Read Maltese Bible with DC – IL-BIBBJA IL-KOTBA MQADDSA EŻODU 17 Bible Online

EŻODU 17 - Maltese Bible with DC – IL-BIBBJA IL-KOTBA MQADDSA bible

EŻODU 17

¹Il-ġemgħa kollha ta’ wlied Iżrael telqu fid-deżert ta’ Sin, jimxu u jieqfu skont ma jgħidilhom il-Mulej; u waqfu f’Rafidim. Hemmhekk ma kienx hemm ilma x’jixorbu.

²Il-poplu ħadha kontra Mosè u qalulu: “Agħtina ilma x’nixorbu!” Mosè weġibhom: “Għaliex teħduha miegħi u ġġarrbu lill-Mulej!”

³Hemmhekk il-poplu qabdu l-għatx, u gemgem kontra Mosè u qal: “Għalfejn tellajtna hawn mill-Eġittu biex toqtol lilna, ’l uliedna u ’l-bhejjem tagħna bil-għatx?

⁴Mosè għajjat quddiem il-Mulej u qal: “X’se nagħmel lil dan il-poplu? Ftit ieħor u jħaġġruni.”

⁵Il-Mulej qal lil Mosè: “Għaddi minn quddiem il-poplu, u ħu miegħek xi wħud mix-xjuħ ta’ Iżrael; ħu f’idejk il-ħatar li bih kont drabt ix-xmara tan-Nil, u mur.

⁶Arani, jien noqgħod hemm quddiemek, fuq il-blat f’Ħoreb; u int aħbat il-blat u toħroġ minnu l-ilma, u jixrob il-poplu.” U Mosè għamel hekk quddiem ix-xjuħ ta’ Iżrael.

⁷U l-post semmewh: ‘Massa u Meriba[19]’, għax hemm tlewmu wlied Iżrael u ġarrbu lill-Mulej meta qalu: “Il-Mulej fostna jew le?”

⁸Il-poplu ta’ Għamalek[20] qam u tqabad ma’ Iżrael f’Rafidim.

⁹Mosè qal lil Ġożwè: “Agħżel irġiel u mur tqabad ma’ Għamalek; jien noqgħod wieqaf fuq il-quċċata tal-għolja, bil-ħatar ta’ Alla f’idi.”

¹⁰Ġożwè għamel kif qallu Mosè, u mar jitqabad mal-Għamalekin. Mosè, Aron u Ħur telgħu fuq il-quċċata tal-għolja.

¹¹Kull meta Mosè kien jerfa’ idejh, Iżrael kien jirbaħ; u kull meta kien iniżżel idejh, kienu jirbħu l-Għamalekin.

¹²Meta idejn Mosè bdew jitqalu, ħadu ġebla u qegħduhielu taħtu; u hu qagħad bilqiegħda, waqt li Aron u Ħur żammewlu dirgħajh, wieħed kull naħa. Hekk idejh baqgħu sodi merfugħa sa nżul ix-xemx.

¹³U Ġożwè qered lil Għamalek u l-poplu tiegħu b’xifer ix-xabla.

¹⁴U l-Mulej qal lil Mosè: “Ikteb dan b’tifkira fi ktieb u aqrah f’widnejn Ġożwè, li jien neqred għalkollox it-tifkira ta’ Għamalek minn taħt is-sema.”

¹⁵U Mosè bena artal u semmieh: “Jaħweh Nissi[21]”

¹⁶għax qal: “Talli refgħu idhom għall-istandard tal-Mulej, il-Mulej jitqabad ma’ Għamalek minn nisel għal nisel.”