Read Maltese Bible with DC – IL-BIBBJA IL-KOTBA MQADDSA ĠUDITTA 5 Bible Online

ĠUDITTA 5 - Maltese Bible with DC – IL-BIBBJA IL-KOTBA MQADDSA bible

ĠUDITTA 5

¹Oloferne, il-ġeneral kmandant tal-eżerċtu tal-Assiri, ħabbrulu li wlied Iżrael kienu qegħdin jitħejjew għall-gwerra, u għalhekk ħatfu f’idejhom il-mogħdijiet lejn il-muntanji, u dawru bil-ħitan il-qċaċet tal-ogħla muntanji, u mlew il-pjanuri bit-tfixkil.

²U għadab bis-sħiħ, u sejjaħ il-kapijiet kollha ta’ Mowab, u l-kmandanti ta’ Għammon, u l-gvernaturi tax-xtut,

³u qalilhom: “Għiduli intom, nies ta’ Kangħan, x’inhu dan il-poplu li jgħammar fil-muntanji? Liema huma l-ibliet li joqogħdu fihom? X’inhu l-għadd tal-eżerċtu? Mnejn hi ġejja l-forza u l-ħila tagħhom? Min hu s-sultan ta’ fuqhom li jmexxi l-eżerċtu tagħhom?

⁴Għala ma ridux jiġu jilqgħuni bħal ma għamlu n-nies kollha tal-Punent?”

⁵U wieġeb Aħjor[15], il-kap tal-Għammonin kollha: “Ħa jisma’ sidi kelma waħda minn fomm il-qaddej tiegħu, u jien ngħidlek is-sewwa kollu dwar dan il-poplu, li jgħammar fuq dawn il-muntanji, li tinsab qribhom; ebda gidba ma toħroġ minn fomm il-qaddej tiegħek.

⁶“Dan il-poplu hu nisel il-Kaldin;

⁷għall-ewwel kien jgħammar fil-Mesopotamja, għaliex ma ridux jimxu wara l-allat ta’ missirijiethom, li kien hemm fl-art tal-Kaldin;

⁸telqu d-drawwiet ta’ missirijiethom u bdew jaduraw lil Alla tas-smewwiet, lil Alla li huma għarfu. Imbagħad keċċewhom minn quddiem l-allat tagħhom, ħarbu lejn il-Mesopotamja u qagħdu hemm għal ħafna żmien.

⁹U Alla tagħhom qalilhom biex joħorġu minn fejn kienu joqogħdu u jmorru Kangħan, fejn bdew jgħammru u stagħnew bid-deheb u l-fidda u b’kotra kbira ta’ mrieħel.

¹⁰Meta mbagħad waqa’ l-ġuħ fuq wiċċ l-art ta’ Kangħan, huma niżlu l-Eġittu u qagħdu hemm sakemm setgħu jsibu x’jieklu. Hemm saru kotra kbira u n-nisel tagħhom kien bla qjies.

¹¹Iżda qam kontrihom is-sultan tal-Eġittu, u qarraq bihom u għabbiehom bix-xogħol tal-madum, għakkishom u ġiebhom ilsiera.

¹²Imbagħad għajtu quddiem Alla tagħhom, u dan darab l-art tal-Eġittu b’kastigi li għalihom ma kienx hemm fejqan. U l-Eġizzjani keċċewhom minn quddiemhom.

¹³Imbagħad Alla nixxef il-Baħar l-Aħmar quddiemhom,

¹⁴u qabbadhom it-triq lejn is-Sinaj u Kades-barnigħa, u gerrex lil dawk kollha li kienu jgħammru fid-deżert.

¹⁵Imbagħad għammru fl-art tal-Amurrin u farrku bil-forzi tagħhom in-nies ta’ Ħesbon. Qasmu l-Ġordan, u ħadu f’idejhom il-muntanji;

¹⁶u keċċew minn quddiemhom il-Kangħanin, il-Periżżin, il-Ġebusin, lil dawk li kienu f’Sikem, u lill-Girgasin kollha, u baqgħu jgħammru fiha għal ħafna żmien.

¹⁷U sakemm ma dinbux kontra Alla tagħhom kellhom ir-risq, għax għandhom magħhom Alla li jobgħod il-ħażen.

¹⁸Imma meta tbiegħdu mit-triq li kienet mogħtija lilhom, inqerdu bil-ħafna gwerer u karkruhom ilsiera f’art li ma kinitx tagħhom, u ġarrfulhom it-tempju ta’ Alla tagħhom, u l-għedewwa tagħhom ħatfulhom l-ibliet.

¹⁹Iżda issa li kkonvertew lejn Alla tagħhom, reġgħu lura mill-artijiet fejn kienu mxerrda, reġgħu ħadu Ġerusalemm, fejn għandhom is-santwarju, u bdew jgħammru fil-muntanji li kienu mitluqa.

²⁰“Issa, sidi, ara jekk hemmx xi ħtija f’dan il-poplu, u jekk dinbux kontra Alla tagħhom; u jekk insibu dan it-tfixkil fihom, nitilgħu u naħbtu għalihom.

²¹Jekk iżda ma hemm ebda ħtija f’dan il-ġens, sidi, ibqa’ għaddej; għax il-Mulej, Alla tagħhom, ikun tarka għalihom, u d-dinja kollha tidħak bina.”

²²Meta Aħjor qal dan u temm kliemu, qamet għagħa kbira fost in-nies li kienu madwar it-tinda, u bdew igergru. Il-kbarat ta’ madwar Oloferne, u n-nies kollha li jgħammru fix-xtut, u fl-art ta’ Mowab bdew jitolbuh li jqattgħu bċejjeċ.

²³“Ma nħallux,” qalulu, “il-biża’ jegħlibna quddiem dan il-poplu ta’ Iżrael, poplu bla saħħa u bla ħila biex iżomm iebes quddiemna.

²⁴“Għalhekk nitilgħu għalihom, sidna Oloferne, u nagħmlu minnhom ikel għall-eżerċtu tiegħek.”