Read Maltese Bible with DC – IL-BIBBJA IL-KOTBA MQADDSA ĠUDITTA 7 Bible Online

ĠUDITTA 7 - Maltese Bible with DC – IL-BIBBJA IL-KOTBA MQADDSA bible

ĠUDITTA 7

¹L-għada Oloferne ordna lill-eżerċtu tiegħu kollu u n-nies li kienu ngħaqdu miegħu għall-gwerra biex jitilqu lejn Betulja, jaqbdu taħt idejhom il-mogħdijiet lejn il-muntanji, u jaħbtu għall-Iżraelin.

²Dak in-nhar stess telqu l-irġiel qalbiena tagħhom. L-eżerċtu tal-gwerriera kien ilaħħaq mal-mija u sebgħin elf fanterija u tnax-il elf kavallerija, barra dawk li kienu jieħdu ħsieb il-provvisti u oħrajn li kienu miexja magħhom - kotra tassew kbira.

³Waqqfu l-kamp fil-wied qrib Betulja, ħdejn l-għajn; il-kamp fil-wisa’ tiegħu kien jieħu lejn Dotajn sa Belmajn, u fit-tul minn Betulja sa Kijamun biswit Esdrelon.

⁴Kif raw dik il-kotra kollha, l-Iżraelin tħawdu sewwa u bdew jgħidu lil xulxin: “Dawn in-nies se jibilgħu l-art kollha, u la l-ogħla muntanji u la l-widien, u lanqas l-għoljiet, ma jifilħu l-piż tagħhom.”

⁵Imbagħad kull wieħed qabad l-armi, qabbdu n-nar fuq it-torrijiet, u qagħdu għassa l-lejl kollu.

⁶L-għada Oloferne ħareġ il-kavallerija kontra l-Iżraelin li kienu f’Betulja.

⁷Tkixxef il-mogħdijiet li kienu jieħdu għall-belt tagħhom, fittex l-għejun tal-ilma u ħadhom f’idejh, u qiegħed ġemgħat ta’ għases armati magħhom, u mbagħad raġa’ lura lejn niesu.

⁸Imbagħad resqu lejh il-kapijiet kollha ta’ wlied Għesaw, il-kapijiet kollha tal-poplu ta’ Mowab u l-kmandanti tax-xtajta, u qalulu:

⁹“Ħa jisma’ kelma, is-sid tagħna, biex ma tmurx tiġri xi ħsara fl-eżerċtu tiegħek.

¹⁰Għax dan il-poplu ta’ Iżrael ma jemminx fil-lanez, imma fil-qċaċet tal-muntanji fejn jgħammar; u mhijiex ħaġa ħafifa tilħaq il-qċaċet tal-għoljiet tagħhom.

¹¹Issa, mela, sidna, titqabadx magħhom bħalma titqabad f’battalja bit-taqsim tas-soltu, biex ma jintilef lanqas raġel wieħed biss min-nies tiegħek.

¹²Int ibqa’ għasses fil-kamp man-nies tal-eżerċtu tiegħek. Ħa jaqbdu f’idejhom il-qaddejja tiegħek l-għajn tal-ilma li tnixxi minn taħt il-muntanja,

¹³għax minn hemm imorru jimlew l-ilma n-nies kollha ta’ Betulja; u meta jeħodhom u jtemmhom l-għatx ikollhom jerħu l-belt f’idejk. Min-naħa tagħna, aħna u n-nies tagħna nitilgħu u nwaqqfu l-kamp fuq il-muntanji ta’ madwarhom, u ngħassu biex lanqas wieħed minnhom biss ma joħroġ mill-belt.

¹⁴Meta mbagħad jintemmu bil-ġuħ, huma, in-nisa u t-tfal tagħhom, qabel ma tilħaqhom ix-xabla, isibu ruħhom minxura fl-imsieraħ fejn jgħammru.

¹⁵Imbagħad int tkun tista’ tħallashom bid-deni talli qamu kontrik, u ma ġewx jilqgħuk bis-sliem.”

¹⁶Dan il-kliem għoġob lil Oloferne u l-ministri kollha tiegħu, u ordna li jsir kif qalu.

¹⁷Il-kamp tal-Għammonin iċċaqlaq, u ħamest elef Assir ħadu posthom fil-wied, u ħadu f’idejhom il-ħażniet tal-ilma u l-għejun tal-Iżraelin.

¹⁸Imbagħad in-nies ta’ Għesaw u l-Għammonin telgħu, u waqqfu l-kamp fuq l-għoljiet biswit Dotajn, biċċa marru lejn in-Nofsinhar u oħrajn lejn il-Lvant, biswit Ekrebel, li taħbat qrib Kus, fuq il-wied Mokmur. Il-bqija tal-eżerċtu tal-Assiri waqqaf il-kamp fil-wita, u ksew wiċċ l-art kollu; it-tined u l-provvisti tagħhom kienu bla qjies, u kienu kotra tassew kbira.

¹⁹Ulied Iżrael sejħu lill-Mulej, Alla tagħhom, għaliex bdew jaqtgħu qalbhom billi l-għedewwa tagħhom kienu dawruhom minn kullimkien, u ħadd ma sata’ jaħrab minn ġo nofshom.

²⁰L-eżerċtu tal-Assiri, il-fanterija, il-kavallerija u l-karrijiet, żammewhom magħluqa għal erbgħa u tletin jum sħaħ. In-nies ta’ Betulja naqsitilhom il-ħażna kollha tal-ilma;

²¹il-ġwiebi xxuttaw u ma kienx fadlilhom għal jum wieħed biss, għalkemm l-ilma kien jingħatalhom bil-qjies.

²²It-tfal tagħhom qatgħu qalbhom, u n-nisa u ż-żgħażagħ tagħhom infnew bil-għatx, u kienu jaqgħu fl-art fit-toroq tal-belt u d-daħliet tal-bibien, u ma kien baqgħalhom ebda saħħa.

²³Il-poplu kollu - żgħażagħ, nisa u tfal - inġabru madwar Għużżija u l-kapijiet tal-belt, u bdew jgħajtu b’leħen għoli u jgħidu lix-xjuħ;

²⁴“Ħa jiġġudika Alla bejnna u bejnkom, intom għamiltulna ħsara kbira meta ma fittixtux il-paċi tal-Assiri.

²⁵Issa ma għandna ebda għajnuna; Alla biegħna f’idejhom biex nintemmu quddiemhom bil-għatx u b’telf kbir.

²⁶Mela sejħulhom u itilqu l-belt bi priża f’idejhom, f’idejn in-nies ta’ Oloferne u l-eżerċtu tiegħu kollu;

²⁷aħjar għalina li jeħduna f’idejhom, naqgħu lsiera u nibqgħu ħajjin; u ma narawx it-trabi tagħna mejtin quddiemna, u lanqas in-nisa u wliedna ma jieħdu l-aħħar nifs.

²⁸Ħa jkunu xhieda kontra tagħkom is-sema u l-art, u Alla tagħna u Sid missirijietna, Alla li qiegħed jikkastigana minħabba dnubietna u d-dnubiet ta’ missirijietna. Jalla ma jseħħx illum dan kollu.”

²⁹U lkoll flimkien fil-ġemgħa nfexxew f’biki kbir, u bdew jitolbu u jgħajtu b’leħen qawwi quddiem il-Mulej Alla.

³⁰Għużżija qalilhom: “Agħmlu l-qalb, ħuti, inżommu għal ħamest ijiem oħra; sakemm il-Mulej iħenn għalina, għax Hu ma jitlaqna qatt għalkollox.

³¹Jekk imbagħad jgħaddi dan iż-żmien, u ma taslilna ebda għajnuna, nagħmel kif qegħdin tgħidu.”

³²U bagħat lil kulħadd f’postu; u marru fuq is-swar u t-torrijiet tal-belt. Lin-nisa u t-tfal bagħathom fi djarhom. U fil-belt kien hemm qtigħ il-qalb kbir.