Read Maltese Bible with DC – IL-BIBBJA IL-KOTBA MQADDSA TOBIT 6 Bible Online

TOBIT 6 - Maltese Bible with DC – IL-BIBBJA IL-KOTBA MQADDSA bible

TOBIT 6

¹Telaq iż-żagħżugħ u l-anġlu miegħu; ħareġ miegħu l-kelb ukoll u mar magħhom. Telqu t-tnejn flimkien, u meta laħaqhom l-ewwel lejl, waqfu ħdejn ix-xmara Tigri.

²Iż-żagħżugħ niżel jaħsel riġlejh fix-xmara, u qabżet mill-ilma ħuta kbira u riedet taħtaflu riġlu; u ż-żagħżugħ beda jgħajjat.

³“Aqbadha,” qallu l-anġlu, “u żommha sewwa.” Iż-żagħżugħ qabad il-ħuta u tellagħha l-art.

⁴“Iftaħ il-ħuta,” qallu l-anġlu, “u aqlagħlha l-marrara, il-qalb u l-fwied, u erfagħhom għandek; il-bqija tal-ġewwieni armihom. Il-marrara, il-qalb u l-fwied ta’ din il-ħuta jservuna ta’ duwa tajba[28].”

⁵Iż-żagħżugħ fetaħ il-ħuta, ħarġilha l-marrara, il-qalb u l-fwied; u mbagħad xewa biċċa minnha u kielha; l-biċċa l-oħra mellaħha u refagħha.

⁶Baqgħu sejrin flimkien sakemm qorbu lejn il-Medja.

⁷U ż-żagħżugħ staqsa lill-anġlu u qallu: “Ħija Għażarija, x’inhi din id-duwa li fihom il-qalb, il-fwied u l-marrara tal-ħuta?”

⁸“Il-qalb u l-fwied tal-ħuta,” wieġbu l-anġlu, “taħraqhom quddiem xi ħadd, raġel jew mara, imħabbtin minn xi demonju jew spirtu ħażin u jaħrab minnu kull magħmul: ma jkun qatt aktar fih.

⁹Bil-marrara mbagħad togħrok għajnejn ta’ bniedem li fihom tkun trabbiet il-bjada, jew tonfoħ biha fuq il-bjada, u l-għajnejn ifiqu.”

¹⁰Daħlu l-Medja u kienu qrib Ekbatana.

¹¹Mela Rafel qal liż-żagħżugħ: “Ħija Tobija.” “Hawn jien,” wieġbu. “Jenħtieġ,” qallu l-anġlu, “li l-lejl ngħadduh għand Ragħwel, qarib tiegħek li għandu bintu jisimha Sara.

¹²Ebda tifel ma għandu, u anqas tifla oħra ħlief din Sara. Int l-eqreb lejha fost l-irġiel kollha bid-dritt li teħodha, u għandek ukoll id-dritt li tiret kulma għandu missierha. It-tfajla għaqlija, qalbiena u sabiħa ħafna; u missierha bniedem ta’ unur.”

¹³U ssokta jgħidlu: “Int għandek teħodha b’martek. Isma’ minni, ħija, jien inkellem illejla stess lil missierha dwar it-tfajla biex teħodha b’għarustek, u meta nerġgħu lura minn Rages nagħmlu l-festa tat-tieġ. Jien naf żgur li Ragħwel ma jistax jgħidlek le, għax jaf li jekk iżewwiġha lil ħaddieħor, ikun ħaqqu l-mewt skont il-liġi tal-Ktieb ta’ Mosè[29]; jaf ukoll li bintu lilek tmiss bi dritt aktar milli lil ħaddieħor. Issa isma’ minni, ħija, illejla nitkellmu fuq it-tfajla u ngħarrsuhielek, u meta nerġgħu lura minn Rages, neħduha u nwassluha magħna d-dar tiegħek.”

¹⁴Imbagħad Tobija wieġeb lil Rafel u qallu: “Ħija Għażarija, jiena smajt li din diġà żewġuha lil sebat irġiel, u li mietu fil-kamra tal-għarajjes; dak il-lejl stess li kienu jersqu lejha, kienu jmutu. U smajthom ukoll jgħidu li kien joqtolhom xi demonju.

¹⁵U issa jien nibża’ - għax id-demonju jħobbha u lilha ma jagħmlilha ebda deni, iżda joqtol lil min jersaq lejha; u missieri ma għandux ħliefi - nibża’ li mmut u nwassal il-ħajja ta’ missieri u ta’ ommi fil-qabar bl-għali tiegħi. Ma għandhomx tifel ieħor ħliefi biex jidfinhom.”

¹⁶“Ma tiftakarx it-twissija ta’ missierek,” wieġbu Rafel, “li ordnalek tieħu mara mid-dar ta’ missirijietek? Issa isma’ minni, ħija, taħseb xejn f’dan id-demonju, u ħudha. Jien naf li llejla stess jagħtuhielek b’martek.

¹⁷Meta tidħol fil-kamra tal-għarajjes ħu mill-fwied u l-qalb tal-ħuta, u qegħedhom fuq il-ġamar tal-bħur idaħħan; imbagħad toħroġ riħa li malli jħossha d-demonju, dan jaħrab, u ma jidher qatt iżjed ħdejha.

¹⁸U meta tkun se tingħaqad magħha, l-ewwel qumu t-tnejn u itolbu lil Sid is-smewwiet[30], biex jinżlu fuqkom il-ħniena u s-saħħa. Tibżax, għalik kienet maħluqa mill-bidu, u int issalvaha, u tiġi miegħek. Jien naħseb li jkollok it-tfal minnha, li jkunu qishom ħutek; taħseb xejn.”

¹⁹U malli Tobija sama’ kliem Rafel, u li Sara kienet qariba tiegħu minn nisel dar missirijietu, ħabbha, u qalbu ntrabtet magħha.