Read Maltese Bible with DC – IL-BIBBJA IL-KOTBA MQADDSA TOBIT 5 Bible Online

TOBIT 5 - Maltese Bible with DC – IL-BIBBJA IL-KOTBA MQADDSA bible

TOBIT 5

¹Tobija wieġeb lil Tobit missieru u qallu: “Missier, nagħmel kulma għedtli.

²Imma kif nista’ nieħu mingħandu l-flus meta la hu ma jaf lili, u lanqas jien ma naf lilu? X’sinjal nista’ nagħtih biex jagħrafni, jemminni u jagħtini l-flus? U lanqas naf it-toroq li jieħdu għall-Medja biex immur hemm.”

³Tobit wieġeb u qal lil ibnu Tobija: “Hu tani kitba minn idu u jien tajtu oħra minn idi, imbagħad qsamtha f’biċċtejn[23], u ħadna waħda kull wieħed u tiegħi qegħedtha mal-flus. Issa għaddew għoxrin sena minn mindu jien ħallejt dawk il-flus. Issa, ibni, fittex bniedem tafdah, biex jiġi miegħek, u nħallsuh sakemm terġa’ lura; imbagħad mur u ġib il-flus mingħand Gabajel.”

⁴Tobija ħareġ ifittex raġel li jaf it-triq, biex imur miegħu l-Medja, u kif ħareġ isib l-anġlu Rafel wieqaf quddiemu, u ma għarafx li kien anġlu ta’ Alla.

⁵U qallu: “Mnejn int, żagħżugħ?” U dak wieġbu: “Jien wieħed minn ulied Iżrael, ħutek, u ġejt infittex ix-xogħol.” U staqsieh: “Tafha t-triq li tieħu għall-Medja?”

⁶U dak wieġeb: “Iva, kemm-il darba kont hemm! Imdorri u naf it-toroq kollha. Bosta drabi mort il-Medja u qgħadt għand Gabajel, ħuna, li joqgħod f’Rages tal-Medja, jumejn mixi ’l bogħod minn Ekbatana. Rages tinsab fuq il-muntanji; u Ekbatana f’nofs il-wita.

⁷U Tobija qallu: “Stennieni, żagħżugħ, sakemm immur ngħid lil missieri, għax neħtieġ li inti tiġi miegħi, u mbagħad inħallsek.”

⁸U dak qallu: “Ara, nistenniek, imma tiddawwarx.”

⁹Tobija mar jgħid lil missieru Tobit, u qallu: “Ara, jien sibt raġel, wieħed minn ħutna l-Iżraelin.” Tobit wieġbu: “Sejjaħlu lil dan il-bniedem, biex nara minn liema familja u tribù hu, u hux ta’ min jafdah biex jivvjaġġa miegħek, ibni.”

¹⁰Tobija ħareġ, sejjaħlu u qallu: “Żagħżugħ, missieri qiegħed isejjaħlek.” U dan daħal għandu u Tobit sellimlu l-ewwel, u l-ieħor qallu: “Sliem għalik bil-kotra.” U Tobit wieġeb: “Xi sliem jista’ fadalli? Jiena bniedem għajnejja ma jiswew għal xejn, u ma narax id-dawl tas-sema; ninsab fid-dlam bħall-mejtin, li ma jaraw qatt id-dawl. Jien ħaj fost il-mejtin, nisma’ leħen in-nies, imma ma narahomx.” U wieġbu: “Agħmel il-qalb! Alla wasal biex ifejqek, kuraġġ!” U Tobit qallu: “Tobija, ibni, irid imur il-Medja. Tista’ tmur miegħu u twasslu int? Imbagħad nagħtik ħlasek, ħija.” U Rafel wieġeb: “Nista’ mmur miegħu; jien naf it-toroq kollha, u bosta drabi kont il-Medja, qsamt il-witat kollha tagħha, u naf il-muntanji u t-toroq kollha ta’ hemm.”

¹¹U Tobit wieġeb: “Ħija, minn liema pajjiż, u minn liema tribù int? Għidli ħija.”

¹²U qallu: “It-tribù x’għandu x’jaqsam?” U wieġbu: “Irrid naf is-sewwa kollu: ta’ min int u x’jismek, ħija.”

¹³U wieġbu: “Jiena Għażarija[24] bin Ħananija l-kbir, mir-razza tiegħek.”

¹⁴Tobit imbagħad qallu: “Merħba bik, ħija, u jalla r-riżq. Teħodhiex miegħi, ħija, jekk ridt naf is-sewwa u x’inhi l-familja tiegħek. Ħabat sewwa li int qarib, ġej minn familja sewwa u tajba. Jien naf lil Ħananija u ’l Natan, iż-żewġ ulied ta’ Xemajja l-kbir; kienu jiġu miegħi Ġerusalemm u hemm jaduraw miegħi, u qatt ma tilfu triqthom. Ħutek nies sewwa. Int ħiereġ minn siġra tajba, u merħba bik.”

¹⁵U ssokta jgħidlu: “Jien inħallsek drakma[25] kull jum u nagħtik kulma jeħtieġ għalik u għat-tifel tiegħi.

¹⁶Mur ma’ ibni, u meta terġgħu lura nżidlek xi ħaġa oħra.”

¹⁷U dak wieġbu: “Immur miegħu. Tibżax, qawwijin u sħaħ nitilqu, u qawwijin u sħaħ nerġgħu lura għandek, għax it-triq hija żgura.” Tobit wieġeb: “Tkun imbierek, ħija.” U sejjaħ lil ibnu u qallu: “Ibni, lesti l-meħtieġ għat-triq, u mur ma’ ħuk, u Alla li hu fis-sema jwassalkom hemmhekk bis-sliem, u jreġġagħkom lura għandi qawwijin u sħaħ. L-anġlu tiegħu jkun magħkom u jħariskom, ibni.” Tobija qam u ħareġ biex jibda l-vjaġġ; bies lil missieru u lil ommu, u Tobit qallu: “Mur bis-sliema.”

¹⁸Imma ommu nfexxet tibki, u qalet lil Tobit; “Għaliex bgħatt lil ibni? Mhux forsi l-bastun ta’ idejna, dieħel u ħiereġ quddiemna?

¹⁹Flus bi flus aħjar nitlifhom, u nsalvaw it-tifel.

²⁰Biżżejjed għalina ngħixu kif iridna l-Mulej.”

²¹U Tobit wieġeb: “Taħseb xejn. Qawwi u sħiħ jitlaq, u qawwi u sħiħ jerġa’ lura t-tifel għandna, u int tarah b’għajnejk qawwi u sħiħ.

²²Titħasseb xejn, tibżax minħabba fih, oħti[26]. Anġlu tajjeb[27] imur u jimxi miegħu, titwittielu t-triq u jerġa’ lura qawwi u sħiħ.”

²³U ma bkietx aktar.