Read Maltese Bible with DC – IL-BIBBJA IL-KOTBA MQADDSA ĠUDITTA 15 Bible Online

ĠUDITTA 15 - Maltese Bible with DC – IL-BIBBJA IL-KOTBA MQADDSA bible

ĠUDITTA 15

¹Malli n-nies fit-tined semgħu dan kollu, baqgħu miblugħa b’li ġara.

²Qabdithom rogħda, u waqa’ fuqhom il-biża’; u ħadd ma baqa’ ħdejn sieħbu, infixlu, u b’ġirja waħda ħarbu lkoll minn kull triq tal-wita u l-għoljiet.

³U ħarbu wkoll dawk li kienu fil-kampijiet fuq l-għoljiet madwar Betulja. In-nies ta’ Iżrael, imbagħad, kull min fosthom kien kapaċi jġorr l-armi, intefgħu għal fuqhom.

⁴Għużżija bagħat f’Betomestajm f’Bebaj, Ħoba u Kola u fl-art kollha ta’ Iżrael messaġġiera jgħidulhom b’kulma ġara biex ilkoll joħorġu għal wara l-għedewwa u jeqirduhom.

⁵Malli semgħu n-nies ta’ Iżrael, dawn inxteħtu fuqhom ilkoll flimkien, u għamlu ħerba minnhom sa Ħoba. Bl-istess ħsieb għamlu hekk ukoll in-nies ta’ Ġerusalemm u dawk tal-għoljiet għax huma wkoll għarrfuhom b’kulma ġara fil-kamp tal-għedewwa tagħhom. In-nies ta’ Gilgħad u dawk tal-Galilija ħabtu għalihom mill-ġnub u tawhom xebgħa kbira sakemm qabżu ’l Damasku u trufijietha.

⁶Il-bqija tan-nies ta’ Betulja nxteħtu għal fuq il-kamp tal-Assiri, neżżgħuh minn kollox u ħadu priża kbira.

⁷Xħin reġgħu lura mit-taqtigħa, in-nies ta’ Iżrael ħatfu f’idejhom dak li kien baqa’, u l-irħula u l-irziezet fl-għoljiet u fil-wita kisbu priża kbira għax kien hemm ħafna x’jieħdu.

⁸U Ġojakim, il-qassis il-kbir, u l-kunsill tal-anzjani tal-poplu ta’ Iżrael, li kien f’Ġerusalemm, marru biex jaraw il-ġid li għamel il-Mulej ma’ Iżrael; jaraw lil Ġuditta u jsellmulha.

⁹Malli resqu lejha, bdew ifaħħruha lkoll b’leħen wieħed u jgħidulha: “Bik titkabbar Ġerusalemm! Bik jiftaħar Iżrael! Int il-foħrija tal-poplu tagħna!

¹⁰Għamilt dan kollu b’ħiltek! Għamilt il-ġid lil Iżrael, u dan għoġbu lil Alla! Tkun imbierka mill-Mulej, li jista’ kollox, għal dejjem ta’ dejjem!” U l-poplu kollu wieġeb: “Ammen!”

¹¹Għal tletin jum sħiħ dam il-poplu jġorr mill-kamp. U taw lil Ġuditta t-tinda ta’ Oloferne, il-fided u d-divani, il-buqari u l-għamara kollha li kellu. Ħadithom u għabbiethom fuq il-bagħla tagħha, armat il-karrettuni u għabbiet kollox fuqhom.

¹²Imbagħad ħarġu jiġru n-nisa kollha ta’ Iżrael biex jarawha u jfaħħruha, u xi wħud minnhom bdew jiżfnulha quddiemha. Ġuditta ħadet il-friegħi tas-siġar f’idejha u qassmithom lin-nisa ta’ madwarha.

¹³U dawru ma’ rashom il-friegħi taż-żebbuġ, hi u n-nisa li kienu magħha; u hi ħarġet tiżfen quddiem il-poplu kollu, bin-nisa kollha warajha; ingħaqdu wkoll magħhom l-irġiel ta’ Iżrael bl-armi fuqhom, bil-girlandi f’rashom, u bl-għana fuq fommhom. Ġuditta intunat innu ta’ tifħir f’nofs Iżrael, u l-poplu kollu ngħaqad magħha b’leħen għoli f’din l-għanja: