Read Maltese Bible with DC – IL-BIBBJA IL-KOTBA MQADDSA TOBIT 8 Bible Online

TOBIT 8 - Maltese Bible with DC – IL-BIBBJA IL-KOTBA MQADDSA bible

TOBIT 8

¹Meta spiċċaw jieklu u jixorbu, u riedu jmorru jorqdu, ħadu ż-żagħżugħ u daħħluh fil-kamra tar-rqad.

²Tobija ftakar fi kliem Rafel: ħareġ il-fwied u l-qalb tal-ħuta mill-ħorġa li kellu miegħu; u qegħedhom fuq il-ġamar tal-bħur, u bdew idaħħnu.

³Ir-riħa tal-ħuta żammet ’il bogħod id-demonju[31], u ħarrbitu lejn l-Eġittu ta’ Fuq[32]. Minnufih Rafel mar hemm u rabtu sewwa.

⁴Meta l-oħrajn ħarġu u għalqu l-bieb tal-kamra, Tobija qam mill-friex u qalilha: “Oħti, qum, ħa nishru u nitolbu quddiem Sidna, li jagħmel ħniena magħna u jsalvana.” Sara qamet u bdew jitolbu bil-ħniena s-salvazzjoni u jgħidu:

⁵“Imbierek int, o Alla ta’ missirijietna, u mbierek ismek għal dejjem ta’ dejjem. Iberkuk is-smewwiet u l-ħolqien kollu għal dejjem ta’ dejjem.

⁶Int għamilt lil Adam, u tajtu b’martu lil Eva bħala għajnuna u appoġġ, u minnhom it-tnejn tnisslu l-bnedmin. U int għedt: ‘Mhux sewwa li r-raġel jibqa’ waħdu, ħa nagħmlu għajnuna li tkun tixbhu.’

⁷U issa jien lil din oħti ma żżewwiġthiex għall-passjoni tal-ġisem, imma fis-sewwa. Agħmel ħniena miegħi u magħha ħa nixjieħu flimkien.”

⁸U qalu flimkien it-tnejn: “Ammen. Ammen.”

⁹U dak il-lejl raqdu.

¹⁰Ragħwel qam u sejjaħ in-nies ta’ daru li kienu miegħu u marru flimkien iħaffru l-qabar. Għax hu ħaseb: “Li ma jmurx imut; għallinqas ma jidħkux bina u jwaqqgħuna għaż-żuffjett.”

¹¹U meta ħaffru l-qabar, Ragħwel mar id-dar, u sejjaħ lil martu,

¹²u qalilha: “Ibgħat lil xi waħda mill-qaddejja ħa tidħol tara hux ħaj jew mejjet; fil-każ nidfnuh bla ma jkun jaf ħadd.”

¹³U bagħtu l-qaddejja u xegħlet il-musbieħ u fetħet il-bieb; daħlet u sabithom reqdin flimkien fil-fond.

¹⁴U l-qaddejja ħarġet tgħidilhom li kien ħaj u ma kien ġralu ebda ħsara.

¹⁵U bierku lil Alla tas-sema u qalu: “Imbierek int, o Alla; inberkuk minn qalbna; iberkuk il-qaddisin għal dejjem ta’ dejjem.

¹⁶Imbierek int li mlejtni bil-ferħ, u ma ġarax kif kont ħsibt jien; imma mxejt magħna skont il-kobor tal-ħniena tiegħek.

¹⁷Imbierek int, o Sid, li ħennejt għal dawn iż-żewġ ulied waħdiena. Ħenn għalihom, żommhom qawwijin u sħaħ, u imlielhom ħajjithom bl-hena u l-faraġ.”

¹⁸Ragħwel imbagħad ordna lin-nies tiegħu jordmu l-qabar qabel ma jisbaħ.

¹⁹U qal lil martu tlesti ħafna ħobż, u hu mar il-maqjel u ġieb żewġ baqriet u erba’ mtaten, u ordna li jsajruhom u bdew ilestu.

²⁰Imbagħad sejjaħ lil Tobija, u qallu: “Ma titħarrikx minn hawn qabel erbatax-il jum, imma tibqa’ hawn tiekol u tixrob għandi u tferraħ lil binti wara dan l-għali kollu li għaddiet minnu.

²¹Minn kulma għandi ħu nofsu issa stess, u mur qawwi u sħiħ għand missierek. In-nofs l-ieħor ħudu meta mmut jien u marti; kollox tiegħek. Agħmel il-qalb, ibni, jiena missierek u Għedna ommok; minn issa ’l quddiem aħna miegħek u ma’ oħtok għal dejjem. Qawwi qalbek ibni!”