Read Maltese Bible with DC – IL-BIBBJA IL-KOTBA MQADDSA ĠUDITTA 8 Bible Online

ĠUDITTA 8 - Maltese Bible with DC – IL-BIBBJA IL-KOTBA MQADDSA bible

ĠUDITTA 8

¹F’dak iż-żmien Ġuditta semgħet b’kulma ġara. Ġuditta kienet bint Merari bin Għoks, bin Ġużeppi, bin Għużżijel, bin Ħilkija, bin Ħananija, bin Gidgħon, bin Rafajn, bin Aħitob, bin Elija, bin Ħelkija, bin Elijab, bin Natanjel, bin Salamjel, bin Sarasadaj, bin Iżrael.

²Żewġha kien Manassi mit-tribù u r-razza tagħha, u miet fi żmien il-ħsad tax-xgħir.

³Kien qiegħed fuq il-ħaddiema jorbtu l-qatet fl-għalqa; ħa xemxata, inxteħet fis-sodda, u miet f’Betulja, il-belt tiegħu; difnuh ma’ missirijietu f’għalqa bejn Dotajn u Bagħlamon.

⁴Ġuditta kienet ilha tgħix ta’ armla f’darha għal tliet snin u erba’ xhur;

⁵kienet tellgħet tinda fuq is-setaħ ta’ darha, u kienet tilbes drapp tax-xkejjer, bl-ilbies ta’ armla dejjem fuqha.

⁶Kienet issum il-jiem kollha minbarra lejlet is-Sibt, is-Sibtijiet, il-vġili tal-ewwel xahar, l-ewwel tax-xahar, u l-festi u l-jiem ta’ ferħ f’Iżrael.

⁷Kienet mara sabiħa ħafna fis-sura tagħha u l-ħlewwa ta’ wiċċha. Żewġha Manassi ħallielha deheb u fidda, ilsiera rġiel u nisa, imrieħel u raba’, u baqgħet tieħu ħsieb kollox hi.

⁸Ħadd ma seta’ jgħid xejn ħażin fiha, għax kienet tibża’ tassew minn Alla.

⁹Ġuditta saret taf bil-kliem iebes tal-poplu kontra l-kap tal-belt, għax kien naqashom l-ilma u kienu qatgħu qalbhom; u semgħet ukoll b’kulma kien qalilhom Għużżija, li ħalfilhom li jċedi l-belt lill-Assiri malli jgħaddu l-ħamest ijiem.

¹⁰Għalhekk bagħtet lill-qaddejja tagħha li kienet teħdilha ħsieb ħwejjiġha, u sejħet lil Kabri u lil Karmi, l-anzjani tal-belt.

¹¹Malli waslu għandha qaltilhom: “Isimgħuni, intom il-kapijiet tan-nies ta’ Betulja! Intom ma tkellimtux sewwa llum mal-poplu u lanqas ma hu sewwa l-ġurament li ħadtu bejnkom u bejn Alla, u wegħedtu li ċċedu l-belt lill-għedewwa tagħkom, jekk il-Mulej ma jibagħtilkomx l-għajnuna fi żmien iffissat.

¹²Min intom intom biex iġġarrbu lil Alla[17] llum u togħlew ’il fuq minn Alla fost il-bnedmin?

¹³Tridu b’daqshekk tistħarrġu l-Mulej li jista’ kollox? Imma intom qatt m’intom se tkunu tafu xejn fuqu.

¹⁴Intom li ma tistgħux tilħqu l-qiegħ ta’ qalb il-bniedem, u tifhmu l-ħsibijiet ta’ moħħu, kif tridu tistħarrġu lil Alla li għamel dan kollu? Kif tistgħu tifhmu lil moħħu u lil ħsiebu? Ma jkun qatt, ħuti, li tgħaddbu lil Alla tagħna.

¹⁵Għaliex ukoll jekk ma jridx jgħinna f’dawn il-ħamest ijiem, hu għandu s-setgħa li jaqbeż għalina meta jrid jew li jeqridna quddiem l-għedewwa tagħna.

¹⁶Tfittxux tagħmlu kondizzjonijiet fuq ir-rieda ta’ Alla tagħna, għax Alla mhux xi bniedem biex iħalli ’l min jheddu jew jagħmillu kondizzjonijiet.

