Read Maltese Bible with DC – IL-BIBBJA IL-KOTBA MQADDSA ĠUDITTA 10 Bible Online

ĠUDITTA 10 - Maltese Bible with DC – IL-BIBBJA IL-KOTBA MQADDSA bible

ĠUDITTA 10

¹Meta Ġuditta temmet tgħajjat quddiem Alla ta’ Iżrael u qalet dan kollu,

²qamet mill-art, u sejħet lill-qaddejja tagħha, u niżlet fid-dar fejn kienet toqgħod fis-Sibtijiet u fil-festi;

³neħħiet il-libsa tax-xkejjer li kellha fuqha, neżgħet l-ilbies tar-romol, inħaslet bl-ilma, indilket bi fwieħa qawwija, għamlet xagħarha, dawret faxxa ma’ rasha, u libset ilbies tal-ferħ, li kienet tiżżejjen bih meta kien għadu ħaj żewġha Manassi.

⁴Xiddet is-sandli f’riġlejha u libset il-ħoloq mal-għekiesi, il-brazzuletti, iċ-ċrieket, l-imsielet u t-tiżjin tagħha kollu. Iżżejnet ħafna, b’mod li tolqot għajnejn l-irġiel li setgħu jarawha.

⁵Tat imbagħad lill-qaddejja tagħha żaqq bl-inbid u kus biż-żejt; imlitilha ħorġa bil-qamħ inkaljat, tin imqadded u ħobż mill-aħjar. Għabbithulha, u dik ġarret kollox.

⁶U ħarġu, irħewlha lejn il-bieb tal-belt ta’ Betulja. Hemm sabu lil Għużżija jistennieha mal-anzjani tal-belt, Kabri u Karmi.

⁷Malli raw kif tbiddlet f’wiċċha u lbiesha, baqgħu mistagħġba għall-aħħar bi ġmielha u qalulha:

⁸“Jalla jagħtik ir-risq Alla ta’ missirijietna, u jwettaq ħsibijietek għall-glorja tal-poplu ta’ Iżrael, u l-foħrija ta’ Ġerusalemm.”

⁹Ġuditta niżżlet wiċċha mal-art u qiemet lil Alla u qaltilhom: “Ordnaw li jiftħuli l-bibien u jien noħroġ biex intemm dak li qegħdin tgħidu!” U huma ordnaw lill-qaddejja biex jiftħulha kif qaltilhom.

¹⁰Hekk għamlu, u Ġuditta ħarġet, hi u l-qaddejja magħha. U l-irġiel tal-belt baqgħu jħarsu lejha sa ma niżlet l-għolja u sakemm qasmet il-wied, u ma rawhiex aktar.

¹¹It-tnejn baqgħu sejrin dritt lejn il-wied. Iltaqgħu magħha l-għases ta’ quddiem tal-Assiri;

¹²qabduha u staqsewha: “Minn liema nies int? Mnejn ġejja? Fejn sejra?” U hi wieġbet: “Jien bint l-Għebrej[18], u ħrabt minn magħhom għax waslu biex jintelqu f’idejkom biex tibilgħuhom.

¹³Jien sejra quddiem Oloferne, il-kap kmandant tal-eżerċtu tagħkom, biex inħabbarlu s-sewwa u nurih it-triq li minnha għandu jgħaddi, u jaħtaf l-għoljiet kollha, bla ma jindarab u lanqas jitlef ħajtu wieħed min-nies tiegħu.”

¹⁴Huma u jisimgħu kliemha kiluha bil-ħars lejn wiċċha, u ħassew quddiemhom ġmiel tal-għaġeb, u qalulha:

¹⁵“Int salvajt ħajtek meta fittixt u ħaffift tinżel għal quddiem sidna. Issa ibqa’ sejra lejn it-tinda tiegħu u xi wħud minna jwassluk, sakemm jerħuk f’idejh.

¹⁶Meta tkun quddiemu, tibżax u taqtax qalbek, imma għidlu li għedt lilna, u huwa jġib ruħu tajjeb miegħek.”

¹⁷Imbagħad għażlu mitt ruħ minn tagħhom, qiegħdu lilha u lill-qaddejja tagħha f’nofshom, u ħaduhom sat-tinda ta’ Oloferne.

¹⁸Kien hemm ċaqliqa kbira mal-kamp kollu, għaliex l-aħbar tal-wasla tagħha xterdet mat-tined. Ilkoll ġew u qagħdu madwarha, hi u kienet tistenna ħdejn it-tinda ta’ Oloferne, sakemm marru jgħidulu biha.

¹⁹Baqgħu mistagħġba bi ġmielha, u b’ulied Iżrael minħabba fiha, u bdew jgħidu lil xulxin: “Min jista’ jistmerr poplu bħal dan, li għandu ġo nofsu nisa bħal din? Mhux ta’ min iħalli ħajja rġiel bħal dawn, għax jekk inħalluhom jistgħu idawru ras id-dinja kollha.”

²⁰Imbagħad l-għases ta’ Oloferne u l-qaddejja ta’ madwaru ġew u daħħluha fit-tinda.

²¹Oloferne kien mistrieħ fuq divan b’kanopew fuqu maħdum mill-porpra u d-deheb, bl-iżmerald u l-ħaġar prezzjuż minsuġ fih.

²²Meta qalulu biha ħareġ fin-naħa ta’ quddiem fit-tinda, b’lampi tal-fidda quddiemu.

²³Malli Ġuditta resqet quddiem Oloferne u l-qaddejja tiegħu, stagħġbu lkoll bil-ġmiel ta’ wiċċha. Hi nxteħtet wiċċha fl-art tqimu, u qajmuha l-qaddejja tiegħu.