Read Maltese Bible with DC – IL-BIBBJA IL-KOTBA MQADDSA TOBIT 4 Bible Online

TOBIT 4 - Maltese Bible with DC – IL-BIBBJA IL-KOTBA MQADDSA bible

TOBIT 4

¹Dakinhar Tobit ftakar fil-flus li kien ħalla għand Gabajel f’Rages tal-Medja,

²u qal bejnu u bejn ruħu: “Arani, jien tlabt il-mewt. Għaliex ma nsejjaħx lil ibni Tobija u ngħidlu b’dawk il-flus, qabel ma mmut?”

³U sejjaħ lil ibnu Tobija u meta resaq ħdejh kellmu u qallu: “Meta mmut idfinni kif jixraq. Weġġaħ lil ommok u tabbandunaha qatt sakemm iddum ħajja. Agħmel kulma jogħġobha u ssewdilhiex qalbha bl-ebda ħaġa.

⁴Ftakar, ibni, kemm perikli rat ma’ wiċċha minħabba fik meta kont għadek f’ġufha. U meta tmut, idfinha ħdejja f’qabar wieħed.

⁵Kemm iddum ħaj, ibni, ftakar dejjem fil-Mulej u ara li ma jfettillekx tidneb jew tikser il-kmandamenti tiegħu. Agħmel is-sewwa l-jiem kollha ta’ ħajtek, u taqbadx it-triq tal-ħażen.

⁶Għaliex kull min jagħmel is-sewwa, ikollu r-riżq f’għemilu[20].

⁷“Mill-ġid li jkollok agħmel il-karità, u qatt tagħti b’nofs qalb. Iddawwarx ħarstek mill-ebda fqir, biex ma titwarrabx minnek il-ħarsa ta’ Alla.

⁸Ġib ruħek skont ma jkollok; jekk il-ftit, tibżax tagħti l-karità mill-ftit li tista’.

⁹B’hekk tkun qiegħed taħżen teżor kbir għalik għal żmien il-bżonn.

¹⁰Il-karità teħles lil dak li jkun mill-mewt u ma tħallihx jinżel fid-dlam.

¹¹Il-karità għal min jagħmilha hi offerta togħġob lil Alla l-Għoli.

¹²“Ħares lilek innifsek, ibni, minn kull żina, u qabelxejn sib mara minn nisel missirijietek. Teħux b’martek xi waħda barranija, li ma tkunx mit-tribù ta’ missirijietek, għax aħna wlied il-profeti. Ftakar, ibni, li Noè, Abraham, Iżakk, u Ġakobb, missirijietna, sa minn dejjem iżżewġu nisa minn nisilhom u sabu l-barka biex nisilhom jikseb l-art.

¹³Ibni, ħobb lil ħutek, u titkabbarx f’qalbek quddiem is-subien u l-bniet tal-poplu tiegħek hekk li ma teħux mara minn fosthom. Is-suppervja ġġib qerda u diżordni kbira; u l-frugħa ġġib telf u għaks bla tarf għax il-frugħa hi omm il-ġuħ.

¹⁴“Tħallix lejl jgħaddi bla ma tħallas lil min ikun ħadem għalik, imma ħallsu u agħtih il-paga minnufih. Hekk int tkun isservi lil Alla, u tkun imħallas int ukoll. “Ħares lilek innifsek, ibni, f’kulma tagħmel, u ġib ruħek bħal wieħed imrobbi sewwa f’kull pass li tagħmel.

¹⁵Dak li tobgħod int, tagħmlux lil ħaddieħor. Tixrobx inbid sa tisker, għaliex is-sokor jimxi miegħek fi triqtek.

¹⁶Mill-ħobż tiegħek itma’ lil min hu bil-ġuħ, u minn ilbiesek libbes lil min hu għarwien. Kulma jkollok żejjed, agħtih karità u tagħtix b’nofs qalb.

¹⁷Qassam ħobżok, u l-inbid tiegħek sawwab fuq il-qabar tal-ġusti[21], u tagħtix minnhom lill-midinbin.

¹⁸Fittex il-parir ta’ min hu għaref; tmaqdarx parir siewi.

¹⁹“Bierek f’kull ħin lill-Mulej Alla, u itolbu li jitwittew triqatek u mogħdijietek, u jirnexxu fehmietek. Ebda poplu ma għandu l-fehma tajba, imma hu l-Mulej li jagħti kull ġid lil min jogħġbu; u jbaxxi sal-qiegħ nett lil min irid. Ibni, ftakar f’dawn it-twissijiet, u tħassarhomx minn qalbek.

²⁰“U issa ħallini ngħidlek bl-għaxar talenti tal-fidda, li kont ħallejt għand Gabajel, ħu Gabri f’Rages[22] tal-Medja.

²¹Tibżax, ibni, li ftaqarna. Int għad ikollok ħafna ġid jekk int tibża’ minn Alla, taħrab id-dnub u tfittex tagħmel it-tajjeb quddiem il-Mulej, Alla tiegħek.”