¹⁷Għalhekk aħna għandna nistennew is-salvazzjoni tagħna mingħandu, u sadattant nitolbuh jgħinna; u jekk dan jogħġbu, żgur li jisma’ leħinna.

¹⁸“Għax ma kienx hawn fi żmienna, u lanqas hawn fostna llum, tribù jew familja, poplu jew belt, li tadura l-allat magħmula bl-idejn tal-bniedem, bħalma kien hemm fiż-żmien li għadda.

¹⁹Minħabba f’hekk lil missirijietna Alla rħiehom f’idejn l-għedewwa tagħhom biex joqtluhom bis-sejf u jisirquhom, u kbira kienet il-qerda tagħhom f’idejn l-għedewwa tagħna.

²⁰Aħna ma nagħrfu ebda alla ieħor ħliefu. Għalhekk għandna tama sħiħa li mhux se jitlaqna għal riħna, la lilna u lanqas ħadd min-nazzjon tagħna.

²¹Jekk jaqbdu lilna, jaqbdu l-Lhudija kollha, iġarrfu t-tempju tagħna, u Alla jfittex li nħallsu aħna b’demmna għall-profanazzjoni tiegħu.

²²Iżommna ħatja tal-qtil ta’ ħutna, tal-jasar ta’ artna, tal-ħerba ta’ wirtna u jxerridna fost il-ġnus, fejn nisfaw ilsiera, u naqgħu għaż-żebliħ u t-tmaqdir tas-sidien tagħna.

²³Il-jasar ma jiswielna qatt xejn, imma l-Mulej, Alla tagħna, jagħmilhulna għajb għal dejjem.

²⁴“Mela issa, ħuti, nuru lil ħutna li ħajjithom qiegħda f’idejna, u li s-santwarju, it-tempju u l-artal jistrieħu fuqna.

²⁵Għal dan kollu niżżu ħajr lill-Mulej Alla tagħna, li qiegħed iġarrabna, bħalma għamel ma’ missirijietna.

²⁶Ftakru x’għamel ma’ Abraham, u kemm ġarrab lil Iżakk, xi ġralu Ġakobb fil-Mesopotamja tas-Sirja, meta kien jirgħa l-imrieħel ta’ Laban, ħu ommu.

²⁷Għax bħalma mhux b’vendetta lilhom għaddiehom min-nar, imma biex jiflilhom qalbhom, hekk jagħmel magħna, għax il-Mulej isawwat lil min hu qrib lejh biex iwiddbu.”

²⁸Għużżija, imbagħad, weġibha: “Kulma għedt, għedtu minn qalb sinċiera, u ħadd ma jista’ jmieri kliemek.

²⁹L-għerf tiegħek ma deherx illum, imma sa minn żgħożitek il-poplu għaraf l-għaqal tiegħek u fejn hi qalbek.

³⁰Imma l-poplu mejjet bil-għatx u ġagħalna nagħtuh kelma li nagħmlu li għednielhom u nintrabtu b’ġurament li ma nistgħux niksruh.

³¹Int mara sewwa, itlob għalina, biex Alla jibagħtilna x-xita ħa jimtlew il-bjar tagħna, u ma ninfnewx aktar.”

³²U Ġuditta wieġbet: “Isimgħuni, jien se nagħmel ħaġa li jibqgħu jiftakruha minn ġenerazzjoni għal oħra sal-aħħar waħda tal-poplu tagħna.

³³Intom il-lejla oqogħdu ħdejn il-bieb u jien noħroġ mal-qaddejja tiegħi, u qabel iż-żmien li intom għedtu li terħu l-belt f’idejn l-għedewwa tagħna, il-Mulej ikun ħeles lil Iżrael permezz ta’ idejja.

³⁴Intom tfittxux li tkunu tafu x’se nagħmel, għax ma ngħidilkomx qabel ma jseħħ dak li se nagħmel.”

³⁵U Għużżija u l-kapijiet qalulha: “Mur bis-sliem u Alla jimxi quddiemek biex jitħallas mill-għedewwa tagħna.”

³⁶U telqu mit-tinda u marru lkoll f’posthom.