Read Maltese Bible with DC – IL-BIBBJA IL-KOTBA MQADDSA TOBIT 11 Bible Online

TOBIT 11 - Maltese Bible with DC – IL-BIBBJA IL-KOTBA MQADDSA bible

TOBIT 11

¹Meta kienu qorbu lejn Kasrin, biswit Ninwè,

²Rafel qal lil Tobija: “Inti taf kif ħallejna lil missierek.

³Ħa ngħaġġlu qabel martek, u nlestu d-dar, huma u ġejjin.”

⁴U telqu t-tnejn flimkien u Rafel qallu: “Ħu f’idek il-marrara.” U mal-anġlu u Tobija mar il-kelb warajhom.

⁵Anna kienet toqgħod bilqiegħda tgħarrex lejn it-triq mnejn kienet tistenna lil binha ġej.

⁶Malli lemħitu ġej marret tgħid lil missieru: “Ara, ibnek ġej, u miegħu hemm ir-raġel li mar miegħu.”

⁷Rafel imbagħad qal lil Tobija qabel ma dan qorob lejn missieru: “Naf li għajnejn missierek se jinfetħu.

⁸Ogħroklu għajnejh bil-marrara tal-ħuta, u d-duwa tixrob il-bjada u din titqaxxar, u missierek jieħu d-dawl u jibda jara.”

⁹Anna marret tiġri u nxteħtet fuq għonq binha u qaltlu: “Fl-aħħar rajtek, ibni; issa nista’ mmut.” U nfexxet tibki.

¹⁰Tobit qam, u tfixkel f’riġlejh hu u ħiereġ mill-bieb tal-bitħa.

¹¹U Tobija mar jilqgħu bil-marrara tal-ħuta f’idu, u nefaħ f’għajnejh u qabdu minn driegħu, u qallu: “Agħmel il-qalb missier.” Għamillu d-duwa fuq għajnejh u din bdiet taħarqu.

¹²Imbagħad b’idejh it-tnejn qaxxarlu l-bjada minn truf għajnejh.

¹³Tobit inxteħet fuq għonq ibnu u nfexx f’bikja: “Qiegħed narak, ibni, id-dawl ta’ għajnejja.”

¹⁴“Imbierek Alla,” issokta jgħid, “u mbierek l-isem kbir tiegħu, u mberkin l-anġli qaddisa tiegħu. Kbir ismu fuqna, u mberkin l-anġli tiegħu għal dejjem ta’ dejjem. Wara li kkastigani, issa, ara, jien qiegħed nara lil ibni Tobija.”

¹⁵Tobija daħal ġewwa ferħan ibierek lil Alla b’kemm kellu saħħa, u għarraf lil missieru Tobit li Alla kien tah ir-risq fit-triq; ġabar il-flus; iżżewweġ lil Sara bint Ragħwel, li diġà qiegħda fil-bieb ta’ Ninwè, u għoddha waslet.

¹⁶Kollu ferħan Tobit ħareġ jilqa’ l-għarusa ta’ ibnu fil-bieb ta’ Ninwè. U n-nies ta’ Ninwè stagħġbu meta rawh miexi mgħaġġel kemm jiflaħ bla ma jżommu ħadd minn idu. Tobit stqarr quddiem kulħadd li Alla ħenn għalih, u fetaħlu għajnejh.

¹⁷Imbagħad resaq lejn Sara, mart ibnu, berikha u qalilha: “Merħba bik, binti! Imbierek Alla tiegħek li ġiebek għandna, binti! Imbierek missierek! Imbierek ibni Tobija! Imbierka int, binti! Idħol f’darek, qawwija u sħiħa! Idħol imbierka u ferħana! Idħol, binti!”

¹⁸Dakinhar kien hemm ferħ kbir fost il-Lhud ta’ Ninwè.

¹⁹Aħikar u Nadab, kuġini ta’ Tobit, ġew jifirħulu;

²⁰u għamlu l-festa tat-tieġ li damet sejra sebat ijiem.