Read Maltese Bible with DC – IL-BIBBJA IL-KOTBA MQADDSA TOBIT 7 Bible Online

TOBIT 7 - Maltese Bible with DC – IL-BIBBJA IL-KOTBA MQADDSA bible

TOBIT 7

¹Kif daħlu f’Ekbatana, Tobija qal lil sieħbu: “Ħija Għażarija, ħudni dritt għand qaribna Ragħwel!” U ħadu għand Ragħwel, u sabuh bilqiegħda fil-bieb tal-bitħa, u sellmulu huma l-ewwel, u hu qalilhom: “Sliem sħiħ għalikom, ħuti, wasaltu sewwa, qawwijin u sħaħ!”

²U daħħalhom f’daru, u qal lil martu Għedna: “Ara kemm jixbah lil ħija Tobit dan iż-żagħżugħ!”

³Għedna mbagħad bdiet tistaqsihom: “Mnejn intom, ħuti?” “Aħna minn ulied Naftali,” weġbuha, “mill-itturufnati f’Ninwè.”

⁴“Tafu lil Tobit, qaribna?” staqsiethom. U huma weġbuha: “Nafuh.”

⁵U staqsiethom: “Hux tajjeb?” “Ħaj,” weġbuha, “u qawwi u sħiħ.” “Dak missieri!” issokta Tobija.

⁶U mar Ragħwel bil-ġirja fuqu, biesu u beka, kellmu u qallu: “Il-barka fuqek, ibni, int bin raġel sewwa u tajjeb. X’ħasra u x’għali li bniedem ġust u ta’ karità bħal dak jagħma!” U ntefa’ fuq għonq Tobija, ħuh, u nfexx jibki.

⁷U bkiet miegħu Għedna, u bkiet ukoll binthom Sara.

⁸U mbagħad qatel muntun mill-merħla u laqagħhom minn qalbu.

⁹Meta nħaslu u ndafu u qagħdu għall-mejda, Tobija qal lil Rafel: “Ħija Għażarija, għid lil Ragħwel jagħtini b’marti lil oħti Sara.”

¹⁰Ragħwel sama’ dan il-kliem u qallu: “Kul u ixrob u għaddi l-lejl kuntent. M’hawnx bniedem ħliefek li għandu d-dritt li jieħu ’l Sara binti, għażiż ħija; lanqas jien ma nista’ nagħtiha lil ħaddieħor ħlief lilek, għax int l-eqreb lejja. Imma nħoss li għandi ngħidlek is-sewwa, ibni;

¹¹diġà tajtha lil sebat irġiel oħra minn ħutna, u kollha mietu dak il-lejl stess li resqu lejha. U issa, ibni, kul u ixrob, u jagħmel il-Mulej.”

¹²“Issa,” wieġeb Tobija, “ma niekol u ma nixrob xejn hawn ġew qabel ma tkun irranġajt din l-affari tiegħi.” U Ragħwel wieġbu: “Hekk nagħmel: nagħtiha lilek skont il-liġi tal-Ktieb ta’ Mosè; is-sema stess qatagħha li nagħtiha lilek. Ħu lil oħtok. Minn issa ’l quddiem int ħuha u hi oħtok. Tiegħek hi mil-lum ’il quddiem għal dejjem. U Sid is-sema jagħtikom ir-risq il-lejla, ibni; iħenn għalikom u jagħtikom is-sliem.”

¹³Ragħwel sejjaħ lil bintu Sara, u meta ġiet, ħadilha idha u taha lil Tobija, u qallu: “Ħudha kif għandi nagħtihielek b’martek skont il-liġi u l-ordni li hemm miktuba fil-Ktieb ta’ Mosè. Żommha għalik, u ħudha għand missierek qawwija u sħiħa. Alla tas-smewwiet iwassalkom bis-sliema.”

¹⁴U sejjaħ lil ommha, u qalilha biex iġġib karta, u kiteb il-kitba taż-żwieġ, u hekk tahielu b’martu, skont l-ordni tal-Liġi ta’ Mosè. U minn dak il-ħin bdew jieklu u jixorbu.

¹⁵Ragħwel sejjaħ lil martu Għedna, u qalilha: “Oħti, lesti l-kamra l-oħra tar-rqad, u daħħal fiha lil Sara.”

¹⁶Għedna marret u lestiet il-kamra kif qalilha, u daħħlet lil Sara fiha bid-dmugħ f’għajnejha minħabba fiha. Imbagħad ixxuttat id-dmugħ u qaltilha:

¹⁷“Agħmel il-qalb binti, Sid is-smewwiet jagħtik ir-risq wara dan l-għali kollu tiegħek. Qawwi qalbek, binti.” U ħarġet minn hemm.