut. Quddiem il-Mulej f’idejk nerħi ’l binti; ħu ħsiebha u tiksrilha qatt qalbha kemm iddum ħaj. Mur bis-sliema, ibni. Minn issa ’l quddiem jien ommok, u Sara oħtok. Jalla jkollna lkoll ir-risq il-jiem kollha ta’ ħajjitna.” Imbagħad bisithom it-tnejn u tathom il-vjaġġ it-tajjeb.

¹⁴U Tobija telaq mingħand Ragħwel, qawwi u sħiħ, ferħan u jbierek lis-Sid tas-smewwiet u l-art, is-sultan fuq kulħadd, li tah ir-risq fi triqtu. U Ragħwel qallu: “Jalla jkollok il-ġid biex tgħin lill-ġenituri tiegħek il-jiem kollha ta’ ħajjithom.”