Read Maltese Bible with DC – IL-BIBBJA IL-KOTBA MQADDSA EŻODU 15 Bible Online

EŻODU 15 - Maltese Bible with DC – IL-BIBBJA IL-KOTBA MQADDSA bible

EŻODU 15

¹U mbagħad Mosè, flimkien ma’ wlied Iżrael, għanna din l-għanja lill-Mulej[15], u qalu: “Ngħanni lill-Mulej, għax tkabbar bis-sħiħ. Żwiemel u rikkieba waddabhom fil-baħar.

²Qawwieti u għanjieti l-Mulej: għalija sar is-salvazzjoni. Dan hu Alla tiegħi, u lilu nfaħħar; Alla ta’ missieri, u lilu ngħolli!

³Il-Mulej gwerrier, Jaħweh ismu!

⁴L-imriekeb tal-Fargħun u qawwietu tefagħhom fil-baħar; l-aħjar fost il-gwerriera tiegħu f’Baħar il-Qasab għarraqhom!

⁵Belagħhom l-irdum, bħal ġebla niżlu fil-qiegħ.

⁶Lemintek, Mulej, issebbħet fil-qawwa, lemintek, Mulej, tfarrak il-għadu.

⁷Bil-kobor ta’ sebħek ixxejjen ’il min iqum għalik. L-għadab tiegħek terħih jiblagħhom bħat-tiben.

⁸Man-nifs ta’ għadbek inġemgħu l-ilmijiet; bħal gzuz twaqqfu l-gliegel; għaqdu fil-qalba tal-baħar l-imwieġ.

⁹U l-għadu qal: ‘Niġri għal warajhom u nilħaqhom; naħtaf il-priża u xewqti naqta’; nislet is-sejf u idi teqridhom.’

¹⁰Infaħt b’nifsek, u l-baħar għattiehom. U għerqu bħaċ-ċomb fil-qawwa tal-baħar.

¹¹Min hu bħalek, Mulej, fost l-allat? Min hu bħalek? Int kbir fil-qdusija, tal-biża’ fit-tifħir, int li tagħmel l-għeġubijiet.

¹²Meddejt lemintek, u belgħethom l-art.

¹³Bi tjubitek mexxejt dan il-poplu li int fdejt; b’ħiltek mexxejtu lejn l-għamara qaddisa tiegħek.

¹⁴Semgħu l-ġnus u triegħdu: uġigħ qabadhom il-Filistin,

¹⁵tħawdu l-kbarat ta’ Edom, qabdithom rogħda l-qawwijin ta’ Mowab, dabu bil-biża’ n-nies kollha ta’ Kangħan.

¹⁶Ħa jaqgħu fuqhom biża’ u tregħid; għall-kobor ta’ driegħek jitbikkmu bħal ġebla; sa ma jgħaddi l-poplu tiegħek, Mulej; sa ma jgħaddi dan il-poplu li int ksibt għalik.

¹⁷Twassalhom u tħawwilhom fuq il-muntanja, il-wirt tiegħek; l-imkien, Mulej, li int għamiltu għamartek; il-maqdes, Sidi, li ħejjew idejk.

¹⁸Il-Mulej isaltan għal dejjem ta’ dejjem.”

¹⁹Malli ż-żwiemel tal-Fargħun bil-karrijiet u r-rikkieba tiegħu niżlu fl-ilma, il-Mulej reġġa’ lura għal fuqhom l-ilma tal-baħar, u wlied Iżrael għaddew fin-niexef f’nofs il-baħar.

²⁰U Mirjam, il-profetessa, oħt Mosè u Aron, qabdet it-tanbur f’idejha u ħarġu n-nisa warajha bit-tnabar u ż-żfin.

²¹U Mirjam kienet tweġibhom[16]: “Għannu lill-Mulej, għax tkabbar bis-sħiħ. Żwiemel u rikkieb fil-baħar waddabhom.”

²²Imbagħad Mosè mexxa lil Iżrael minn Baħar il-Qasab, u ħarġu lejn id-deżert ta’ Sur; u damu miexja fid-deżert tlitt ijiem u ma sabux ilma.

²³Waslu f’Mara[17] u ma setgħux jixorbu l-ilma minn Mara għax kien morr. Għalhekk semmewha ‘Mara’.

²⁴U l-poplu beda jgemgem għal Mosè u jgħid: “X’se nixorbu?”

²⁵U Mosè sejjaħ lill-Mulej; u l-Mulej urieh biċċa għuda u xeħitha fl-ilma, u l-ilma sar ħelu. Hemm tahom liġi u ordni, u hemm ġarrabhom.

²⁶U qalilhom: “Jekk tisma’ sewwa l-leħen tal-Mulej Alla tiegħek, u tagħmel dak li hu tajjeb f’għajnejh, u tagħti widen għat-twissijiet tiegħu u tħares kull liġi tiegħu, l-ebda marda milli biha lqatt lill-Eġizzjani ma nġib fuqek, għax jien il-Mulej li nfejqek.”

²⁷U waslu f’Elim fejn kien hemm tnax-il għajn tal-ilma u sebgħin siġra tat-tamar, u waqqfu hemm it-tined ħdejn l-ilma.