Read Maltese Bible with DC – IL-BIBBJA IL-KOTBA MQADDSA TOBIT 12 Bible Online

TOBIT 12 - Maltese Bible with DC – IL-BIBBJA IL-KOTBA MQADDSA bible

TOBIT 12

¹Malli għaddiet il-festa tat-tieġ, Tobit sejjaħ lil Tobija ibnu u qallu: “Ibni, qis li tħallas skont ma ħaqqu lil dak ir-raġel li ġie jwasslek, u agħtih xi ħaġa aktar.”

²“Missier, kemm se naqbad nagħtih?” staqsieh, “Jekk nagħtih in-nofs ta’ kulma ġibna magħna, ma jien se nbati xejn.

³Lili wassalni qawwi u sħiħ; fejjaq lil marti, ġiebli l-flus, u lilek fejqek. Xi ħlas nista’ nagħtih iżjed?”

⁴“Jistħoqqlu jieħu n-nofs,” wieġbu Tobit, “ta’ dak li ġibilna miegħu.”

⁵Imbagħad sejjaħlu u qallu: “Nofs kulma ġibtilna miegħek hu tiegħek bi ħlas. Ħudu, u tista’ tmur bis-sliem.”

⁶Rafel imbagħad sejħilhom bil-moħbi u qalilhom: “Bierku lil Alla u faħħruh quddiem il-ħajjin kollha għall-ġid kollu li għamel magħkom, biex iberkuh u jgħannu għana ta’ tifħir f’ġieħ ismu. Xandru mal-bnedmin kollha kulma għamel Alla u agħtuh ġieħ u titnikkrux biex tfaħħruh.

⁷Tajjeb li wieħed iżomm moħbi s-sigriet tas-sultan, iżda unur li wieħed ifaħħar u jxandar l-opri ta’ Alla. Agħmlu t-tajjeb u ma jilħaqkom ebda deni.

⁸Aħjar it-talb bil-qalb, u l-karità bis-sewwa, mill-għana bid-dnewwa. Aħjar tagħti l-karità, milli taħżen id-deheb.

⁹Il-karità teħilsek mill-mewt, u tnaddfek minn kull dnub. Dawk li jagħmlu l-karità jimtlew bil-ħajja.

¹⁰Dawk li jagħmlu d-dnub u l-inġustizzja, huma l-għedewwa tagħhom infushom.

¹¹“Irrid ngħidilkom is-sewwa kollu, u ma naħbilkom xejn. Diġà għarraftkom: Tajjeb li wieħed iżomm moħbi s-sigriet tas-sultan, iżda unur li wieħed ixandar l-opri ta’ Alla.

¹²U issa, meta int u Sara kontu titolbu, jien kont inwassal it-talb tagħkom quddiem il-maestà tal-Mulej u nfakkru fih; meta kont tidfen il-mejtin kont nagħmel l-istess.

¹³Meta int ma qgħadtx taħsibha darbtejn biex tqum, tħalli l-ikel, u tmur tkeffen il-mejjet, jien kont mibgħut biex inġarrbek[33].

¹⁴U issa Alla bl-istess mod bagħatni biex infejjaq lilek u lil Sara, mart ibnek.

¹⁵Jien Rafel[34], wieħed mis-seba’ anġli, li qegħdin quddiem il-maestà tal-Mulej, u nistgħu nersqu lejh.”

¹⁶U baqgħu mistagħġba t-tnejn u nxteħtu wiċċhom fl-art, għax qabadhom il-biża’.

¹⁷“Tibżgħux,” qalilhom, “is-sliem magħkom. Bierku lill-Mulej għal dejjem.

¹⁸Mhux minn rajja li kont magħkom, imma għar-rieda tajba ta’ Alla. Lilu bierku l-jiem kollha, u lilu faħħru bl-innijiet.

¹⁹Rajtuni intom, kif ma kilt xejn; kulma rajtu kien viżjoni.

²⁰Issa bierku lill-Mulej fuq l-art; faħħru lil Alla. Jien tiela’ għand min bagħatni. Iktbu kulma ġralkom.” Kif qal hekk għola ’l fuq,

²¹u meta qamu bilwieqfa, ma setgħux jarawh aktar.

²²U bdew ibierku, u jgħannu innijiet lil Alla, u jirringrazzjawh għal kulma għamel magħhom meta dehrilhom l-anġlu ta’ Alla.