Read Maltese Bible with DC – IL-BIBBJA IL-KOTBA MQADDSA ĠUDITTA 4 Bible Online

ĠUDITTA 4 - Maltese Bible with DC – IL-BIBBJA IL-KOTBA MQADDSA bible

ĠUDITTA 4

¹Il-poplu kollu ta’ Iżrael, li kien jgħammar fil-Lhudija, sama’ b’kulma kien għamel bil-ġnus Oloferne, il-ġeneral ta’ Nabukodonosor, sultan tal-Assiri, u kif seraq is-santwarji kollha tagħhom u ġarrafhom;

²u qabadhom biża’ kbir minħabba fih, u bdew jinkwetaw ħafna minħabba Ġerusalemm u t-tempju tal-Mulej, Alla tagħhom;

³għax kienu għadhom kemm reġgħu lura mill-eżilju[11], u ma kienx ilu ħafna li l-poplu nġabar mil-Lhudija kollha u qaddsu mill-ġdid it-tagħmir, l-artal u t-tempju, li qabel kienu mniġġsa.

⁴U bagħtu nies fl-inħawi kollha tas-Samarija, f’Kona, Betħoron, Belmajn, Ġeriko, Ħoba, Esora, u Wied Salem,

⁵u qabdu malajr il-qċaċet tal-għoljiet u dawru bis-swar l-irħula, u ħażnu l-ikel bi tħejjija għall-gwerra, għax kienu għadhom kif ħasdu l-uċuħ tar-raba’ tagħhom.

⁶Ġojakim[12], il-qassis il-kbir, li dak iż-żmien kien Ġerusalemm, kiteb lil dawk kollha li kienu joqogħdu f’Betulja u Betamajm, li hi biswit Esdrelon, quddiem il-pjanura qrib Dotajn,

⁷u ordnalhom li jżommu l-mogħdijiet bejn il-muntanji, għax minnhom wieħed kien jista’ jidħol fil-Lhudija, u kienet ħaġa ħafifa ħafna li jżommu lil min kien irid jidħol minnha, għax il-mogħdija kienet dejqa, u tnejn min-nies biss setgħu jgħaddu spalla ma’ spalla.

⁸Ulied Iżrael għamlu kif ordnalhom Ġojakim[13], il-qassis il-kbir, u l-kunsill tal-poplu kollu ta’ Iżrael li kienu f’Ġerusalemm.

⁹Kull bniedem f’Iżrael għolla leħnu lejn Alla[14] b’ħeġġa kbira u għakksu ruħhom b’ħafna sawm.

¹⁰Ilkoll kemm kienu, irġiel u nisa, it-tfal u l-bhejjem tagħhom, il-barranin kollha, il-ħaddiema u l-ilsiera tagħhom, ilkoll kemm kienu, xeħtu fuqhom ix-xkejjer.

¹¹U kull raġel u mara f’Iżrael, it-tfal u kull min kien joqgħod Ġerusalemm, inxteħtu quddiem is-santwarju, u xeħtu l-irmied fuq rashom u firxu l-ilbies tax-xkejjer quddiem il-Mulej.

¹²Ksew ukoll l-artal bix-xkejjer u kollhom ħeġġa għajtu għalenija quddiem Alla ta’ Iżrael biex ma jħallix li jaħtfulhom it-tfal, jeħdulhom in-nisa lsiera, u jħarbtulhom l-ibliet li kienu kisbu, u jżebilħulhom is-santwarju, u jwaqqgħuh għaċ-ċajt u t-tagħjir tal-pagani.

¹³Il-Mulej sama’ t-talb tagħhom u ħares lejn l-hemm tagħhom. Il-poplu kien ilu jsum għal ħafna ġranet fil-Lhudija kollha, u f’Ġerusalemm quddiem is-santwarju tal-Mulej li jista’ kollox.

¹⁴Ġojakim, il-qassis il-kbir, u l-qassisin kollha li kienu fit-tempju quddiem il-Mulej, u dawk li kienu jservu lill-Mulej, libsu u tħażżmu bix-xkejjer, u kienu joffru s-sagrifiċċju ta’ kuljum, u jressqu l-wegħdi u l-offerti minn raj il-poplu.

¹⁵Xeħtu l-irmied fuq it-turbanti tagħhom u kienu jgħajtu b’kemm kellhom saħħa quddiem il-Mulej, biex jieħu ħsieb id-dar ta’ Iżrael u jġibilhom ir-risq.