Read Maltese Bible with DC – IL-BIBBJA IL-KOTBA MQADDSA TOBIT 14 Bible Online

TOBIT 14 - Maltese Bible with DC – IL-BIBBJA IL-KOTBA MQADDSA bible

TOBIT 14

¹Hekk Tobit temm l-innu ta’ ringrazzjament.

²Tobit miet fis-sliem fl-għomor ta’ mija u tnax-il sena, u difnuh bl-unuri kollha fil-belt ta’ Ninwè. Kellu tnejn u sittin sena meta marad b’għajnejh; u wara li kien raġa’ ħa d-dawl, għex fir-riżq u baqa’ jagħmel il-karità; qatt ma kien jehda milli jfaħħar lil Alla u jxandar il-glorja tiegħu.

³Meta kien se jmut sejjaħ lil ibnu Tobija u għamillu dawn it-twissijiet: “Ibni, aqbad lil uliedek

⁴u itlaq lejn il-Medja, għax jien nemmen li l-kelma ta’ Alla li qal fuq Ninwè, permezz ta’ Naħum[36], għad isseħħ. Kollox għad jiġri lil Assirja u Ninwè, kulma qalu l-profeti ta’ Iżrael li Alla bagħat. Xejn, lanqas kelma waħda, ma jonqos milli qalu l-profeti; kollox għad iseħħ f’waqtu. Fil-Medja tkun fiż-żgur aktar milli tkun fl-Assirja jew fil-Babilonja. Jien naf, anzi jien żgur li kulma qal Alla, għad iseħħ u jsir, u ma tintilef ebda kelma milli qal. “Ħutna li joqogħdu fl-art ta’ Iżrael ilkoll għad iferrxuhom u jitturufnawhom minn dik l-art tajba; u l-art kollha ta’ Iżrael issir deżert u Samarija u Ġerusalemm isiru ħerba u d-dar ta’ Alla jagħtuha n-nar, u għal xi żmien tibqa’ fin-niket.

⁵Imbagħad il-Mulej jerġa’ jħenn, u Alla jreġġagħhom lura fl-art ta’ Iżrael. Jerġgħu jibnu d-dar ta’ Alla, mhux bħalma kienet qabel, u tibqa’ hekk sakemm jintemmu ż-żminijiet u s-sekli. Wara dan kollu lkoll jerġgħu lura mill-eżilju u jerġgħu jibnu ’l Ġerusalemm fil-glorja, u fiha jibnu d-dar ta’ Alla, skont ma ħabbru fuqha l-profeti ta’ Iżrael.

⁶Il-ġnus kollha tad-dinja għad jikkonvertu u jibżgħu minn Alla fis-sewwa, u lkoll iwarrbu l-idoli li qarrquhom bil-gideb tagħhom, u jibdew ibierku lil Alla ta’ dejjem skont il-liġi tiegħu.

⁷“Ulied Iżrael kollha li jkunu salvaw f’dawk il-jiem jiftakru sewwa f’Alla; jinġabru u jiġu Ġerusalemm u jgħammru għal dejjem fl-art ta’ Abraham fiż-żgur, u din tkun mogħtija lilhom. Jifirħu dawk kollha li jħobbu lil Alla fis-sewwa; u dawk li jagħmlu d-dnub u l-inġustizzji jintemmu minn fuq wiċċ l-art.

⁸Issa, uliedi, dan ngħidilkom:

⁹‘Servu lil Alla fis-sewwa u agħmlu dak li jogħġob lilu.’ “Lil uliedkom darruhom jagħmlu s-sewwa u jagħtu l-karità; darruhom jiftakru f’Alla u jbierku ismu minn qalbhom, u b’kemm għandhom ħila f’kull waqt. “Int, ibni, itlaq minn Ninwè. Tibqax hawn. Dak in-nhar li int tidfen lil ommok ħdejja, dak in-nhar stess, toqgħodx aktar fl-inħawi ta’ Ninwè, għax, kif nara, hawn ħafna ħażen u qerq bla mistħija ta’ xejn.

¹⁰“Ara, ibni, x’għamel Nadab lil Aħikar[37], li kien rabbieh: u ma fittixx li jidfnu ħaj taħt l-art? Imma Alla dawwar l-għajb f’wiċċu. Aħikar ħareġ għad-dawl, u Nadab mar fid-dlam ta’ dejjem, għax kien fittex li joqtol lil Aħikar. Iżda għax jien kont nagħmel il-karità, Aħikar ħeles mix-xibka li kien nasablu Nadab, u Nadab inqabad fiha hu, u nqered.

¹¹Mela uliedi, araw x’tagħmel il-karità, u x’tagħmel l-inġustizzja li toqtol. Ara, se toħroġli ruħi.” Qegħduh fuq il-friex, u miet; u difnuh bl-unuri kollha.

¹²Meta mietet ommu, Tobija difinha ħdejn missieru. U mbagħad mar il-Medja, hu u martu u għammru f’Ekbatana għand ħatnu Ragħwel.

¹³Ħa ħsieb sewwa tal-kunjati tiegħu fi xjuħithom u difinhom f’Ekbatana tal-Medja;

¹⁴u wiret il-ġid kollu ta’ Ragħwel u ta’ missieru Tobit, u miet ta’ mija u sbatax-il sena rrispettat minn kulħadd.

¹⁵Qabel ma miet laħaq ra u sama’ bil-qerda ta’ Ninwè[38], u ra l-eżiljati miġjubin fil-Medja minn Assweru, sultan tal-Medja. Għalhekk radd ħajr lil Alla għal kulma għamel lin-nies ta’ Ninwè u l-Assirja. Feraħ qabel ma miet għal li ġralha Ninwè u faħħar lil Alla li jgħix għal dejjem ta’ dejjem. Ammen.