Read Maltese Bible with DC – IL-BIBBJA IL-KOTBA MQADDSA ĠUDITTA 1 Bible Online

ĠUDITTA 1 - Maltese Bible with DC – IL-BIBBJA IL-KOTBA MQADDSA bible

ĠUDITTA 1

¹Kienet is-sena tnax tas-saltna ta’ Nabukodonosor sultan tal-Assiri[1], fil-belt kbira ta’ Ninwè, fi żmien Arfaksad[2], sultan tal-Medi, fil-belt ta’ Ekbatana.

²Dan dawwar il-belt ta’ Ekbatana b’ħajt ta’ ġebel minġur, kull waħda għolja tlitt idriegħ u twila sitta, għoli sebgħin driegħ, fuq sisien ta’ ħamsin driegħ wisa’.

³Maġenb il-bibien tal-belt tella’ torrijiet għoljin mitt driegħ, fuq sisien wiesgħa sittin.

⁴Bena l-bibien tal-belt għoljin sebgħin driegħ fuq wisa’ ta’ erbgħin, biex minnhom jgħaddi l-eżerċtu bl-aħjar gwerriera, u l-qtajja’ mqassma tal-fanterija.

⁵F’dak iż-żmien Nabukodonosor għamel gwerra kontra s-sultan Arfaksad fil-wita l-kbira li tinsab fl-inħawi ta’ Ragaw.

⁶Ma’ dan ingħaqdu n-nies kollha tal-muntanji u dawk kollha li kienu jgħammru max-xtut tal-Ewfrat, it-Tigri, il-Ħidaspi[3], u l-witat ta’ Arjok, sultan tal-Għelamin. Hekk ingħaqdu flimkien ħafna ġnus biex jgħinnu lil ulied Kelewd.

⁷Nabukodonosor, sultan tal-Assiri, bagħat messaġġiera lill-popli li jgħammru fil-Persja u lil dawk li jgħammru fil-Punent: iċ-Ċiliċja, Damasku, il-Libanu, u l-Antilibanu, u matul ix-xtut tal-baħar;

⁸u lill-popli tal-Karmel u ta’ Gilgħad, u tal-Galilija ta’ fuq, u l-medda l-kbira ta’ Esdrelon[4];

⁹u n-nies kollha tas-Samarija, u l-ibliet tagħha, u l-inħawi tan-naħa l-oħra tal-Ġordan sa Ġerusalemm, u Betani, u Kelus u Kades sax-xmara tal-Eġittu, u Tafnes u Ragħmses, u l-art kollha ta’ Gosen,

¹⁰sa lil hinn minn Tani u Memfi, u n-nies kollha li jgħammru fl-Eġittu, sal-fruntieri tal-Etjopja.

¹¹Iżda n-nies ta’ dawn l-artijiet, kollha kemm huma, ma tawx widen għall-kliem ta’ Nabukodonosor, sultan tal-Assiri, u anqas ma marru jgħinuh fil-gwerra, għax ma kinux jibżgħu minnu. Għalihom kien bniedem bħal ħaddieħor u bagħtu lura l-messaġġiera tiegħu quddiemu bla ġieħ u b’idejhom vojta.

¹²Nabukodonosor saħan bis-sħiħ kontra dawn l-artijiet kollha, u ħalef fuq it-tron u s-saltna tiegħu li jivvendika ruħu mill-inħawi kollha taċ-Ċiliċja, Damasku u s-Sirja, u jeqred bix-xabla tiegħu n-nies ta’ Mowab, u wlied Għammon, u n-nies li jgħammru fil-Lhudija, u ’l dawk kollha tal-Eġittu, sa trufijiet iż-żewġt ibħra[5].

¹³Fis-sena sbatax tas-saltna tiegħu Nabukodonosor ħareġ bl-eżerċtu tiegħu kontra s-sultan Arfaksad, u għelbu fil-battalja; u ħarbat l-eżerċtu kollu ta’ Arfaksad bil-kavallerija u l-karrijiet kollha tiegħu.

¹⁴Ħataf f’idejh l-ibliet kollha tiegħu, u wasal sa Ekbatana, ħatt it-torrijiet tagħha, ħarbat il-pjazez tagħha, u biddel ġmielha f’għajb.

¹⁵Imbagħad qabad lil Arfaksad fuq il-muntanji ta’ Ragaw, u hemm nifdu bil-vleġeġ, u qerdu darba għal dejjem.

¹⁶Imbagħad Nabukodonosor raġa’ lura f’Ninwè, hu u l-eżerċtu mħallat tiegħu, kotra kbira ta’ gwerriera, u baqa’ hemm għal mija u għoxrin jum, jistrieħ u jixxala.