Read Maltese Bible with DC – IL-BIBBJA IL-KOTBA MQADDSA ĠUDITTA 2 Bible Online

ĠUDITTA 2 - Maltese Bible with DC – IL-BIBBJA IL-KOTBA MQADDSA bible

ĠUDITTA 2

¹Fis-sena tmintax, fit-tnejn u għoxrin jum tal-ewwel xahar, fil-palazz ta’ Nabukodonosor, sultan tal-Assiri, ħarġet il-kelma li s-sultan kien se jivvendika ruħu mill-artijiet kollha, kif kien qal.

²Hu sejjaħ il-ministri u l-kbarat kollha tiegħu, u wriehom il-pjan sigriet tiegħu u għarrafhom bi kliemu stess bil-ħażen ta’ dawk l-artijiet.

³U ddeċidew li jeqirdu kull bniedem li ma joqgħodx għall-kelma li ħarġet minn fommu.

⁴U ġara li malli wriehom il-ħsieb tiegħu, Nabukodonosor, sultan tal-Assiri, sejjaħ lil Oloferne[6], il-ġeneral kmandant tal-eżerċtu tiegħu, u li kien jiġi warajh, u qallu:

⁵“Dan jgħid is-Sultan il-Kbir, sid l-art kollha: ‘Ara, oħroġ minn quddiemi u ħu miegħek nies, żguri mill-ħila tagħhom stess, sa mija u għoxrin elf suldat u tnax-il elf kavallerija, biż-żwiemel u r-rikkieba,

⁶u mur u aħbat għall-artijiet kollha tal-Punent, għax ma obdewx l-ordnijiet tiegħi.

⁷Għidilhom biex ilestu trab u ilma[7], għax jien ħiereġ għalihom bil-qilla kollha tiegħi, niksi l-wiċċ kollu ta’ arthom b’riġlejn is-suldati tiegħi, u nerħihom priża f’idejhom.

⁸U l-midrubin tagħhom jimlew il-widien, u kull nixxiegħa u xmara timtela u tfur bil-mejtin tagħhom;

⁹il-bqija nġorrhom ilsiera sal-ibgħad trufijiet tal-art.

¹⁰Mur qabli u aqbad f’idejk il-medda tal-artijiet kollha qabel ma niġi jien. U ’l dawk li jintelqu f’idejk, żommhomli għal meta jasal il-jum li nagħmel il-kontijiet magħhom.

¹¹Imma lil dawk li ma jobdux, tqishom xejn, taħfirha lil ħadd minnhom, agħtihom il-mewt, u eqridhom mill-art kollha tiegħek.

¹²Daqs kemm jien ħaj, u bil-jedd kollu ta’ saltnati, hekk għedt u hekk nagħmel b’idi[8].

¹³Qis li int ma tiksirx anqas wieħed mill-ordnijiet ta’ sidek; imma qis li tagħmel kulma ordnajtlek, u la ddumx ma tagħmel dan.”

¹⁴Oloferne ħareġ minn quddiem sidu, sejjaħ il-kmandanti kollha, il-ġenerali u l-kaptani tal-eżerċtu tal-Assirja,

¹⁵u għażel l-aħjar nies għall-battalja kif ordnalu sidu, mija u għoxrin elf suldat u tnax-il elf arċier fuq iż-żwiemel;

¹⁶u qassamhom kif jitqassam eżerċtu għall-gwerra.

¹⁷Ħa mbagħad kotra kbira ta’ iġmla, ħmir u bgħula għat-tagħbija, u għadd bla tarf ta’ nagħaġ, baqar u mogħoż għall-għajxien tagħhom;

¹⁸ħa wkoll ikel għal kull raġel, u kotra kbira ta’ deheb u fidda mit-teżor tas-sultan.

¹⁹Imbagħad ħareġ bl-eżerċtu kollu tiegħu biex imur qabel is-sultan Nabukodonosor, bl-imriekeb u l-kavallerija u l-fanterija magħżula tiegħu, biex bihom jiksi wiċċ l-art kollha tal-Punent.

²⁰Magħhom telqet ukoll kotra kbira daqs it-trab tal-art ta’ kull xorta ta’ nies, qishom sħaba ta’ ġradijiet - kotra bla qjies.

²¹Telqu minn Ninwè, u wara tlitt ijiem mixi waslu fil-wita ta’ Bektilet, u waqqfu l-kamp ’l hemm minn Bektilet, ħdejn il-muntanja li taħbat fuq ix-xellug taċ-Ċiliċja ta’ fuq.

²²Minn hemm imbagħad ħa l-forzi tiegħu kollha - fanterija, kavallerija u karrijiet - u rħielha lejn il-muntanji;

²³ħarbat l-art ta’ Put u Lud[9], u ħataf il-ġid tal-poplu ta’ Rassis u tal-Ismagħelin li jgħammru f’tarf id-deżert in-naħa tan-Nofsinhar ta’ art il-Kellijin.

²⁴U mbagħad għadda l-Ewfrat, u qassam il-Mesopotamja u qered l-ibliet kollha ffortifikati li kienu jinsabu matul il-wied Abron, u wasal sa ħdejn il-baħar.

²⁵Ħa taħt idejh il-muntanji taċ-Ċiliċja, u qered lil dawk kollha li waqfulu, u wasal sa truf Ġafet lejn in-Nofsinhar biswit l-Għarabja.

²⁶Dawwar il-Midjanin kollha, ħarqilhom l-għerejjex u ħatfilhom l-imrieħel.

²⁷U niżel fil-wita ta’ Damasku fi żmien il-ħsad tal-qamħ, ħarqilhom l-għelieqi, u ħarbtilhom l-imrieħel tan-nagħaġ u l-baqar, u ħatfilhom kulma kien hemm fl-ibliet, ħarbtilhom ir-raba’, u qatlilhom iż-żgħażagħ b’xifer ix-xabla.

²⁸U qabadhom il-biża’ u t-tregħid dawk kollha li kienu jgħammru fi xtut il-baħar, dawk ta’ Sidon u Tir, ta’ Sur u Okina; u dawk ta’ Ġamnija, u ta’ Ażotu u Askalon baqgħu mwerwra bil-biża’.