Read Maltese Bible with DC – IL-BIBBJA IL-KOTBA MQADDSA EŻODU 1 Bible Online

EŻODU 1 - Maltese Bible with DC – IL-BIBBJA IL-KOTBA MQADDSA bible

EŻODU 1

¹Dawn huma l-ismijiet ta’ wlied Iżrael[1] li ġew l-Eġittu ma’ Ġakobb, kull wieħed bil-familja tiegħu:

²Ruben, Simgħon, Levi u Ġuda;

³Issakar, Żebulun u Benjamin;

⁴Dan u Naftali, Gad u Aser.

⁵Dawk kollha li tnisslu minn Ġakobb kienu sebgħin ruħ.

⁶Ġużeppi kien diġà l-Eġittu. Ġużeppi u ħutu kollha u dik il-ġenerazzjoni kollha mietu.

⁷Imma wlied Iżrael nisslu, żdiedu u kotru, u saru qawwija ħafna u l-art imtliet bihom.

⁸U laħaq sultan ġdid fl-Eġittu, li ma kienx jaf lil Ġużeppi,

⁹u qal lill-poplu tiegħu: “Araw, il-poplu ta’ wlied Iżrael kiber ħafna u sar aqwa minna.

¹⁰Ejjew nimxu bil-għaqal miegħu, li ma jikbirx aktar u tqum xi gwerra, jingħaqad mal-għedewwa tagħna, jaħbat għalina, u jitlaq ’il barra mill-pajjiż.”

¹¹U għamlu mgħallmin tax-xogħol fuqhom, biex jgħakksuhom b’xogħol iebes. U hekk lill-Fargħun bnewlu l-ibliet tal-imħażen: Pitom u Ragħmses.

¹²Imma aktar ma kienu jgħakksuhom, aktar kienu joktru u jixterdu; u l-Eġizzjani bdew jitbeżżgħu minn ulied Iżrael;

¹³u ġiegħlu lil ulied Iżrael jaħdmu iebes.

¹⁴Imlewlhom ħajjithom bl-imrar u bix-xogħol iebes fit-tafal u l-madum, u bix-xogħol fir-raba’; f’kull xogħol li kienu jqabbduhom, kienu jħaddmuhom bl-aħrax.

¹⁵Is-sultan tal-Eġittu sejjaħ lill-qwiebel Għebrej, waħda jisimha Sifra u l-oħra Pugħa, u qalilhom:

¹⁶“Meta twelldu lin-nisa Għebrej, ħarsu u araw xi tkun it-tarbija; jekk ikun tifel oqtluh, jekk tkun tifla ħalluha tgħix.”

¹⁷Il-qwiebel beżgħu minn Alla, u ma għamlux kif qalilhom is-sultan tal-Eġittu, imma ħallew is-subien ħajjin.

¹⁸Għalhekk is-sultan tal-Eġittu sejjaħ lill-qwiebel u staqsiehom: “Għala għamiltu hekk, u ħallejtu lis-subien ħajjin?”

¹⁹U l-qwiebel wieġbu lill-Fargħun: “In-nisa Għebrej mhumiex bħan-nisa Eġizzjani; billi huma b’saħħithom ikunu ħelsu qabel ma tasal għandhom il-qabla.”

²⁰Għalhekk Alla għamel il-ġid mal-qwiebel. U l-poplu baqa’ joktor u jissaħħaħ ħafna.

²¹U Alla ta familji lill-qwiebel talli beżgħu minnu.

²²Il-Fargħun imbagħad ordna lin-nies kollha tiegħu, u qalilhom: “Ixħtu fix-xmara[2] s-subien li jitwieldu u ħallu l-bniet kollha jgħixu.”