Read Maltese Bible with DC – IL-BIBBJA IL-KOTBA MQADDSA TOBIT 13 Bible Online

TOBIT 13 - Maltese Bible with DC – IL-BIBBJA IL-KOTBA MQADDSA bible

TOBIT 13

¹U Tobit qal[35]:

²“Imbierek Alla, li jgħix għal dejjem, u s-saltna tiegħu! Jikkastiga u jħenn; iwasslek sal-qabar f’qiegħ l-art, u mbagħad jerfgħek mill-akbar qerda. M’hemm ħadd li jeħles minn idejh.

³Faħħruh, ulied Iżrael, quddiem il-ġnus! Hu xerridkom f’nofshom.

⁴U hemm uriekom il-kobor tiegħu. Għolluh quddiem il-ħajjin kollha. Hu Sidna, u Alla tagħna! Hu Missierna, u Alla tagħna, għal dejjem ta’ dejjem.

⁵Minħabba dnubietkom jikkastigakom, imma jħenn għalikom ilkoll; u għad jiġborkom minn fost il-ġnus kollha, li f’nofshom tinsabu mxerrda.

⁶Meta b’qalbkom sħiħa u ruħkom kollha, terġgħu lura għal għandu, imbagħad hu jdur lejkom, u ma jaħbix iżjed wiċċu minnkom.

⁷Ara x’għamel magħkom! Faħħruh b’kemm għandkom ħila, u bierku l-Mulej il-ġust, u faħħru s-sultan ta’ dejjem.

⁸Infaħħru jien f’art l-eżilju tiegħi, u nuri l-qawwa u l-kobor tiegħu lill-ġens midneb. Erġgħu lura għal għandu, midinbin, u għamlu l-ġustizzja quddiemu. Min jaf jilqagħkomx u jħennx għalikom?

⁹Jiena nkabbar lil Alla tiegħi u ruħi tfaħħar lis-sultan tas-sema, u tifraħ bil-kobor tiegħu.

¹⁰Ħa jxandru lkoll il-maestà tiegħu, u jfaħħruh f’Ġerusalemm. “Ġerusalemm, il-belt qaddisa, għad jikkastigak minħabba għemil uliedek; u mbagħad jerġa’ jħenn għal ulied il-ġusti.

¹¹Faħħar kif jixraq lill-Mulej, u bierek is-sultan ta’ dejjem; u hekk terġa’ tinbnielek daru bil-ferħ,

¹²biex jifirħu fik l-itturufnati, u juri fik imħabbtu għall-imsejknin, għal dejjem ta’ dejjem.

¹³“Dawl kbir għad jiddi, u joħroġ minnek sa truf l-art, kotra ta’ ġnus għad jiġuk mill-bogħod, u nies minn kull rokna tad-dinja, minħabba l-isem qaddis tiegħek, iġibu r-rigali f’idejhom għas-sultan tas-sema. Nisel wara nisel jaqbżu bil-ferħ fik, u isem il-belt magħżula jibqa’ għal dejjem.

¹⁴“Misħutin dawk kollha li jitkellmu iebes kontrik; dawk kollha li jaħbtu għalik; dawk kollha li jħottu lil ħitanek; li jġarrfu t-torrijiet tiegħek, u jagħtu n-nar lil djarek. U mbierka għal dejjem dawk li jirrispettawk!

¹⁵“Ejja, ifraħ b’ulied il-ġusti, għax ilkoll għad jinġabru, u jbierku s-Sid ta’ dejjem. Hienja dawk li jħobbuk, u hienja dawk li jifirħu bis-sliem tiegħek.

¹⁶Hienja n-nies kollha, li sewdu qalbhom għas-swat li qlajt, fik għad jifirħu u jaraw il-ferħ tiegħek għal dejjem. Bierek, ruħi, lill-Mulej, is-Sultan il-Kbir.

¹⁷“Ġerusalemm għad jibnuha mill-ġdid, belt fejn jgħammar Alla għal dejjem ta’ dejjem. Kemm għad nifraħ meta l-fdal ta’ nisli, jaraw is-sebħ tiegħek, u jfaħħru s-Sultan tas-sema! Il-bibien ta’ Ġerusalemm għad jinbnew biż-żaffir u l-iżmerald; tal-ħaġar prezzjuż ikunu ħitanek. Tad-deheb jinbnew it-torrijiet tiegħek; u l-fortizzi tad-deheb safi. Il-pjazez ta’ Ġerusalemm jiċċangawhom b’ħaġar prezzjuż u ġawhar ta’ Ofir.

¹⁸Il-bwieb ta’ Ġerusalemm għad ikantaw innijiet ta’ ferħ; u djarha lkoll jgħajtu; ‘Ħallelujah! Imbierek Alla ta’ Iżrael!’ Hu jberikhom, u huma jbierku ismu, qaddis għal dejjem ta’ dejjem.”