Read Maltese Bible with DC – IL-BIBBJA IL-KOTBA MQADDSA ĠUDITTA 16 Bible Online

ĠUDITTA 16 - Maltese Bible with DC – IL-BIBBJA IL-KOTBA MQADDSA bible

ĠUDITTA 16

¹“Għannu bit-tnabar lil Alla; għannu biċ-ċimbali lill-Mulej; insġulu salmi u innijiet; faħħruh u sejħu ismu.

²“Il-Mulej hu Alla li jeqred il-gwerer; waqqaf il-kamp f’nofs il-poplu tiegħu, ħelisni minn idejn dawk li kienu jiġru warajja.

³“Niżel l-Assir mill-għoljiet tat-Tramuntana; Niżel bl-eluf tal-eżerċti tiegħu; il-kotra tiegħu mliet il-widien, u ż-żwiemel ksew l-għoljiet.

⁴“Qal li jrid jaħraq l-art tiegħi, jinfed iż-żgħażagħ bis-sejf, isabbat it-trabi mal-art, jitlaq it-tfal għall-priża, u xbejbiet tiegħi għaż-żebliħ.

⁵Iżda l-Mulej li jista’ kollox, bi driegħ mara ġiebhom fix-xejn.

⁶Mhux bis-saħħa taż-żgħażagħ waqa’ l-qalbieni tagħhom; ma għelbuhx il-ġganti l-kbar, ma ħakmuhx ulied il-ġorfijiet; imma b’seħer ġmiel wiċċha qerditu Ġuditta bint Merari.

⁷“Neħħiet minn fuqha lbies ir-romol, biex terfa’ l-magħkusa ta’ Iżrael. Dilket wiċċha bil-fwieħa qawwija;

⁸dawret xagħrha b’faxxa ma’ rasha; libset l-għażel biex tqarraq bih.

⁹“Is-sandli tagħha seraqlu għajnejh; il-ġmiel tagħha jassarlu qalbu; ix-xabla ħanxritlu għonqu.

¹⁰“Il-Persjani triegħdu bis-sogru tagħha, u bi qlubitha tkexkxu l-Medi.

¹¹“Għajtu l-magħkusin u l-għadu beża’; għajtu d-dgħajfin, u l-għadu twerwer; għollew leħinhom, u l-għadu ħarab!

¹²“Ulied l-ilsiera bniet nifduhom; u ferewhom qishom ilsiera maħrubin; intemmu fix-xejn quddiem l-eżerċtu tal-Mulej.

¹³Għanja ġdida jien ngħanni lil Alla tiegħi; Mulej, int kbir u glorjuż; tal-għaġeb il-qawwa tiegħek ma jegħlbek ħadd!

¹⁴“Ħa jaqduk il-ħlejjaq kollha, għax int għedt kelma, u kollox sar. Int bgħatt l-ispirtu tiegħek u ħalaqhom; m’hemm xejn li jieqaf lill-kelma tiegħek.

¹⁵“Il-muntanji u l-ibħra jitheżżu mis-sisien; u l-blat quddiemek jinħall bħax-xama’; iżda għal dawk li jibżgħu minnek; m’għandekx ħlief ħniena.

¹⁶“Ftit jiswa s-sagrifiċċju jfuħ quddiemek; u ftit li xejn hu x-xaħam tal-vittmi maħruqa; imma kbir hu għal dejjem min jibża’ mill-Mulej.

¹⁷“Ħażin għall-ġnus li jqumu għall-poplu tiegħek. Iħallashom il-Mulej setgħani f’jum il-ħaqq. Nar u dud jibgħat f’laħamhom, u bl-uġigħ għal dejjem jibqgħu jibku.”

¹⁸Meta mbagħad waslu Ġerusalemm, marru jaduraw lil Alla; u malli l-poplu tnaddaf, offrew is-sagrifiċċji, l-offerti u d-doni tagħhom.

¹⁹Ġuditta qabdet it-tinda sħiħa ta’ Oloferne li kien taha l-poplu, u l-kurtinaġġ, li kienet ħadet mill-kamra tar-rqad tiegħu, u offriet kollox lil Alla bħala ħaġa qaddisa.

²⁰Il-poplu għadda tliet xhur jifraħ quddiem is-santwarju f’Ġerusalemm; u Ġuditta baqgħet magħhom.

²¹Wara dan iż-żmien kulħadd raġa’ lura għal daru; Ġuditta marret Betulja, u hemm baqgħet tieħu ħsieb ħwejjiġha; u kienet magħrufa mal-pajjiż kollu tul għomorha.

²²Ħafna kieku xtaqu jiżżewġuha; iżda ħadd ma kellu x’jaqsam magħha tul ħajjitha minn mindu miet żewġha Manassi u ngħaqad mal-poplu tiegħu.

²³Ġuditta kibret ħafna fil-ġieħ u xjieħet f’dar żewġha u laħqet il-mija u ħames snin; u tat il-ħelsien lill-qaddejja tagħha. Mietet f’Betulja u difnuha fl-għar ta’ żewġha Manassi.

²⁴Bkieha l-poplu kollu ta’ Iżrael għal sebat ijiem. Qabel ma mietet qassmet ġidha lil qrabat ta’ żewġha Manassi u lin-nies tal-familja tagħha.

²⁵Fi żmien Ġuditta[20], u għal ħafna żmien wara mewtha, ma kien hemm ħadd li seta’ jbażża’ lill-poplu ta’ Iżrael.