Read Maltese Bible with DC – IL-BIBBJA IL-KOTBA MQADDSA TOBIT 2 Bible Online

TOBIT 2 - Maltese Bible with DC – IL-BIBBJA IL-KOTBA MQADDSA bible

TOBIT 2

¹Mela fi żmien Sarkedon is-sultan, erġajt lura lejn dari, u reġgħu ngħaqdu miegħi marti Anna u ibni Tobija. Kienet il-festa tagħna ta’ Għid il-Ħamsin[8], il-festa tal-ġimgħat; dak in-nhar għamluli pranzu kbir u jien inxtħett biex niekol.

²Il-mejda kienet lesta, u ħejjewli ħafna ikel, u jien għedt lil ibni Tobija; “Mur ibni, u ara ssibx lil xi ħadd fqir minn ħutna l-itturufnati f’Ninwè, wieħed li jiftakar fil-Mulej b’qalbu kollu, u ġibu hawn biex jiekol magħna[9]. Nistennik, ibni, sa ma terġa’ tiġi.”

³U Tobija mar ifittex lil xi ħadd fqir minn ħutna. Meta raġa’ lura Tobija qalli: “Missier.” “Hawn jien, ibni,” weġibtu; u hu wieġeb u qalli: “Ara, hemm wieħed minn niesna, qatluh u xeħtuh fis-suq; għadhom kif fgawh.”

⁴Qbiżt minn fejn kont, ħallejt il-pranzu bla ma doqt xejn, u mort ġbartu mit-triq, u ħadtu fi dwejra sa ma tgħib ix-xemx biex imbagħad nidfnu.

⁵Imbagħad erġajt lura lejn id-dar, inħsilt[10] u kilt bid-diqa f’qalbi.

⁶Ftakart fil-kelma tal-profeta Għamos li kien qal għal Betel: “Il-festi tagħkom jinbidlu f’niket, u l-għana tagħkom kollu f’tinwiħ.” U nfexxejt nibki.

⁷Malli niżlet ix-xemx, mort ħaffirt qabar u dfintu.

⁸Il-ġirien daħku bija u qalu: “Ma jibżax aktar? Darba kienu jfittxuh għall-mewt minħabba f’hekk u kellu jaħrab, u issa qiegħed jidfen mill-ġdid!”

⁹Dak il-lejl inħsilt u mort fil-bitħa tad-dar u mteddejt taħt il-ħajt b’wiċċi mikxuf minħabba s-sħana.

¹⁰Ma ġinix f’rasi li kien hemm l-għasafar fil-ħajt ta’ fuqi, u l-ħmieġ sħun tagħhom waqa’ fuq għajnejja, u ġiebli l-bjada fuqhom. U jien mort għand it-tobba biex ifejquni, iżda aktar ma kienu jdewwuni, il-bjada aktar kienet tikber, sakemm għamejt għalkollox. U bqajt marid b’għajnejja għal erba’ snin. U ħuti kollha għelew għalija. Aħikar dam idur bija għal sentejn sakemm ma telaqx għal Elimajs[11].

¹¹Dik il-ħabta Anna, marti, kienet taħdem xi xogħlijiet tan-nisa,

¹²u kienet tibgħathom għand sjiedhom, u huma kienu jħallsuha. Darba minnhom fis-seba’ tax-xahar ta’ Distru[12], qatgħet in-nisġa u bagħtitha lis-sidien, u dawn tawha l-ħlas kollu, u miegħu tawha wkoll gidi għall-mejda.

¹³Malli daħlet id-dar beda jgħajjat. Sejjaħtilha u staqsejtha: “Dan il-gidi mnejn ġie? Mhux misruq, hux? Erġa’ agħtih lil sjiedu. Ma nistgħu nieklu xejn misruq.”

¹⁴Imbagħad hi qaltli: “Tawhuli rigal mal-ħlas.” Jien m’emminthiex u għedtilha tieħdu lura għand sjiedu, u jien stħajt flokha għax għamlet dan. U hi wieġbet: “Fejn huma l-karitajiet tiegħek? Fejn huma l-opri tajba tiegħek? Jidher sew minn dak li ġie fuqek.”